ပရေင်ကမၠောန်အဓိက ဒပ်မန်ရာမည (Ramonnya Mon Army-RMA) မ္ဒးကဵုဖျုန်ကၠောန်အာတ္ရဲဏအ်ဂှ် ဒှ်ပရေင်ဗ္တိုက်သရိုဟ် သၞောတ်တၠအဝဵုပၞာန် ကဵု သၞောဝ် ၂၀၀၈ မစဵုဒၞါလဝ်သၞောတ်တၠအဝဵုပၞာန်တအ်ဂှ်ရောင် ဥက္ကဌ ဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန်) NMSP-AD နာဲဇဲယ ဟီုရ။
ဂိတုမေ စၟတ်တ္ရဲ ၂၄၊ သၞာံ ၂၀၂၆ ဂှ် ကၠောန်ဗဒှ်အခန်ကၞာ တ္ရဲဒက်ပ္တန်ဒပ်မန်ရာမည ပေင် (၁) သၞာံတုဲ ညးမဒှ်ဥက္ကဌဗော် NMSP-AD တိုန်စိုပ်ဟီုဂးလဝ် ဂလာန်လ္တူဂှ်ကီုရ။
“သၞောတ်တၠအဝဵုပၞာန်ဏအ် ဒတုံသရိုဟ်စှ်ေမာန်မှလေဝ် အတိုင်ပိုယ်ရန်လဝ် ဍုင်မန် ဍိုက်ပေင်ကဵုအခေါင်ကံကုသဵုဇကု ဇကုဖန်က်ကေတ်ဂှ် မံက်ကၠုင်မာန်” သာ်ဝွံ ဥက္ကဌ နာဲဇဲယ ဟီုရ။
ဒှ်သာ်ဂှ်ရ ပရေင်ကမၠောန်ကဵုလဝ်ဖျုန်အဓိကတအ်ဂှ် မ္ဒးလုပ်အာပေါဲဗ္တိုက် အတိုင်သၟဝ်ပၠတရဴ ပရေင်ဍုင်ကွာန် ဗော်ဍုင်မန်တၟိ (အေဒဳ) သၟးဟွံက ပံင်တောဲကဵု ဂကောံပၠန်ဂတးကောန်ဍုင်အရင်ဘဝတုပ်ဂမၠိုင်ကဵု ဒပ်ပၠန်ဂတးညးဍုင်ကွာန်ဂမၠိုင်တုဲဒးဆက်လုပ်အာပေါဲဗ္တိုက်ရောင် ညးဆက်ဟီုရ။
ပ္ဍဲသၞာံ ၂၀၂၅ ဂိတုမေ စၟတ်တ္ရဲ ၂၄ ဂှ် ဒပ်ပၞာန်ဗၠးၜးကောန်ဂကူမန် (MNLA-AD) ကဵု ဒပ်ပၞာန်ဗၠးၜးဍုင်မည် (MLA) တအ် လလောင်တြး ဒဒှ်ရ ပံင်ကောံညးသ္ကအ်တုဲ တုပ်စိုတ်ဒက်ပ္တန်လဝ် ဒပ်မန်ရာမည (RMA) ရ။
ခြာဟွံလအ် ပ္ဍဲသၞာံ ၂၀၂၅ ဂိတုသေပ်တေမ်ဗါ စၟတ်တ္ရဲ ၁၈ ဂှ် ဒပ်ပၞာန်ဗၠးၜးမန် (MLF) လေဝ် လုပ်ပံင်ကောံကၠုင် ပ္ဍဲဗော်ဍုင်မန်တၟိ (အေဒဳ)/ ဒပ်မန်ရာမညဂှ်ပၠန်ရောင် ဂွံတီကေတ်ရ။
ဗီုရုပ် – RMA-Ramonnya Mon Army