ကိစ္စဗ္တောန်လိက်မန် ပ္ဍဲဘာတန်အလဵုအသဳ သွက်သၞာံဗ္တောန်ပညာ ၂၀၂၆-၂၀၂၇ ဏံဂှ် လၟိဟ်အ္စာပတိုန်လဝ်စရၚ်နွံ အောန်ကွေံကွေံတုဲ အ္စာဒှ်ဒတန်ဍာံဍာံနွံလၟိဟ်ဂလိုၚ်လဵုဂှ်လေဝ် နူဌာနပရေၚ်ပညာကမ္မယှေန်ပၞာန်တအ် ဟွံဂွံဖျေံသ္ပကဵုဒတန်ဏီတုဲ ဒှ်ဆိုအ်ဗမံၚ်ဖိုဟ်ရောၚ် ညးတာလျိုၚ်ဖန်ဇန် ကိစ္စဗ္တောန်လိက်မန်ပ္ဍဲဘာတန် မွဲတၠ ဟီုလဴထ္ၜးရ။
သွက်သၞာံဗ္တောန်ပညာ ၂၀၂၆-၂၀၂၇ ပံက်ဘာဏံဂှ် နူကဵုဌာနပရေၚ်ပညာကမ္မယှေန်ပၞာန် တြးလိက်ကော်ဘိက်လဝ် အ္စာဘာဗ္တောန်လိက်ဘာသာကောန်ဍုၚ်အရၚ် သွက်ဂွံဗ္တောန်လိက်မန် ပ္ဍဲဘာတန်ဂှ် မၞိဟ်ပတိုန်လဝ်စရၚ် ၂၆ တၠဓဝ်တုဲ စရၚ်ပတိုန်လဝ်လၟိဟ်အောန်ဏံလေဝ် ဒဵုလၟုဟ်ဂှ် စရၚ်ဟွံစှ်ကၠေုၚ်ဏီတုဲ ကိစ္စဗ္တောန်လိက်မန်ဂှ် ဒှ်ဒၟံၚ်ပရေၚ်ဆိုအ်ဗနွံ မာန် ညးတာလျိုၚ်ဖန်ဇန် ကိစ္စဗ္တောန်လိက်မန် နူကဵုဂကောံလိက်ပတ်ယေန်သၞာၚ်မန်ဂှ် ဟီုထ္ၜးသာ်ဝွံရ။
“သွက်ဂွံဗ္တောန်လိက်မန် သၞာံဗ္တောန်ပညာ ၂၀၂၆-၂၀၂၇ ဘာပံက်ဏံဂှ် ဒဵုလၟုဟ် စရၚ်လၟိဟ်အ္စာဗ္တောန်ကီု၊ ဘာဗ္တောန် ကီုဂှ် ဟွံချိုတ်ပၠိုတ်ဏီ ကိစ္စခါန်ကၞက်အ္စာဂှ် နူဌာနပရေၚ်ပညာအလဵုအသဳတေံဏောၚ် ဖျေံသ္ပကဵုဒတန်၊ နူကဵုသၟဝ်ဏံ မုလေဝ်ဖန်ကေတ်ဟွံဂွံပုဟ်၊ မၞိဟ်ပတိုန်လဝ်စရၚ်ဂွံဗ္တောန်သ္ပအ္စာဂှ်လေဝ် လၟိဟ်အောန်ကွေံကွေံ အ္စာသှ်ေတအ်ဂှ် ဗီုလဵု ဂွံချပ်အာဂှ်လေဝ် ဟီုဟွံဒးဏီ” သ္ဂးရ။
အခိၚ်ပံက်ဘာဂှ် သှ်ဒၟေံၚ်ဗၞတ်ပွိုၚ်မွဲသတ္တာဟပြၚ်ညိရတုဲ ဒဵုလၟုဟ်ဂှ် ကိစ္စအ္စာဂွံဗ္တောန်လိက်မန် ပ္ဍဲဘာတန်တအ်ဂှ် ဟွံ ချိုတ်ပၠိုတ်ဏီဂှ်ကီု၊ လၟိဟ်မၞိဟ်ပတိုန်လဝ်စရၚ်သ္ပအ္စာဂှ်လေဝ် လၟိဟ်အောန်ဗွဲမလောန်ကွေံကွေံတုဲ သွက်ဂွံဗ္တောန်လိက် မန်ပ္ဍဲဘာတန် အခိၚ်ပံက်ဘာဏံဂှ် သွက်ဂွံဒှ်ခက်ခုဲနွံရ။
အစဳဇန်ဗ္တောန်လိက်မန် ပ္ဍဲကဵုဘာတန်အလဵုအသဳ နူကဵုဗော်ဍုၚ်မန်တၟိ သဳကၠဳတက်လဝ်ကျာ ကာလပေါဲဆဵုဂဗသဳကၠဳ ပညဳပညပ်ပရေင်ၜိုဟ်လလမ်တုဲတုဲကၠုၚ်တေံဂှ် ပွိုၚ်ဍုၚ်တ္ကအ်ခၟိုၚ်၊ ပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်ရေဝ်ဂှ် နကဵုအစဳဇန် စမ်ၜတ်ကၠာတဲ သွက်ဂွံဗမံက်အာရုပ်ရဴ နကဵုဗီုပြၚ်သၞောတ်စှ်စှ်ေမာန်ဂှ်ဂွံလဝ်တၚ်တုပ်စိုတ်နွံရ။
ဆဂးဂှ် ပေါဲသဳကၠဳတက်ကျာပရေင်ၜိုဟ်လလမ် ဗော်ဍုၚ်မန်တၟိကဵု ကမ္မေယှန်ပၞာန်ဂှ် ဒေါံဒေၚ်အာတုဲ ကိစ္စ ဗ္တောန်လိက်မန် ပ္ဍဲဘာတန်အလဵုအသဳဂှ် ဂွံပညဳပညပ်သဳကၠဳဖျေံဗီု နကဵုဗ္ၜတ်ဗီုပြၚ်စှ်စှ်ေမာန်ဂှ်လေဝ် ဒှ်အာဆိုအ်ဗရ။
ပရေၚ်ဗ္တောန်လိက်ဘာသာကောန်ဍုၚ်အရၚ် ပ္ဍဲတွဵုရးဂမၠိုၚ်အလုံမွဲကၟိန်ဍုၚ်ဂှ် တုဲကၠုၚ် ကာလအလဵုအသဳ အေန် အေဝ်လ်ဒဳ ၂၀၁၆ တိုန်တုဲဂှ် ကဵုလဝ်အခေါၚ်ဗ္တောန်လိက်ဘာသာကောန်ဍုၚ်အရၚ်ဂမၠိုင် မ္ရးအခိင်ဘာတုဲ ပ္ဍဲတွဵုရးညးကဵုညးဂှ်လေဝ် အ္စာဘာကောန်ဂကူကောန်ဍုၚ်အရၚ်ဂမၠိုၚ်တအ် နကဵုၚုဟ်လိၚ်တ္ၚဲ (Teaching Assistant – TA) ၊ ၚုဟ်လိၚ်အခိၚ် (မွဲတ္ၚဲ မွဲနာဍဳ) (Language Teacher – LT) နွံရ။
ပ္ဍဲတွဵုရးဍုင်မန်ဂှ် ဘာတန်အလဵုအသဳ ဗ္တောန်ဘာသာလိက်မန် နွံ ၂၇၀ ဘာ၊ ဘာသာကရေင် နွံ ၂၇၃ ဘာ၊ ဘာသာပအိုဝ် နွံ ၃၀ ဘာတုဲ လၟိဟ်အ္စာဘာ ၁၂၀၀ တၠပြင်နွံရောင် ဂွံတီကေတ်ရ။
