သွက်သၞာံဗ္တောန်ပညာ (၂၀၂၆ -၂၀၂၇) ဏံဂှ် အ္စာဘာတအ် ဒေါံဇူဂၠိုၚ်တုဲ ပ္ဍဲဘာကောန်ဂကူမန်ဗွဲမဂၠိုၚ်ဂှ် ဒဵုလၟုဟ် ကိစ္စဂၠာဲဗပေၚ်အ္စာတအ် ဟွံပြေပြံၚ်ဏီရောၚ် ညးဘိုၚ်ရေၚ်တၠုၚ်ဒၟံၚ် ကိစ္စဘာကောန်ဂကူမန် ဆက်စပ်ကဵုကမ္မတဳပရေၚ်ပညာ ကောန်ဂကူမန် (ဗဟဵု) မွဲတၠ ဟီုလဴထ္ၜးရ။
“သၞာံဏံ အ္စာတအ် ဒေါံဇူဂၠိုၚ်ကွေံကွေံ ဂစာန်ဂၠာဲဗပေၚ်မံၚ်ညးသ္ကအ်ကီုရ၊ ဘာဗွဲမဂၠိုၚ်ဂှ် ဒဵုလၟုဟ် ဂၠာဲဗပေၚ်အ္စာ ဟွံပြေပြံၚ်ဏီဖိုဟ်၊ ဘာဂၠာဲဗပေၚ်အ္စာဟွံပေၚ်တအ်ဂှ်တှေ် သွက်ဂွံဗ္တောန်လိက်ဂှ် ခက်မာန်မံၚ်” သာ်ဝွံ ညးဘိုၚ်ရေၚ်တၠုၚ်ကိစ္စဘာကောန်ဂကူဂှ် ဟီုရ။
အ္စာဘာကောန်ဂကူမန် အလုံမွဲဌာနပရေၚ်ပညာဝွံ ဘာသီုဖအိုတ်ဂှ် လၟိဟ်အ္စာဗၞတ် (၆၀) တၠပြၚ် ဒေါံဇူအာနွံတုဲ လၟုဟ်မ္ဂး ဒေသညးကဵုညးဂှ် ဂစာန်ဂၠာဲဗပေၚ်ကော်ဘိက်ဒၟံၚ်အ္စာဘာ သွက်ဂွံကေတ်တာလျိုၚ် ပ္ဍဲကဵုဘာကောန်ဂကူ ပွိုၚ်ဍုၚ်ညးကဵုညးနွံဒၟံၚ်ရ။
“အ္စာဘာ ပ္ဍဲဘာကောန်ဂကူဂှ် အ္စာတအ်ဒေါံဇူမံၚ် အရိုဟ်သၞာံနွံကၠုၚ်မံၚ်ရ၊ ဆဂး သၞာံဏံရ ဒေါံဇူလၟိဟ်ဂၠိုၚ်လောန်အာ၊ မုဟိုတ်ဗီုလဵုဂှ် ဟွံတီရ၊ ဒေါံဇူဂၠိုၚ်လောန်အာတှေ် ဂွံကလေၚ်ဗပေၚ်လၟိဟ်အ္စာအတိုၚ်တြေံပၠန်ဂှ် ဘာလ္ၚဵု ခက်ပိက်မံၚ်၊ အကာဲအရာလၟုဟ်ပၠန်ဂှ် ဂၠာဲအ္စာဝါတ်ပိက်မံၚ် ဂၠာဲဂှ် ဂစာန်ဂၠာဲမံၚ် ဗီုညးဗီုညးဖိုဟ်ရ” သာ်ဝွံ ညးဆက်ဟီုထ္ၜးရ။
ပ္ဍဲကဵုအ္စာဘာဒေါံဇူအာဂမၠိုၚ်ဂှ် အ္စာဘာနူပွိုၚ်ဍုၚ်ဇြပ်ဗုတအ် ဒေါံဇူအာနွံဂၠိုၚ်တုဲ ပ္ဍဲကဵုကိစ္စဂၠာဲဗပေၚ်အ္စာဂှ်လေဝ် ပွိုၚ်ဍုၚ်ဇြပ်ဗု ဒှ်ခက်ခုဲဂၠိုၚ်အိုတ်ရဂှ်လေဝ် ညးလဴထ္ၜးရ။
ဘာကောန်ဂကူမန်ဂှ် ဒုၚ်သဇိုၚ်ကဵု ဩန်ဘဏ္ဍာနူတၠဒါန်ဂမၠိုၚ်တအ် ထံက်ပၚ်လဝ်တုဲ ဗ္ဂေတ်ဒၟံၚ်စက်ယန်ပရေၚ်ကမၠောန်ဘာရ။ လၟုဟ်မ္ဂး အခိၚ်ပံက်ဘာဂှ် ကြပ်ကၠုၚ်ကွေံကွေံတုဲ ဘာလ္ၚဵုတအ် ဂၠာဲဗပေၚ်အ္စာ သွက်ဂွံကေတ်တာလျိုၚ် သ္ပအ္စာဂှ် ဟွံဂွံဏီဖိုဟ်ဂှ်တုဲ သ္ဒးဒှ်ဂဝိၚ်ကဵု ဘာလီုရောၚ်ဂှ်လေဝ် ဂကောံကေၚ်ကာအ္စာဘာ ပွိုၚ်ဍုၚ်လ္ၚဵုတအ် ဒှ်ဂဝိၚ်နွံရ။
ဘာကောန်ဂကူမန်ဂှ် ဗွိုၚ်တိဍာ်ဗော်ဍုၚ်မန်တၟိကဵု ဗွိုၚ်အပ္ဍဲဍုၚ် သီုဖအိုတ်ဂှ် နွံ (၁၄၆) ဘာတုဲ အပ္ဍဲဂှ်မ္ဂး ဘာကဝ်လိက် (၁) ဘာ၊ ဘာတန်သၠုၚ် (၄) ဘာ ဘာတန်လ္ဒောဝ်နွံ (၁၉) ဘာ၊ သှေ်နူဂှ် ကဆံၚ်တန်မူလကဵု တန်မူလလောန်ရ။ အပ္ဍဲဂှ်မ္ဂး လၟိဟ်အ္စာဘာ နွံဗၞတ် (၈၀၀) တၠတုဲ လၟိဟ်ကွးဘာ ဗၞတ် (၁၅၀၀၀) တၠနွံ ဂွံတီကေတ်ရ။
