ညးတြုံအာယုက်ဇၞော် ဒေသကအ်ဗိန်၊ ပွိုၚ်ဍုၚ်ကအ်ကြိက်၊ တွဵုရးကရေၚ် (၁) တၠဂှ် ဂကောံရပ်လွဟ်အပ္ဍဲဒေသမွဲဂကောံ ရပ်ဏာတုဲ ပ္ဍဲကဵုလလအ်ပွိုၚ် (၉) တ္ၚဲဂှ် ဂွံက္လေၚ်ဆဵုကေတ်ချိုတ်မံၚ်ရောၚ် ဂွံတီကေတ်ရ။

ပ္ဍဲဂိတုဗေအရဴအိုတ်တုဲကၠုၚ်ဏံ ညးဒေသကအ်ဗိန် အာယုက် (၅၈) သၞာံမွဲတၠဂှ် ဂကောံရပ်လွဟ်မွဲဂကောံ ရပ်ဏာလဝ် ပ္ဍဲဒၞာဲသ္ကုတ်ဂၠံၚ် ဗဒဲါပွဳဗွိုၚ်ကအ်ဗိန်ရ။

ရပ်ဂွံဏာလဝ် လလအ်ပွိုၚ် (၉) တ္ၚဲတုဲ ပ္ဍဲဂိတုမေ (၃) ဏံ သွက်ဂွံအာကေတ်ဇွ ညးဒေသကအ်ဗိန်မွဲတၠ ပ္ဍဲဒၞာဲသ္ကုတ်ဂၠံၚ်မွဲဒၞာဲဂှ် ကေတ်နၚ်အဆက်ဂှ်ရ ဂကောံရီုဗၚ်မၞိဟ်တံ အာစိုပ်ကေတ်နၚ်တုဲ ပလံၚ်ဏာသုသာန်ကအ်ဗိန်ရ။

“ညးဂှ် မၞိဟ်ခိုဟ်ခိုဟ်ရ။ ပရေၚ်ပံၚ်ဖက်ဆက်ဆောံမၞိဟ်ခိုဟ်တုဲ ဇၟာပ်မၞိဟ်ဍုက်ကေဝ်ကဵုညးရ။ အရာပရေံပရေံတံဂှ်လေဝ် မုဟွံကၠောန်ပုဟ်။ ဆေၚ်စပ်ကဵု ပရေၚ်ပၠန်ဂတးလေဝ် မုဟွံကၠောန်ပုဟ်။ ဂွံမိၚ်ကေတ်ဂှ်တှေ် နူကဵုညးကၠေံအာတုဲ ဟွံဂွံအဆက်ကဵု သ္ၚိကၟိန်ညးဟဂှ်ရ။ ချိုတ်အာတုဲမှ ဂကောံသ္ၚိကၟိန်တံ ဂွံအာဆဵုပ္ဍဲသုသာန်ရ” သာ်ဝွံ ညးဒေသကအ်ဗိန်မွဲတၠဂှ် ဟီုရ။

ပ္ဍဲကဵုဇွညးချိုတ်ဂှ်ဝွံ မပ္တံဘဲဝပ်လွဟ်၊ ဘဲဒးဒုၚ်ပျဲပျာံဂမၠိုၚ်ဂှ်လေဝ် ဟွံဂွံဆဵုကေတ်ရ။

ညးဒေသဂှ်ဝွံ ဒှ်မံၚ်ယဲဆီၜေတ်၊ ယဲခယျာဍာတ်တုဲ အခိၚ်ဒးဒုၚ်ရပ်လဝ်ဂှ် သၟာၚ်နူဟွံဂွံအဆက်ကဵုသ္ၚိကၟိန်ဂှ်မ္ဂး အခေါၚ်လွဳလွတ်လေဝ်ဟွံဂွံရောၚ် ညးစုက်လုက်ကဵု ဂကောံသ္ၚိကၟိန်မွဲတၠဂှ် ဟီုရ။

“ရပ်လဝ်ညးဒၞာဲလဵုတုဲ ထိၚ်လဝ်အလဵုဂှ်လေဝ် ဟွံတီပုဟ်။ ဇေတ်ဇေတ်တှေ် ညးမံၚ်ဟွံခိုဟ်တှေ် ဆက်စၠောံကဵုသ္ၚိကၟိန်တုဲ ဂဥုဲညးသုၚ်မံၚ်ဂှ် ဒးကဵုအခေါၚ်ပလံၚ်ဏောၚ်။ လၟုဟ်ဏံ မုမှလေဝ် ဟွံကေတ်အဆက်ပုဟ်။ ညးဂှ် ယဲဆီၜေတ်၊ ယဲခယျာဍာတ်နွံမံၚ် ဂးရ။ မၞိဟ်ဂှ်လေဝ် ဖေက်လကိုတ်တုဲ စိုတ်ဓာတ်လေဝ်စှေ်ကၠုၚ်တှေ် ချိုတ်အာဗီုဏံဒှ်မာန်ဏောၚ်။ အခိၚ်ဍေံတံရပ်လဝ်ဂှ် ညးမွဲမှဟွံဆဵုတှေ် ညးမွဲလေဝ် ဟီုချိုတ်ချိုတ်ပၠိုတ်ပၠိုတ်ဟွံမာန်ပုဟ်” သာ်ဝွံ ဟီုရ။

ညးဝွံ အခိၚ်ကၠာတေံ ဟိုတ်နူဒှ်မံၚ်သၟာပရိုၚ်တြေံ နူဌာနပရိုၚ်ကမ္မယှေန်ပၞာန် ဖျေံသဇိုၚ်ဍုၚ်ကအ်ကြိက်ဂှ်ရ ဂကောံဒပ်ပၠန်ဂတးအပ္ဍဲဒေသတံ ဟီုဂးဒလာန် ဗက်ရပ်မံၚ်တုဲ ဒးပဲါဒဴဒၟံၚ်နူသ္ၚိ မွဲနှေံမွဲနှေံကီု ဂွံတီကေတ်ရ။

အခိၚ်လၟုဟ်ဏံ ပ္ဍဲကွာန်ကအ်ဗိန်ကဵု ပွဳဗွိုၚ်ဗဒဲါဗဒဲါတံဂှ် သၟာၚ်နူဒပ်စဵုဒၞာညးဍုၚ်ကွာန် PDF၊ ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD တုဲ ဂကောံရပ်လွဟ်ကရေၚ်တံလေဝ် အာကၠုၚ်ချဳဓရာၚ်မံၚ်နွံရောၚ် ဂွံတီကေတ်ရ။

သွက်သ္ဂောံတီကေတ် ပရူဒဒှ်မၞိဟ်ချိုတ်ဏံဂှ်ဝွံ နူဌာန်ပရိုၚ်ဗၠးၜးမန် IMNA ကေတ်အဆက်သၟာန်သၟုက်ဒၟံၚ် ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD မချဳဓရာၚ်ဒၟံၚ်အပ္ဍဲဒေသဂှ်ဖိုဟ်ရ။