က္ဍိုပ်သ္ကိုပ်ပၞာန်ကွာန် ဥူဖိုဝ်ချေတ် ကွာန် (သဗြုချောၚ်း)၊ ပွိုၚ်ဍုၚ်ပံၚ်ဂှ် နူဂကောံရပ်လွဟ်မွဲဂကောံ ရပ်ၜုၚ်တက်ကော်ဏာတုဲ ကၠေံဒၟံၚ်ရောၚ် ဂွံတီကေတ် နူတမ်ရိုဟ်ပရိုၚ်ပံၚ်ရ။
နူတနေံဏံ ဂိတုမေ (၂၈) ၊ အခိၚ်နူဂယး ၜိုတ် (၈း၃၀) နာဍဳဂှ်ဝွံ ဥူဖိုဝ်ချေတ် အာယုက် (၆၅) သၞာံ၊ ဂဇံဒၟံၚ် ပ္ဍဲဇြပ်လံၚ်ပိဏ္ဍပါတ်ၜိုပ်ထဝ်၊ ဗဒဲါဂၠံၚ်တတ်ဍာန်ကွဳပၟတ်တိဍာ် (၇) ၊ ကွာန် (သဗြုချောၚ်း) ဂှ် နူကဵုမၞိဟ် (၆) တၠ စိုပ်ကၠုၚ်ကဵုကွဳလိုန်ဓာတ်/ကွဳစက်ဂှ် ၜုၚ်တက်ဏာ ဆီဇွောဝ်တုဲ ကော်ဖ္ဍိုက်ဏာ လ္တူကွဳစက်ရ။
တုဲပၠန် အာစိုပ်လ္ပာ်သ္ၚိဒၟံၚ် ဥူဖိုဝ်ချေတ်တုဲ သီုကေတ်ဏာ လွဟ်ဂၠိၚ်မွဲဇကိုအ်ကီုရောၚ် ညးဒေသမွဲတၠ ဟီုရ။
“မၞိဟ်လ္တူကာဂှ် ခါတ်ကသအ်ပ္ဍဲတဲညးရ။ လွဟ်လေဝ် ပါမံၚ်ရ။ မၞိဟ်နွံမံၚ်မွဲကရောံကဵု ဥူဖိုဝ်ချေတ်မွဲတၠဂှ် မုဍေံတံဟွံပပုဟ်။ ဥူဖိုဝ်ချေတ်ဂှ်တှေ် ၜုၚ်တက်ဏာလဝ်ရ။ နကဵုဆီဇွောဝ်ဇွောဝ်ဂှ် ကော်ဏာလ္တူကာရ။ သ္ၚိဥူဖိုဝ်ချေတ်ဂှ်တှေ် သ္ၚောဲနူကဵုဒၞာဲရပ်ဏာဂှ် မွဲဖာလုၚ်ရ။ တက်ပလီုပါၚ်တြၚ်တုဲ ကေတ်ဏာလွဟ်ဂၠိၚ်ၚ်မွဲဇကိုအ်ရ” သာ်ဝွံ ညးဟီုရ။
ဂကောံရပ်လွဟ်လဵု ရပ်ဏာဂှ် ဟွံဂွံတီကေတ်တုဲ ပရိုၚ်က္ဍိုပ်သ္ကိုပ်ပၞာန်ကွာန်ဂှ်လေဝ် ဟွံဂွံမိၚ်ကီု ညးဆက်ဟီုလဝ်ရ။
ဂကောံပၞာန်ကွာန်တံဂှ် နူကဵုဒပ်ပၞာန် ဗီုဒးစိုတ်ခါန်ကၞက်လဝ်တုဲ ဟွံကဵုပရေၚ်စဵုဒၞာမွဲသာ် ဂကောံပၞာန်ကွာန်ဇြဟတ်ဍိုန်လျမံၚ်တံဂှ် စွံပွန်တုဲ ဒးဒုၚ်ရပ်မံၚ်ရောၚ် ညးဒေသပံၚ်တံ ဟီုဂးသ္ၚဳဂၠိပ်လဝ်ရ။
“ယၟုပရေံပရေံဂှ်ဟၟဲပုဟ်။ ၜိုဟ်ဟ်သြိုဟ်ဟ်ရ။ ဆဂး ဒှ်မံၚ်က္ဍိုပ်သ္ကိုပ်ပၞာန်ကွာန်တှေ် အလဵုအသဳစကာတုဲ ကဵုပရေၚ်စဵုဒၞာဟွံမာန်ဂှ်ရ ဂကောံပၞာန်ကွာန်ဇြဟတ်ဍိုန်လျတံ ဒးဒုၚ်မံၚ်ရ။ ညးဂှ် ကၠောန်မံၚ်ကမၠောန်ရ။ သၞာံတုဲကၠုၚ်ဏံ သ္ကိုပ်အုပ်ဓုပ်ကွာန်ဂှ်လေဝ် ဒးဒုၚ်ပန်ဂစိုတ်လဝ်တုဲဣရ” သာ်ဝွံ ညးဆက်ဟီုရ။
အခိၚ်ကၠာတေံ သ္ၚိဒၟံၚ်ဥူဖိုဝ်ချေတ်ဂှ် ဂကောံရပ်လွဟ်တံ ကေၚ်စိုပ်လဝ်တုဲ နူကဵုကတဵုဒှ် ပရေၚ်ပန်ပှော်ၜါလ္ပာ်ဂှ် ဥူဖိုဝ်ချေတ် ဗၠးကၠုၚ်လဝ်ဏီရ။
ပ္ဍဲဒေသမန်ဝွံ ကောန်ဂကောံပၞာန်ကွာန်တံ ဒးဒုၚ်ပန်ဂစိုတ်ဒၟံၚ်အဆက်ဆက်တုဲ ဂိတုမေ စၟတ်တ္ၚဲ (၂၅) တုဲကၠုၚ်ဏံ အခိၚ်ဗ္တံ ၜိုတ် (၈) နာဍဳဂှ် က္ဍိုပ်သ္ကိုပ်ပၞာန်ကွာန် ဥူကျဝ်မေန် အာယုက် (၅၆) သၞာံ၊ ဒၟံၚ်တန်တဴမံၚ် အရာပ် (ဂုံညှၚ်းတန်း)၊ ဍုၚ်ကၟာဝက်၊ ပွိုၚ်ဍုၚ်မုဟ်ဍုၚ်ဂှ်လေဝ် ဒးဒုၚ်ပန်ကဵုလွဟ်တုဲ ချိုတ်အာလဝ်ကီုရောၚ် ဂွံတီကေတ်ရ။
