ပ္ဍဲကွာန်အာန်ဖဂျဳ၊ ကအ်ကြိက်သၠုၚ်ကျာ၊ တွဵုရးကရေၚ်ဂှ်ဝွံ နူဒပ်ကမ္မယှေန်ပၞာန်တံ ဗ္တိုက်ကဵုစက်ဗရုသာဲဂှ်ရ ညးဗြဴအာယုက်ဇၞော်မွဲတၠကဵု ကောန်ၚာ်မွဲတၠ ဒးချိုတ်အာတုဲ ဒးအာဘဲဝပ် (၂) တၠနွံဂှ် ဂွံတီကေတ်ရ။

အပ္ဍဲဒေသတိဍာ်ဂှ်ဝွံ ဟွံဒှ်ပေဲါဗ္တိုက်မွဲသာ် ဒပ်ကမ္မယှေန်ပၞာန် ဖျေံလဝ်ဒပ် ပ္ဍဲကွာန် (ကြောၚ်လျှာကုန်း) ကေုာံ ကွာန် (ကမိုၚ်ကုန်း) တံ ပ္ဍဲဂိတုအေဗရဴ (၂၉)၊ အခိၚ်တ္ၚဲစေၚ် ၜိုတ် (၂) နာဍဳပြၚ်ဂှ် ပန်ဗ္တိုက်ထောံဖျေံဗမ်ကဵုစက်ဗရုသာဲ (၂) မ ပ္ဍဲကွာန်အာန်ဖဂျဳရ။

ဟိုတ်နူဒတုံခတိုဟ်အာ ပ္ဍဲဗဒဲါသ္ၚိဒၟံၚ်မနွံအပ္ဍဲကွာန်ဂှ်ရ ညးဗြဴအာယုက် (၆၃) သၞာံမွဲတၠကဵု ကောန်ၚာ် (၇) သၞာံမွဲတၠ ဒးချိုတ်အာတုဲ ကောန်ၚာ်နွံမ္ၚးသ္ၚိၜါတၠဂှ်လေဝ် ဒးအာဘဲဝပ်သ္ကာတ်မြဟ်ကီု ညးဗြဴစုက်လုက်ကဵု ဂကောံသ္ၚိကၟိန်မွဲတၠဂှ် ဟီုရ။

“ကောန်ၚာ်တံ ဝေၚ်မံၚ်မ္ၚးသ္ၚိရ။ ဒရုၚ်ကၠုၚ်မံၚ်ဂှ်ဆဵုတုဲတှေ် အတိုၚ်သဘာဝကောန်ၚာ်ရ တၟေၚ်မံၚ်ညိတှေ် ဗက်ကျောဝ်ဗဵုရ။ အေဇှ်ဂှ် ဍေံတံ ထောံဖျေံမွဲတဲဓဝ်ရ။ ဍေံတံဂှ်တှေ် ကောန်ၚာ်ဟာ၊ သၞဟာဂှ် ဟွံတီရပုဟ်ဟာ။ မၞိဟ်ဇၞော်နွံသ္ကဲဂှ်မွဲတၠ တုဲအာလွာဲဂှ်ရ။ ကောန်ၚာ်မွဲတၠဂှ်တှေ် ကၠောန်သ္ပမံၚ် သွက်ဂွံပလံၚ်ရုၚ်ဂဥုဲဘာအၚ်ဏီရ။ ဟွံဂတာပ်ပုဟ်။ ချိုတ်အာပ္ဍဲဂၠံၚ်ရ။ ပိုဲတံလေဝ် ပဲါနူလရိုအ်တုဲ မုပဟွံမာန်ပုဟ်” သာ်ဝွံ ဟီုရ။

ဗွဲကြဴနူပန်ဗ္တိုက်တုဲဂှ်ဝွံ ညးဒေသကွာန်အာန်ဖဂျဳ က္လေၚ်စိုပ်ကၠုၚ် နူဒၞာဲပဲါဒဴဘဲပၞာန် ခြာဟွံလအ်ဏီဂှ် ဒးထပ်ဂြိပ်ပဲါဒဴဒၞာဲဗၠးဘဲပၠန်တုဲ အကာဲအရာ သ္ဂောံလုပ်စိုပ်ဒၟံၚ်ပ္ဍဲကွာန်ဂှ် ဒှ်ဟွံမာန်ဏီ ဂးရ။

ဒပ်ကမ္မယှေန်ပၞာန်တံဝွံ ဗွဲကြဴနူလုပ်စိုပ်ဖျေံဒပ် အကြာကွာန် (ကမိုၚ်ကုန်း) ကဵု (ကြောၚ်လျှာကုန်း) တုဲဂှ် လုပ်ထ္ပက်ကရောၚ်ပၞာန် လ္ပာ်ကွာန်ပွဳဗွိုၚ်ဗဒဲါဂှ် ဟွံမွဲကီုလေဝ် လုပ်စိုပ်ပန်ဗ္တိုက်မံၚ်ကဵု လွဟ်ဇၞော်၊ စက်ဗရုသာဲ မွဲနှေံမွဲနှေံနွံရောၚ် ညးဒေသတံ ဟီုရ။

“ကောန်ကွာန်တံ ဗီုလဵုဂွံမံၚ်စံၚ်ဂှ် ဟွံတီရပုဟ်။ ဒှ်ပေဲါဗ္တိုက်လေဝ် ဟွံသေၚ်ပုဟ်။ ဂေတ်မံၚ်ကၚ်ကဵု ဒရုၚ်တုဲ ဆလတှေ်လေဝ် ဗီုကဵုဟွံထေၚ်လဝ်ဂှ် ပန်မံၚ်ရ။ ဆလတှေ် က္လေၚ်စဴအာရ။ ဗီုကဵုဒၞာဲသ္ကဲကွာန်ဂှ်လေဝ် ပန်မံၚ်လွဟ်ဇၞော် မွဲနှေံမွဲနှေံရ။ ဗီုကဵုပန်ဆဆဵုရ။ ဆလ ကောန်ကွာန်တံဂြိပ်ဂတာပ်တှေ် ဒးသ္ၚိရ။ ဂြိပ်ဟွံဂတာပ်တှေ် ဒးရ။ အေ အကာဲအရာနွံမံၚ်ဗီုဂှ်” သာ်ဝွံ ညးဒေသ (သာယာကုန်း) မွဲတၠ ဟီုရ။

ဒပ်ကမ္မယှေန်ပၞာန် ပ္ဍဲ (ကမိုၚ်ကုန်း) တံဝွံ နူကဵုပေဲါဗ္တိုက်ဂၠံၚ်အာယှတုဲကၠုၚ်တေံရ လုပ်စိုပ်ဖျေံလဝ်ဒပ်အပ္ဍဲကွာန်တုဲ နူဂှ်မွဲတဆံၚ် ပါ်ဒပ်တုဲ လုပ်စိုပ်ကၠုၚ် ကွာန် (ကြောၚ်လျှာကုန်း) အပ္ဍဲတ္ၚဲတုဲကၠုၚ်အကြာဏံရ။

ဒပ်ကမ္မယှေန်ပၞာန်တံဝွံ ပ္ဍဲဂိတုမာတ် (၃၀) တုဲကၠုၚ်ဏံ အခိၚ်နူဂယးဂှ် ထောံဖျေံဗမ်ကဵုစက်ဗရုသာဲ ပ္ဍဲကွာန် (သာယာကုန်း)၊ ပွိုၚ်ဍုၚ်ကအ်ကြိက်သၠုၚ်ကျာ၊ တွဵုရးကရေၚ်တုဲ သ္ၚိဒၟံၚ်ဂမၠိုၚ် လီုလာ်အာဏီရ။

နူဂိတုသေပ်တေမ်ဗာ၊ သၞာံ (၂၀၂၅) တုဲကၠုၚ်တေံရ ကမ္မယှေန်ပၞာန်တံ ထိၚ်ဒဝ်သ္ကုတ်ဂၠံၚ်အာယှ ကအ်ကြိက် – ဗြဝတဳမာန်တုဲဂှ် ဖျေံဒပ် ပ္ဍဲကွာန်လ္ၚဵု မၞုံဒေသကအ်ကြိက်သၠုၚ်ကျာဂှ်တုဲ ပန်မံၚ်ဆဆဵုရ။

တုဲပၠန် ဒၞာဲဒပ်ပံၚ်ကောံပၠန်ဂတး ဖျေံလဝ်ဒပ် ပ္ဍဲဒေသကအ်ကြိက်သၠုၚ်ကျာဂှ်လေဝ် ကမ္မယှေန်ပၞာန်တံ လုပ်စိုပ်ထ္ပက်မံၚ်ကရောၚ်ပၞာန်ဂှ်ရ ဒှ်မံၚ်ပေဲါဗ္တိုက်ကြပ်ဇၟာပ်တ္ၚဲရောၚ် ဂွံတီကေတ် နူဂကောံပၠန်ဂတးတံရ။