ကမ္မတဳလိက်ပတ်ယေန်သၞာၚ်မန်ဍုၚ်လ္ဂုၚ် က္ဍိုက်က္ဍိုပ်ပံက်တန်ဗ္တောန်ဇိၚ်စက် ကယျိုၚ်ကယျဝ်အခိုက်ကၞာယေန်သၞာၚ်မန်တုဲ ဗ္တောန်အာနကဵုၚုဟ်မးသၟးသၟးရောၚ် ဂွံတီကတ် နူညးတာလျိုၚ်ကမ္မတဳတံရ။
အကြာပြံၚ်လှာဲဗွိုက်လ္တက်ကၠုၚ် ကယျိုၚ်ကယျဝ်မန်ဂတာပ်ခေတ်ဏံဂှ် ဗီုပြၚ်ကယျိုၚ်ကယျဝ်မန်တြေံတြဟ် အောန်စှေ် ကၠေံအာမာန်ဂှ်ရ သွက်ဂွံထိၚ်ဒဝ်ဗွိုက်လ္တက် ကယျိုၚ်ကယျဝ်အခိုက်ကၞာယေန်သၞာၚ် ကေုာံ သ္ဂောံထိၚ်ဒဝ်လက်သန်သၚ်္ကေတ ကယျိုၚ်ကယျဝ်အခိုက်ကၞာယေန်သၞာၚ်မန်မာန်တုဲ ပံက်တန်ဗ္တောန်ရောၚ် ဥက္ကဌကမ္မတဳ ဒံက်တာမေန်ခေန်ဇြုၚ် ဟီုရ။
“တန်ဗ္တောန်ဏံဂှ် ဗီုပြၚ်ဂွံဇိၚ် ဗွိုၚ်လ္တက်မန် တမ်မူလတြေံ ကယျိုၚ်မၞိဟ်တြုံ၊ ကယျိုၚ်မၞိဟ်ဗြဴဂှ် ဗ္တောန်အာကဵု အဓိကဏောၚ်။ တုဲတှေ် ကယျိုၚ်မန်လှေ်တောဲ (နှစ်ပါးတွဲ) ဂှ်လေဝ် သွက်ဂွံဗ္တောန်ကဵုနွံရ။ ဗီုနဲကဲဂွံဇိၚ် ဗ္တိုက်လ္တက်ကယျိုၚ်ကယျဝ်မန် ညံၚ်ဟွံဂွံကၠေံအာဂှ် နကဵုတၚ်ရန်တၟံ ပိုဲတံမိက်ဂွံထိၚ်ဒဝ်တုဲ ပံက်ဏာတန်ဗ္တောန်ဏံ အလန်ကၠာအိုတ်ရ။ ၚုဟ်တန်ဗ္တောန်လေဝ် ဟွံကေတ်ပုဟ်။ ဗ္တောန်အာကဵုမးမးရ” သာ်ဝွံ ဟီုရ။
ဟိုတ်ဂှ်ရ စပ္တံနူဂိတုဂျောန် (၆) စဵုကဵုဂိတုဂျူလာၚ် (၂၆) တေံ ပ္ဍဲကဵုဇြပ်သဘၚ်ဓရ် မနွံဒၞာဲဂၠံၚ်ကျာ်လ္ဂုၚ်၊ လ္ပာ်မုက်သၠုၚ်ကျာကျာ်လ္ဂုၚ်ဂှ် လၟေၚ်တ္ၚဲသ္ၚိသဝ်၊ တ္ၚဲအဒိုတ် ဒုၚ်တဲကောန်တန်ဗ္တောန် (၂၀) တၠတုဲ ပံက်ဗ္တောန်အာ နကဵုၚုဟ်မးသၟးသၟးရောၚ် ဥက္ကဌကမ္မတဳ ဒံက်တာမေန်ခေန်ဇြုၚ် ဟီုရ။
ညးမိက်ဂွံတိုန်တန်ဗ္တောန်ပံက်လၟုဟ်ဏံဂှ် ဒးလေပ်လဝ် သဇိုၚ်ပညာဇိၚ်စက်တုဲ စၟတ်တ္ၚဲ (၁၅/၆/၂၀၂၆) ဏံ စွံတ္ၚဲလက္ကရဴအိုတ်တုဲ ဒးဆက်စၠောံပၠောပ်စရၚ်ကဵု ကမ္မတဳလိက်ပတ်ယေန်သၞာၚ်မန်ဍုၚ်လ္ဂုၚ်ရောၚ် ညးဆက်ဟီုလဝ်ရ။
ကယျိုၚ်ကယျဝ်အခိုက်ကၞာယေန်သၞာၚ်မန်ဝွံ ဟိုတ်နူဒှ်သၚ်္ကေတဂကူကဵု အာဲကၟာဲယေန်သၞာၚ်ဂှ်ရ နကဵုသၟတ်တၞောဝ်ဒတောဝ်တၟိတံ သွက်ဂွံထိၚ်ဒဝ် စွံၚုဟ်မးဂှ်လေဝ် နွံပၟိက်ဒၟံၚ်ရောၚ် ဟီုဂးဖ္တိုက်ဖၟောဝ်လဝ်ရ။
တုဲပၠန် ဗီုပြၚ် (ဒဳဇြာၚ်) ပြံၚ်လှာဲကၠုၚ်ဗဗွဲခေတ်ကီုလေဝ် ဗီုပြၚ်အခိုက်ကၞာတမ်မူလ၊ ပရေၚ်ပလေဝ်လဟဵု ကေုာံ အဓိပ္ပဲါဂမၠိုၚ် ညံၚ်ဟွံဂွံကၠေံကၠက်အာဂှ် ဇၟာပ်ဂကူမန် သွက်ဂွံဘိုၚ်ထိၚ်ဒဝ်အာဂှ် ကိစ္စဇၞော်မံၚ်ရောၚ် ဒံက်တာမေန်ခေန်ဇြုၚ် ဆက်ဟီုလဝ်ရ။
“ဒၞာဲလဵုဟွံဟီု အခိုက်ကၞာယေန်သၞာၚ်ဇကုဇေတ်ဇေတ်ဂှ် ဒးဆက်ထိၚ်ဒဝ်အာဏောၚ်။ လၟုဟ်ဏံ အတိုၚ်ပိုဲတံသီုညးဖအိုတ်ဆဵုလဝ်ဂှ်ရ စာ်စ္ဍးနူဗီုပြၚ်တမ်မူလတြေံ ကယျိုၚ်ကယျဝ်အခိုက်ကၞာမန်တုဲ ကၠောန်သ္ပဇိၚ်မံၚ်ရ။ တၚ်ဏံဂှ်တှေ် အာဂတဏံ ဗီုပြၚ်ကယျိုၚ်ကယျဝ်အခိုက်ကၞာမန်ဇေတ်ဇေတ်တံ ကၠေံအာမာန်ရ။ ကၠာဟွံဂွံကၠေံကၠက်ဏီဂှ်တှေ် ဇၟာပ်ဂကူမန် ဒးဆက်ထိၚ်ဒဝ်အာဏောၚ်” သာ်ဝွံ ဟီုရ။
ကမ္မတဳလိက်ပတ်ယေန်သၞာၚ်မန်ဍုၚ်လ္ဂုၚ်ဝွံ လိက်ပတ်မန်၊ အရေဝ်ဘာသာ၊ အခိုက်ကၞာယေန်သၞာၚ် ကေုာံ အာဲကၟာဲအနုပညာဂမၠိုၚ် ညံၚ်ဟွံဂွံကၠေံကၠက်အာဂှ် ဇၟာပ်သၞာံ ချဳဓရာၚ်ဒၟံၚ် ဆေၚ်စပ်ကုပရေၚ်ကဵုပညာ၊ ယေန်သၞာၚ်အခိုက်ကၞာ ကေုာံ ပရေၚ်ကေၚ်ကာသၟတ်တံနွံရ။
