အခိင်ဒူရေန်တိတ်ဂၠိုင်ဂှ် ဒူရေန်နူဍုင်သေံလေဝ် လုပ်ဒၟံင်ကီုတုဲ ၚုဟ်ဒူရေန် စှ်ေအာကဝက်ကြပ်ဒှ်မံင်ရောင် ဆေင်ဖျာ သွံရာန်ဒူရေန် နူမုဟ်ဍုင်မွဲတၠ ဟီုရ။
နူကဵုဒူရေန်မွဲကဳလော ၁၅၀၀၀ ဂှ် လၟုဟ်မ္ဂး မွဲကဳလော အကြာ ၉၀၀၀ ဓဝ်တုဲ တော်ကဵုဗၞိက်ဗွဝ်ဖျာမ္ဂး ၚုဟ်ပရေံနူသၞာံ တုဲကၠုင်တေံရောင် သ္ဂးရ။
“ဒူရေန်နူဍုင်သေံလေဝ် တိတ်မံင်ဗွဲဟွံသာကီု၊ လၟုဟ်တှ်ေ ဒှ်အခိင်ဒူရေန်တိတ်ဂၠိုင်ကီု နူကဵု မွဲကဳလော ၁၅၀၀၀ ဂှ် လၟုဟ်သှ်ေမံင် မွဲကဳလော အကြာ ၉၀၀၀ ကဵု ၈၀၀၀ ဓဝ်ရ၊ တော်ကဵုၚုဟ်ဗၞိက်ဗွဝ်ဖျာသၞာံတုဲကၠုင်တေံကဵု လၟုဟ်တှ်ေ ၚုဟ်သှ်ေမံင် ၜိုတ်အဇာသၞာံတုဲကၠုင်တေံဓဝ်၊ ၚုဟ်ပရေံနူသၞာံတုဲကၠုင်တေံဏီ ဟီုဂွံ” တၠဆေင်ဖျာသွံရာန် ဒူရေန်ဂှ် ဟီု ရ။
ကပေါတ်ဗၞိက်ဗွဝ်ဖျာဂှ် မွဲသၞာံကဵုမွဲသၞာံဂှ် ဟိုတ်နူဩန်ဖောဝ်ဒၟံင်လၟေင်လၟေင်သၞာံတုဲ ၚုဟ်ကပေါတ်ဗၞိက်ဖျာနာနာတအ် လေဝ် က္ဍင်တိုန်ဒၟံင်နူလၟေင်လၟေင်သၞာံကီုလေဝ် ဗွဝ်ဖျာဒူရေန်ဂှ် ၚုဟ်ပံက်မံင်ၜိုတ်သၞာံတုဲကၠုင်ဂှ်တုဲ တၠကၠအ်ဒူရေန် တအ် တော်ဟွံကိတ်အိုတ်ရ။
“သၞာံဏံဂှ် ၚုဟ်ကမၠောန်ကီု ၚုဟ်ဝါဲကီုက္ဍင်ပဵုတိုန်မံင် နူသၞာံတုဲကၠုင်တေံ ၜါၜါဆဒှ်မံင်၊ ယဝ်ရတော်ကဵုၚုဟ်ကပေါတ် ဖျာတှ်ေ သၞာံတုဲကၠုင်တေံ မွဲကဳလော ၁၀၀၀၀ တှ်ေ သၞာံဏံ အောန်အိုတ် ၂၀၀၀၀ ဒးဒှ်ဏောင်၊ ဣဏအ်ဂှ် မွဲကဳလော မှ နွံအကြာ ၉၀၀၀ ဓဝ်တှ်ေ တၠကၠအ်ဒူရေန်တအ် ယာဍိုပ်ဟွံမာန်ရ” နာဲထောန်တေန် တၠကၠအ်ဒူရေန် နူဍုင်ဇြပ်ဗုဂှ် ဟီု ရ။
အခိင်ဒူရေန်တိတ်ဂၠိုင်ဏံဂှ် ဒူရေန်နူဍုင်သေံလေဝ် ဇက်တိတ်ဒၟံင်နကဵုကွဳစက်ဂၠိုင်ကဵုကွဳစက်ကီုဂှ်တုဲ ဟိုတ်နူဂှ်ရ ဒူရေန် ပ္ဍဲဍုင်ဂှ် ၚုဟ်စှ်ေအာသၟဝ်မွဲလက်ရောင်ဂှ်လေဝ် တၠကၠအ်ဂှ်ဆက်ဟီုရ။
ဂိတုတုဲကၠုင်ဏံမ္ဂး ဒူရေန်ဆက်မတ်ဂကူခိုဟ်မွဲကဳလောဂှ်ဂွံၚုဟ် ၂၇၀၀၀ တုဲ ဒူရေန်ဂကူဓမ္မတာဂှ် မွဲကဳလော ဂွံအ ကြာ ၁၅၀၀၀ ကီုလေဝ် လၟုဟ်မ္ဂး ဒူရေန်ဆက်မတ်ဂကူခိုဟ်ဂှ်မှ ရဲသွံရာန်တအ် ဗက်ရာန်မံင် မွဲကဳလော အကြာ ၉၀၀၀ ဓဝ်ရ။
ပ္ဍဲဍုင်မန်ဝွံ ဒူရေန်ဆက်မတ်မ္ဂး ပွိုင်ဍုင်မုဟ်ဍုင်တိတ်ဂၠိုင်အိုတ်တုဲ ဒူရေန်မအရိုင်မ္ဂး ပွိုင်ဍုင်ရေဝ်ဂှ် ဒှ်ဒေသ ဒူရေန် တိတ်ဂၠိုင်အိုတ်ရောင် ဂွံတီကေတ်ရ။
