သွက်သ္ဂောံဂွံအခေါၚ်ဗၠးၜးနူယိုက်ဂၠေၚ်ပၞာန်ဒပ်ပၞာန် ကေုာံ အခေါၚ်ဂွံဒုၚ်စသိုၚ်ဂုန်ဖဵုပိုန်ဒြပ်တၞဟ်ဟ်တုဲ ညးဒေသ အဝဲလဒေါဝ်၊ အဝဲသၟတ် မၞုံအပ္ဍဲပွိုၚ်ဍုၚ်လိုၚ်ဗၠဲ (လှိုၚ်းဘွဲ) ကဵု ပွိုၚ်ဍုၚ်ဘာအၚ်၊ တွဵုရးကရေၚ်တံ ညးလုပ်စိုပ်ယိုက်ဂၠေၚ်တာလျိုၚ် ပ္ဍဲဒပ်မၚ်ပယျဵုကရေၚ် BGF ဂှ် ဂၠိုၚ်ကၠုၚ်မံၚ်ရောၚ် အတိုၚ်ညးဒေသတံ ဟီုဂးလဝ်ဂှ် ဂွံတီကေတ်ရ။
ပ္ဍဲကဵုပွိုၚ်ဍုၚ်လိုၚ်ဗၠဲ ကေုာံ ဘာအၚ် မကော်ညးစၞးယိုက်ဂၠေၚ်ပၞာန်ဝါတ်ဂါတ်ကၠုၚ်ဂှ်ဝွံ သၟတ်ဒေသဂမၠိုၚ်တံ နကဵုနဲဇဳ ဒးဒုၚ်ပလံၚ်ဏာဒၟံၚ် ဇရေၚ်တန်ဗ္တောန်ပၞာန်တေံရ။
ဟိုတ်ဂှ်ရ သၟတ်ကရေၚ်၊ မန် ကေုာံ ပအိုဝ် တၞီလုပ်အဝဲယိုက်ဂၠေၚ်ပၞာန် ဒၟံၚ်တန်တဴမံၚ် အပ္ဍဲပွိုၚ်ဍုၚ်တံဂှ်ဝွံ ကေတ်အဆက်စၠောံ ကုဂကောံ BGF တိုန်ဘာပၞာန်တုဲ လုပ်စိုပ်ယိုက်ဂၠေၚ်တာလျိုၚ်ဂၠိုၚ်ကၠုၚ်မံၚ်ရောၚ် ညးစုက်လုက်ကဵု သဂံၚ် BGF မွဲတၠ ဟီုရ။
“အကြာကြာဏံ မၞိဟ်လုပ်စိုပ် ပ္ဍဲဂကောံ BGF ဂၠိုၚ်ကၠုၚ်ရ။ မၞိဟ်နွံပ္ဍဲသေံလေဝ် စဴကၠုၚ်တုဲ လုပ်ဂကောံ BGF ရ။ သ္ပကောန်ဂကောံဍေံတံတှေ် ဟွံဒးယိုက်ဂၠေၚ်ပၞာန် ပ္ဍဲဒပ်ပၞာန်ရပုဟ်။ တုဲတှေ် အခေါၚ်အရာလေဝ်ဂၠိုၚ်ရ။ မၞိဟ်မွဲတှေ် မွဲဂိတု အောန်အိုတ် ကဵု (၅) ကိုဋ်ရ။ မုလေဝ် ဟွံဒးကၠောန်ပုဟ်” သာ်ဝွံ ညးဟီုရ။
နကဵု BGF တံဝွံ ပ္ဍဲကဵုတမ်ဒပ်တိဍာ်ညးတံထိၚ်ဒဝ်ဂှ် (၃) ဂိတုမွဲဝါ ပံက်ဒၟံၚ်ဘာတန်ဗ္တောန်ပၞာန်သဇိုၚ်တုဲ မွဲလၟေၚ်မ္ဂး ကောန်သဂံၚ် (၁၀၀) ပြၚ်နွံရောၚ် ဂးရ။
ညးတိုန်စိုပ်လဝ်တန်ဗ္တောန်ပၞာန် BGF တံဝွံ သၟာၚ်နူဟွံဒးယိုက်ဂၠေၚ်ပၞာန် ပ္ဍဲဂကောံကမ္မယှေန်ပၞာန်ဂှ်မ္ဂး ကဵုလဝ်အခေါၚ်ရပ်လွဟ်တုဲ ကမၠောန်ဒမၠုက်ဟွံဗဗွဲဓဝ် ဂမၠိုၚ်ဂှ်လေဝ် ကဵုလဝ်အခေါၚ်ကၠောန် ဗွဲမလောဲသွာရောၚ် ညးဒေသဘာအၚ်မွဲတၠ ဟီုရ။
“လ္ပာ်ကွာန်ဘာအၚ်ဏံဟီုတှေ် မၞိဟ်ဓမ္မတာကြပ်ဟွံမွဲရ။ သီုဖအိုတ်ဂှ် ဒှ်မံၚ်ကောန်ဂကောံ BGF တံရ။ ပ္ဍဲကဵုကွာန်ဂှ်တှေ် ရပ်လဝ်လွဟ်ဂၠေံတုဲ ဂေတ်မံၚ်ကွာန်ရ။ ၜိုတ်ကရေၚ်ဂှ် ပဟီုရလေဝ်။ လၟုဟ်ဏံ မန်ဇေတ်ဇေတ်တံလေဝ် ဒှ်မံၚ်ကောန်ဂကောံ BGF ရ” သာ်ဝွံ ညးဒေသလ္တူဂှ် ဟီုရ။
ညးတိုန်တန်ဗ္တောန်တုဲတံ ကၠောန်မံၚ်ကမၠောန်ဒမၠုက်ဟွံဗဗွဲဓဝ်နွံကီု၊ ပ္ဍဲသၞေဟ်ကၚ်စၟဳစၟတ် မပ္တံဒၞာဲသၞေဟ်ဂဒိုအ်၊ ဒဒန်၊ ဂၠံၚ်ဂှ်လေဝ် ဂွံဒုၚ်စဖဵု နဒဒှ်ညးမၚ်သၞေဟ်ကၚ်နွံရောၚ် ဂးရ။
ဒပ်မၚ်ပယျဵုကရေၚ် BGF ဝွံ ပ္ဍဲဒေသပယျဵုဗြဝတဳ၊ တွဵုရးကရေၚ်ကီု သီုတိဍာ်ဒပ် (၄) ဒေသကဵု တမ်ဒပ် (၁၃) တမ်ဒပ်ဂှ် ဇြဟတ်ဒပ် လၟိဟ်ကဵုဠက်နွံတုဲ ပ္ဍဲကဵုပဋိပက္ခ ပရေၚ်ပၞာန်ဂှ်မ္ဂး ဒှ်ဂကောံ ကဵုပၞာန်ရီုကုကရောၚ်ပၞာန်ကမ္မယှေန်ပၞာန်၊ ထ္ၜးဂၠံၚ်ဍာန် ကေုာံ ပလံၚ်ဗစိုပ်လွဟ်လနက်ဇွောံမရ။
ပၞောဝ်ကဵုတိဍာ်ဒပ် (၄) ဒေသဂှ်မ္ဂး မဟာဒပ် (၂) ကေုာံ မဟာဒပ် (၃) သ္ကိုပ်ဗိုလ်ဇၞော်သဝ်ချေဝ်တူ က္ဍိုက်က္ဍိုပ်ဂှ်ဝွံ ပ္ဍဲသၞာံ (၂၀၂၆) မံက်ဏံ ဒပ်သၟဝ်တဲဂမၠိုၚ်ဂှ် စဵုကဵုတဆိပ် KNA (ဘက်တံဆိပ်) ပြံၚ်လှာဲကၠုၚ်လဝ်နွံရ။
