ကျာ်ဣသိယဵု၊ မၞုံပ္ဍဲဍုၚ်သဓီု၊ တွဵုရးဍုၚ်မန်ဂှ်ဝွံ ကၟုဲကၠုၚ်စိုပ်လ္ၚောဝ်ကျာ် က္လေၚ်ဂၠိုၚ်ကၠုၚ်တုဲ ပ္ဍဲကာလသဘၚ်ကျာ် (၂၀၂၅ – ၂၀၂၆) ဏံ ကၟုဲကၠုၚ်လ္ၚောဝ်ကျာ် နူအပ္ဍဲဍုၚ်၊ မ္ၚးဍုၚ် (၁ ဒသမ ၄) ပြကောတိကိုဋ်ပြၚ် လုပ်စိုပ်လဝ်ရောၚ် ဂွံတီကေတ် နူဂေါပကထိၚ်ဒဝ်ဘဏ္ဍာကျာ်ရ။
ဇရေၚ်ကျာ်ဣသိယဵု ညးကၠုၚ်စိုပ်လ္ၚောဝ်လၟိဟ်ကဵုကိုဋ် ဇၟာပ်သၞာံဂှ်ဝွံ ဗွဲကြဴနူဒှ်ယဲကိုဝ်ဝေဒ်တုဲ နူကဵုညးကၠုၚ်စိုပ်လ္ၚောဝ်အောန်စှေ်ဂှ်မ္ဂး ဟိုတ်နူဒပ်ပၞာန်ဗၟာသီထောံအဝဵုတုဲ ညးကၠုၚ်စိုပ်လ္ၚောဝ်ညံၚ်ကဵုဟၟဲ အောန်စှေ်အာရ။
ဗွဲကြဴနူပၞာန်သီအဝဵုတုဲဂှ် ပဋိပက္ခရပ်လွဟ် ကတဵုဒှ်မံၚ် ပ္ဍဲအကြာဗဒဲါပွဳဗွိုၚ်ကျာ်ဣသိယဵုဂှ်ရ ညးကၠုၚ်စိုပ်လ္ၚောဝ် အောန်စှေ်အာရ။
နူကဵုညးကၠုၚ်စိုပ်လ္ၚောဝ်အောန်စှေ်ဂှ်ရ စပ္တံနူ သၞာံ (၂၀၂၃) တုဲ ညးလ္ၚောဝ်ကျာ် က္လေၚ်လုပ်စိုပ်ကၠုၚ် အပ္ဍဲဒေသကျာ်ဣသိယဵုပၠန်ရောၚ် ဂွံတီကေတ် နူဂေါပကကျာ်ကဵု ညးဒေသကျာ်ဣသိယဵုတံရ။
သဘၚ်ကျာ်ဣသိယဵုဝွံ ဇၟာပ်ဇၟာပ်သၞာံ ကၠောန်ဗဒှ်ဒၟံၚ် စနူဂိတုဝှ်ပေၚ် စဵုကဵုဂိတုပသာ်ပေၚ်ရ။
အခိၚ်လၟုဟ်ဏံ သဘၚ်ကျာ်ဣသိယဵုတုဲဒှ်အာကီုလေဝ် ညးကၠုၚ်လ္ၚောဝ်ကျာ်တံ နွံမံၚ်အရိုဟ်တ္ၚဲရောၚ် ဒုသ္ကိုပ်ရုၚ် ဗဒိုပ်ဗလးကျာ်ဣသိယဵု ဥူသာန်ဠေန်အံၚ် ဟီုရ။
“စိုပ်ရာသဳဗြဲကီုလေဝ် ညးလ္ၚောဝ်ကျာ်တံ ကၠုၚ်စိုပ်မံၚ်ကြပ်ဓမ္မတာ (ကြပ်ဗီုတြေံ) ရ။ ပ္ဍဲကာလဗြဲဏံ ညးကၠုၚ်လ္ၚောဝ်ကျာ်ဣသိယဵုတံ ဂွံဇူဒီု၊ ဂွံစသုၚ်ကဵု ကိစ္စပရေၚ်ထတ်ယုက်ဂှ် စဳဇန်ကဵုလဝ်ဏောၚ်” သာ်ဝွံ ညးဟီုရ။
ဟိုတ်နူညးလ္ၚောဝ်ကျာ်တံ လုပ်စိုပ်ကၠုၚ် ဇရေၚ်ဒေသကျာ်ဣသိယဵုဂှ်ရ ကမၠောန်ဆေၚ်စသုၚ်၊ ကမၠောန်ခဒံဇၞူ ကေုာံ သၟာကမၠောန် (မယဵုယိုက်စ) တံ ကမၠောန်ကၟိတ်ပြေပြံၚ်ကၠုၚ် ဗၞတ်ထေက်ကြိုက်ရောၚ် ဂးရ။
“ကာလသဘၚ်ကျာ်သၞာံဏံဂှ် ဗွဲတၟေၚ်တှေ် တ္ၚဲကၟာတ်ဘာတံ၊ တ္ၚဲကၟာတ်ကမၠောန်ညးဍုၚ်ကွာန်တံဟီုတှေ် ညးကၠုၚ်လ္ၚောဝ်ကျာ်ဂၠိုၚ်မံၚ်ဏောၚ်။ ဟိုတ်ဂှ်ရ နကဵုညးဒေသတံ အခေါၚ်အရာကမၠောန် က္လေၚ်ခိုဟ်ကၠုၚ်နွံရ” သာ်ဝွံ ညးဒေသကျာ်ဣသိယဵုမွဲတၠ ဟီုရ။
ဇၟာပ်သၞာံ အခိၚ်မကၠောန်ဗဒှ်သဘၚ်ကျာ်ဣသိယဵု စနူဂိတုဝှ်ပေၚ် စဵုကဵုဂိတုပသာ်ပေၚ်ဂှ်ဝွံ အခိၚ်ကာလဓမ္မတာ (လၟေၚ်ဍာံ) ဂှ်မ္ဂး ဇၟာပ်သၞာံ ညးကၠုၚ်လ္ၚောဝ်ကျာ် ၜိုတ် (၃) ပြကောတိကိုဋ်နွံရောၚ် ဂွံတီကေတ် နူဂကောံဂေါပကထိၚ်ဒဝ်ဘဏ္ဍာရ။
