ဂိတုမေ စၟတ်တ္ၚဲ (၁၁) တုဲကၠုၚ်ဏံ အခိၚ်ဗ္တမ် (၇) နာဍဳဂှ်ဝွံ ပ္ဍဲသၚ်္ခဠၜုရဳ၊ ပွိုၚ်ဍုၚ်ကမ္မရဳ ကပေါတ်စက်ပၟတ် (၂) မ သွက်ဂွံပလံၚ်ဏာ ဇရေၚ်ဂိုဏ်ကျာဖျ “Online Scam’’ လ္ပါ်ပယျဵုသေံ-ဗၟာ ဍုၚ်ကျာ်ပိဂှ် ဗၠာဲသၟိၚ်သေံတအ် ရပ်သီဂွံလဝ်ရောၚ် နူကဵုတမ်ရိုဟ်ပရိုၚ်သေံ သၚ်္ခဠၜုရဳတအ် ချူဓမံက်လဝ်ဂှ် ဂွံဆဵုကေတ်ရ။

ကပေါတ်စက်ပၟတ်ဇၞော် ဟွံလုပ်သၞောဝ်ဏအ်ဝွံ ဖ္ဍိုက်နၚ်ကဵုကွဳစက်သၠာစှ် ဗၞတ် (၃) ဖ္ဍိုက်တုဲ ကွဳစက်တအ်ဂှ် လုပ်စိုပ်ကြပ်ကၠုၚ်ကဵု ဒပ်စၟဳစၟတ်တၞံပကုက်ဂှ်တုဲ ဗၠာဲသၟိၚ်သေံတအ် ရပ်ဗဒေါံစၟဳစၟတ်ကီုလေဝ် ဟွံဒေါံမွဲသာ် ဒမြိပ်ဒဳဏာ ကွဳစက်အသိၚ်ထတ်တ်ဂှ်ရ ဗၠာဲသၟိၚ်သေံ မၞုံသၚ်္ခဠၜုရဳကဵု ကမ္မရဳတအ် ပံၚ်တောဲဗက်အာတုဲ ရပ်ဂွံလဝ်ညးတအ် ဗ္ဒါဲကဵုပါၚ်ဂၠံၚ်လုပ် ကွာန်ပလိုၚ်ဂျပါန်ဂှ်ရောၚ် ဂွံတီကေတ်ရ။

ပ္ဍဲကဵုကွဳစက်ကာဂှ်ဝွံ ရပ်သီဂွံ ကပေါတ်စက်ပၟတ်ဂကူဇၞော် ဗၞတ် (၂) မ ကဵု ကပေါတ်ထိၚ်ဓါတ်လလဳ (Control boxes) ဗၞတ် (၄) မကီုတုဲ သီုကဵုညးတၠကွဳစက် (၄) တၠဂှ်လေဝ် ရပ်ထိၚ်ဂွံလဝ်ကီုရောၚ် ဂွံတီကေတ်ရ။

ပြဟ်ဟ်ဏအ် ဗၠာဲသၟိၚ်သေံတအ် ရပ်ထိၚ်ကေတ်လဝ်အရေဝ် ညးတၠကွဳစက် (၄) တၠဂှ် သၟာန်စၟဳစၟတ်မံၚ်နွံတုဲ နူကဵု “ယှဳပဳနာန်’’ (Shipping Nan) တအ် လိၚ်ကော်လဝ် ကွဳစက်မွဲဖ္ဍိုက်ဂှ်မ္ဂး နကဵုၚုဟ် (၁၂,၀၀၀) ၝာတ်တုဲ သွက်သ္ဂောံပလံၚ်ဏာ လ္ပါ်ပယျဵုသေံ-ဗၟာ ဍုၚ်ကျာ်ပိ ပ္ဍဲကဵုကွာန်ပလိုၚ်ဂျပါန်ဂှ်ရောၚ် ဂးရ။

ကပေါတ်စက်ပၟတ်တဏအ်ဂှ်ဝွံ ဒှ်ကပေါတ်ဂကောံဂိုဏ်ကျာဖျ “Online Scam’’တအ် သွက်ဂွံရပ်စပ်စကာသုၚ်စောဲတုဲ ဂကောံဂိုဏ်ကျာဖျတအ်ဂှ် ဖျေံသ္ဇိုၚ်ဒၟံၚ်တန်တဴမံၚ် လ္ပါ်ပယျဵုသေံ-ဗၟာ ကျာ်ပိဂှ်ရောၚ် ဂွံတီကေတ်ရ။

လ္ပါ်သၚ်္ခဠၜုရဳ၊ ကမ္မရဳ ပယျဵုဒေသကျာ်ပိဂှ် ဗၠာဲသၟိၚ်သေံ၊ ဒပ်ပၞာန်၊ ဒပ်မၚ်ဂီုကၠီု ဒေသပယျဵုတအ် စၟဳစၟတ်ရပ်စပ်ဂွံမံၚ်ကပေါတ်ဟွံလုပ်သၞောဝ် ကပေါတ်ကျာဖျတအ် စကာသုၚ်စောဲမံၚ် ကပေါတ်လာၚ်အေန်တာနိတ်၊ ကပေါတ်စက်၊ ဖုၚ်တအ် မွဲနှေံမွဲနှေံနွံရောၚ် ဂွံတီကေတ်ရ။

ဗီုရုပ် – โจโฉ