ဂိတုမေ စၟတ်တ္ၚဲ (၆) နူတနေံဏအ်ဝွံ ပ္ဍဲကၟိန်ဍုၚ်သေံ ခရိုၚ်သမုတ်ပရာကာန်ဂှ် သၟတ်ဗြဴ သၟာကမၠောန်ကောန်ဍုၚ်မန်ဗၟာမွဲတၠ ဟိုတ်နူအသိၚ်ဘဲအန္တရာဲ ပသဲတက်ဒးတုဲ လမျီုအိုတ် ဒးချိုတ်အာဂှ် ဂွံတီကေတ်ရ။
သၟတ်ဗြဴဏအ်ဝွံ မၞုံယၟု မိခိုၚ်တဇြေန်ဝေန် အာယုက် (၂၂) သၞာံ ဇာတိနူပွိုၚ်ဍုၚ်ကျာ်ကဝ်၊ ခရိုၚ်သဓီု၊ အရာပ်သယျိတ်တဝ်၊ တွဵုရးဍုၚ်မန်တုဲ သၟတ်ဗြဴဏအ် လုပ်ကၠောန်မံၚ်ကမၠောန် ပ္ဍဲရုၚ်စက်ကၠောန်ပသဲ ခရိုၚ်သမုတ်ပရာကာန်၊ ဍုၚ်ၜါန်ဖဳဂှ် ဒှ်ညးရပ်လဝ် လိက်အုပ်သက်သဳ (CI) သၟာကမၠောန်လုပ်ကဵုသၞောဝ်မွဲတၠတုဲနူတနေံဏအ် အခိၚ် (၁) ကဝက်ဂှ် အန္တရာဲမကၠုၚ်စိုပ် ဟိုတ်နူပသဲတက်ဒးပ္ဍဲဇကု ဒးအာလဝ်ဘဲဝပ် ဗွဲမသကာတ်မြဟ်တုဲ လမျီုအိုတ် ချိုတ်အာဒၞါဲဂှ်ရ။
သၟတ်ဗြဴဒးချိုတ်အာဏအ်ဝွံ ဟိုတ်နူကဵု မသကလောကောဒေံ အဆက်နွံအောန်ဂှ်ရ သ္ဂောံဂိုၚ်ကေတ်ဏာဇွဏအ်မာန်ဂှ် သၟာကမၠောန်ကောန်ဍုၚ်မန်ဗၟာ ညးမၞုံကြပ်ကဵု သၟတ်ဗြဴဏအ် ဂၠိုက်ဂၠာဲကေတ်အဆက် အာတ်ရီုဗၚ် ကုဂကောံရီုဗၚ်သၟာကမၠောန် ကောန်ဍုၚ်ဗၟာတအ်ရ။
ဒှ်သာ်ဂှ်ရ သၟာကမၠောန်ကောန်ဍုၚ်မန်ဗၟာ ညးမၞုံကြပ်ကဵုသၟတ်ဗြဴဏအ် ဂွံအဆက်ကဵု ဂကောံရီုဗၚ်သၟာကမၠောန်ကောန်ဍုၚ်ဗၟာ WAG တအ်တုဲ ဇွသၟတ်ဗြဴဂှ် ညးတအ်ပလံၚ်ဏာ ရုၚ်ဂဥုဲၜါန်ဖဳတေံတုဲ ဆက်ကၠောန်သ္ပစၟဳစၟတ်မံၚ်ရ။
သၟတ်ဗြဴဏအ် ဒးချိုတ်အာတုဲဂှ် လ္ပါ်ဂကောံရီုဗၚ်သၟာကမၠောန်ကောန်ဍုၚ်ဗၟာတအ်ကဵု ညးမဒှ်တၠကမၠောန်သေဌဳရုၚ်စက်ဂှ် ကေတ်လျိုၚ်တုဲ ဆက်ရေၚ်တၠုၚ်ကဵုမံၚ်ရီုဗၚ် ကုသၟတ်ဗြဴ ဒးချိုတ်အာဂှ်နွံရောၚ် ဂွံတီကေတ်ရ။
