ပ္ဍဲကဵုလ္ပာ်ကွာန်လေဝ်ကေ၊ ပွိုၚ်ဍုၚ်ၜဳက္လေၚ်၊ တွဵုရးဍုၚ်မန်ဝွံ ကွဳစက်ညးပဲါဒဴဘဲပၞာန်တံ ဍိုက်ကၠုၚ်ဂှ် ဒပ်ကမ္မယှေန်ပၞာန်တံ ပန်ကဵုလွဟ်ဂှ်ရ ကောန်ယာဲဂြိပ်ဒဴဘဲပၞာန် (၂) တၠ ချိုတ်အာတုဲ ညးဒးဘဲဝပ် (၂) တၠနွံရဂှ် ဂွံတီကေတ် နူဗော်သွးကရေၚ် ကေအေန်ယူ ရ။
ဂိတုမေ (၉)၊ အခိၚ်တ္ၚဲစေၚ် ၜိုတ် (၂) နာဍဳဂှ်ဝွံ ကွဳစက်ညးပဲါဒဴဘဲပၞာန် (၈) တၠ ဍိုက်ဗက်ကၠုၚ်ဂှ် ကရောၚ်ပၞာန်ကမ္မယှေန်ပၞာန် ဗဒေံါဏာလဝ် ပ္ဍဲဂၠံၚ် (ဘုရားလေး – လေးကေတောၚ်ဂူဝ) ဂှ်တုဲ ပန်ကဵုလွဟ်ရောၚ် ဂးရ။
ဟိုတ်နူဒးဒုၚ်ပန်ကဵုလွဟ်တုဲ ညးပဲါဒဴဘဲပၞာန် နဝ်ဖိုဝ်ပဳဏာ အာယုက် (၄၆) သၞာံကဵု ကောန်ဝုတ်ညး နဝ်ပါန်အိဖျူ အာယုက် (၁၃) သၞာံတံ ချိုတ်အာ ဒၞာဲဒးဒုၚ်ပန်ဂှ်ရ။
တုဲပၠန် ကောန်ၚာ်အာယုက် (၁၅) သၞာံမွဲတၠကဵု ညးပဲါဒဴဘဲပၞာန်မွဲတၠပၠန်ဂှ်လေဝ် ဒးလွဟ်ဂွံအာဘဲဝပ်တုဲ ဒုၚ်လွဳလွတ်ဒၟံၚ်ရ။
ကရောၚ်ပၞာန်ကမ္မယှေန်ပၞာန်တံ ပန်ကဵုလွဟ်တုဲဂှ် ရပ်ဏာ ညးဒဳကွဳစက်ကဵု ညးတြုံပဲါဒဴဘဲပၞာန် (၃) တၠတုဲ ပ္ဍဲဂိတုမေ စၟတ်တ္ၚဲ (၁၀) တုဲကၠုၚ်ဏံ ညးဒဳကွဳစက်ကဵု ညးပဲါဒဴဘဲပၞာန် (၂) တၠ က္လေၚ်ဗၠးကၠုၚ်ကီုလေဝ် ညးပဲါဒဴဘဲပၞာန်မွဲတၠဂှ် ကမ္မယှေန်ပၞာန်တံ ဆက်ရပ်လဝ်ဖိုဟ်ရောၚ် ကေအေန်ယူ လလောၚ်ပ္တိတ်လဝ်ရ။
အပ္ဍဲပွိုၚ်ဍုၚ်ၜဳက္လေၚ်ဝွံ ဒပ်ကမ္မယှေန်ပၞာန်တံ ပန်မံၚ်ကဵုလွဟ်ဇၞော်၊ က္ၜၚ်ကျာ ဇၟာပ်တ္ၚဲတုဲ ဟိုတ်နူဒပ်ကမ္မယှေန်ပၞာန်တံ ပန်ပှော်ဏာဂှ်ရ သ္ၚိဒၟံၚ်ညးဍုၚ်ကွာန်ဂမၠိုၚ်၊ စမြိုၚ်ပရေၚ်ဘာသာ ကေုာံ ပရေၚ်ပညာဂမၠိုၚ် လီုလာ်အာနွံရောၚ် ဂွံတီကေတ် နူ ကေအေန်ယူ (ခရိုၚ်သဓီု) ရ။
ဒပ်ကမ္မယှေန်ပၞာန်တံဝွံ သၟာၚ်နူဗ္တိုက်ကဵုက္ၜၚ်ကျာဂှ်မ္ဂး ကရောၚ်ပၞာန်ရီုဂမၠိုၚ် လုပ်စိုပ် ပ္ဍဲကွာန်ဝေန်တာပါန်တုဲ စံၚ်ပလီုပလာ်သ္ၚိဒၟံၚ်ညးဍုၚ်ကွာန်ဂမၠိုၚ်ကီု၊ ပန်ဗ္တိုက်ကဵု (ပါရာမော်တာ) ကီုဂှ်ရ သ္ၚိဒၟံၚ်ဗွဲမဂၠိုၚ် တူပၟတ်လီုလာ်အာနွံရ။
ဒပ်ကမ္မယှေန်ပၞာန်တံဝွံ စွံပွန်ကဵု ဗွိုၚ်ကမၠောန်၊ ကွာန်၊ ဒၞာဲသ္ၚိဒၟံၚ်ညးဍုၚ်ကွာန် ဟွံဆေၚ်စပ်ကဵု ပရေၚ်ကတဵုဒှ်ပေဲါဗ္တိုက်တုဲ ပန်ဗ္တိုက်မံၚ်အဆက်ဆက်ရဂှ်လေဝ် နူကေအေန်ယူ (ခရိုၚ်သဓီု) လလောၚ်ပ္တိတ်လဝ်ရ။
