ရုၚ်(လဝက) တက်ကာဒ်ကောန်ဍုၚ် (မှတ်ပုံတၚ်) ဍုၚ်မုဟ်ဍုၚ်ဝွံ ခရေတ်စဩန်တေၚ်အိုတ်ရောၚ် ညးရေၚ်တၠုၚ်ကၠောန်ကာဒ်ကောန်ဍုၚ်တအ် ဟီုရ။
အခိၚ်လၟုဟ်ဝွံ သၟာကမၠောန်စဴနူကဵုဍုၚ်သေံ ကောန်ဍုၚ်မန် ဟွံဂွံကၠောန်တက်လဝ် ကာဒ်ကောန်ဍုၚ်တအ်ဗွဲမဂၠိုၚ် သွက်ဂွံဆက်အာယုက် ပါတ်သပတ် (သေံ) တုဲ စဴကၠုၚ်တက်ကၠောန်ဒၟံၚ် ကာဒ်ကောန်ဍုၚ် ပ္ဍဲဍုၚ်ရ။
“သၞာံဏံ ရဲဟွံဂွံတက်လဝ် (မှတ်ပုံတၚ်) စရၚ်သ္ၚိကၟိန် (အိမ်ထောၚ်စုစာရၚ်း) ဟွံမွဲလဝ်တအ်ဂှ် စဴကၠုၚ်ကၠောန်ဂၠိုၚ်ကွေံကွေံမွဲတဲ၊ အဵု ရဲစရၚ်သ္ၚိဟွံမွဲတအ်ဂှ် ဂွံဂွံကၠောန် ပါတ်သပတ်အတေံ (ဍုၚ်သေံ) ဂွံဂှ်တှေ် ကာတ်ကောန်ဍုၚ် (မှတ်ပုံတၚ်) နွံမှ ဂွံကၠောန်ဂွံတှေ် ရဲဗီုစဂှ် စဴကၠုၚ်ကၠောန်ဂၠိုၚ်မံၚ်၊ ရုၚ်ကၠောန်လိက်စရၚ်သ္ၚိ ကၠောန်ကာတ်ကောန်ဍုၚ် (မှတ်ပုံတၚ်) ဂှ်တှေ် ပ္ဍဲကဵုဍုၚ်မုဟ်ဍုၚ်ဂှ် ခရေတ်စဩန် တေၚ်အိုတ်ရ” သာ်ဝွံ ညးရေၚ်တၠုၚ် ကၠောန်လိက်စရၚ်သ္ၚိကၟိန် တက်ကာတ်ကောန်ဍုၚ် မွဲတၠ ဟီုရ။
ရုၚ် (လဝက) ကၠောန်ကာဒ်ကောန်ဍုၚ် ပ္ဍဲဍုၚ်မန်လၟုဟ်ဂှ် ဍုၚ်ရေဝ်၊ ဍုၚ်ဇြပ်ဗု၊ ဍုၚ်မုဟ်ဍုၚ် သၟာကမၠောန်မန် စဴနူဍုၚ်သေံတအ် ၜေတ်ဆိုအ်ဒၟံၚ် ပ္ဍဲကဵုရုၚ် (လဝက) တအ် အရိုဟ်ဒဒှ်တ္ၚဲနွံရ။
ပ္ဍဲကဵုရုၚ် (လဝက) ကၠောန်ကာဒ်ကောန်ဍုၚ် (မှတ်ပုံတၚ်) ဍုၚ်ဂမၠိုၚ်ဂှ်မ္ဂး ရုၚ်ပ္ဍဲဍုၚ်မုဟ်ဍုၚ်ဂှ် ခရေတ်စဩန်တေၚ်အိုတ်ရောၚ် ညးဆက်ဟီုထ္ၜးရ။
“ထပ်စုတ်စရၚ်မၞိဟ်တၟိ ပ္ဍဲစရၚ်သ္ၚိကၟိန် (အိမ်ထောၚ်စုစာရၚ်း) တှေ် ဍုၚ်ရေဝ်ကီု၊ ဍုၚ်ဇြပ်ဗုကီု၊ ဍုၚ်မုဟ်ဍုၚ်ကီုတှေ် ပ္ဍဲဂှ် ဍုၚ်မုဟ်ဍုၚ်ဂှ် ကေတ်တေၚ်အိုတ်ရ၊ ဍေံကေတ် (၁၀) ကိုဋ်ပြၚ်၊ (၁၁) ကိုဋ်၊ (၁၂) ကိုဋ်၊ (၁၃) ကိုဋ်၊ ဇှ်မှဂှ် အရေဝ်ဍေံတအ် ကြံၚ် မ္ၚိုဟ်ကွေံ ကၠောန်တှေ်ကၠောန် ဟွံကၠောန်တှေ် စဴအာ ဍေံဟီုအရေဝ်ပရေံကွေံကွေံ” သာ်ဝွံ ညးဆက်ဟီုရ။
ညးမကၠောန်ပၠုပ်စရၚ်သ္ၚိကၟိန်ကဵု ကၠောန်ကာဒ်ကောန်ဍုၚ် ပ္ဍဲဍုၚ်ရေဝ်ကီု၊ ပ္ဍဲဍုၚ်ဇြပ်ဗုတအ်ကီုဂှ် အိုတ်မံၚ် အကြာ (၆) ကိုဋ်၊ (၇) ကိုဋ်တုဲ ပ္ဍဲကဵုရုၚ် (လဝက) ဍုၚ်မုဟ်ဍုၚ်မွဲဟေၚ် အိုတ်မံၚ် (၁၁) ကိုဋ်၊ (၁၂) ကိုဋ် ဂၠိုၚ်အိုတ်ရ။
သၟာကမၠောန်ကောန်ဍုၚ်မန် ဗမာ နွံတန်တဴပ္ဍဲဍုၚ်သေံတအ်ဂှ် သွက်ဂွံဆက်အာယုက် လိက်အုပ် ပါတ်သပတ်ကီု၊ သွက်ဂွံကၠောန်လိက်အုပ်ကၠောန်ကမၠောန်မွဲမွဲသာ်ကီုမ္ဂး သ္ဒးကေတ်လိက်စရၚ်သ္ၚိကၟိန် (အိမ်ထောၚ်စု) ကာဒ်ကောန်ဍုၚ်ဂှ်တုဲ ညးဟွံဂွံစုတ်လဝ်စရၚ်သ္ၚိကၟိန်တအ်၊ ရဲဟွံဂွံကၠောန်တက်လဝ် ကာဒ်ကောန်ဍုၚ်တအ်ဂှ် ဒှ်ခက်ခုဲရ။
မၞိဟ်လ္ၚဵုမ္ဂး ဒှ်မၞိဟ်ပ္ဍဲဍုၚ်သေံ၊ အာကၠောန်ဒၟံၚ်ပ္ဍဲဍုၚ်သေံ နူဍောတ်ဍောတ်ဂှ်တုဲ အာယုက် (၁၅) သၞာံပြၚ်၊ (၂၀) သၞာံပြၚ်လေဝ် စရၚ်သ္ၚိကၟိန် ဟွံဂွံစုတ်လဝ်၊ ကာဒ်ကောန်ဍုၚ်ဟွံမွဲ နွံဟွံအောန်တုဲ နူကၠာအတး ဒဵုကဵုလၟုဟ်ဂှ် သၟာကမၠောန် နူဍုၚ်သေံတအ် အာကၠောန်ဒၟံၚ် စရၚ်သ္ၚိကၟိန် တက်ဒၟံၚ်ကာဒ်ကောန်ဍုၚ် ပ္ဍဲကဵုရုၚ် (လဝက) ဍုၚ်မန်တအ် မၞိဟ်ဂၠိုၚ်ဒၟံၚ်အရိုဟ်တ္ၚဲရောၚ် ဂွံတီကေတ်ရ။
