ပ္ဍဲကွာန် (ကျွဲထိန်းကုန်း)၊ ပွိုၚ်ဍုၚ်တၞၚ်သဳ၊ ရးတၞၚ်သဳဝွံ ဂိတုမေ (၂၁) ၊ နူတနေံဏံ အခိၚ်သဝ်တ္ၚဲဂှ် နူကဵုဒပ်ပၞာန် ပန်ဏာလွဟ်ဇၞော်ဆဆဵုဂှ်ရ ညးတြုံဒေသမွဲတၠ ချိုတ်အာတုဲ ကောန်ၚာ်ပါလုပ်ကီု သီုဖအိုတ် ဒးအာဘဲဝပ်သ္ကာတ်မြဟ် (၂) တၠရဂှ် ဂွံတီကေတ် နူတမ်ရိုဟ်ပရိုၚ်အပ္ဍဲဒေသရ။

ဂကောံဒပ်ပၞာန် ဖျေံလဝ်ဒပ် ပ္ဍဲဗလဳကွာန် (ထုံတော်ရွာ) ဂှ်ကဵု တမ်ဒပ် (ခမရ – ၅၆၁) ဖျေံသဇိုၚ်ကွာန် (ညောၚ်ပၚ်ကွၚ်း) တံ နူတနေံဏံ အခိၚ်သဝ်တ္ၚဲ ၜိုတ် (၆း၃၀) နာဍဳဂှ် ဟိုတ်ဖဵုဟွံမွဲမွဲသာ် ပန်ဏာလွဟ်ဇၞော်ဆဆဵုရ။

လွဟ်ဇၞော်ဂှ်ဝွံ ဒတုံခတိုဟ်အာ ဗဒဲါဘာဗ္တောန်လိက် မၞုံအပ္ဍဲကွာန် (ကျွဲထိန်းကုန်း) ဂှ်တုဲ ညးတြုံအာယုက် (၄၀) သၞာံမွဲတၠ၊ ဒၟံၚ်တန်တဴမံၚ် ပ္ဍဲကွာန် (ကျွဲထိန်းကုန်း) ဂှ် ဒးအာကဝေက်လွဟ်ဇၞော် ပ္ဍဲက္ဍိုပ်တုဲ ချိုတ်အာရ။

သၟာၚ်နူဂှ်ပၠန် ညးတြုံအာယုက် ၜိုတ် (၂၀) သၞာံမွဲတၠ ဒးဘဲဝပ်တၚ်က္ၜံၚ်ကဝ်တုဲ ကောန်ၚာ်အာယုက် (၅) သၞာံမွဲတၠ ဇိုၚ်ဆောံလေၚ်(လီု)အာ မွဲဒိုဟ်ရောၚ် ကောန်သဂံၚ်ဒပ်ပၠန်ဂတးမွဲတၠ ဟီုရ။

“လွဟ်ဇၞော်ဂှ် စှေ်တဝ်တဝ်ဟွံသေၚ်ပုဟ်၊ ဒးတၞံသတ်ဗဒဲါသ္ၚိတုဲ ခတိုဟ်ရ၊ ပ္ဍဲဗဒဲါသ္ၚိကဵု ဘာဗ္တောန်လိက်ဂှ်ရ၊ သ္ၚိဂှ်လေဝ် ကာတ်မံၚ်ကဵုဘာတှေ်၊ မၞိဟ်ဇၞော်မွဲတၠဂှ်တှေ် တုဲအာလဝဲါဂှ်ရ၊ ကောန်ၚာ်ကဵု ညးအဝဲသၟတ်ဂှ်တှေ် ဒးဝပ်သ္ကာတ်မြဟ်မံၚ်ညိရ၊ လွဟ်ဇၞော်ဂှ်တှေ် ဂွံပရိုၚ်တုဲ ပန်နၚ်ဟာ ဟွံတီပုဟ်၊ လၟုဟ်ဏံ ဟွံဒှ်ပေဲါဗ္တိုက်မွဲသာ် ပန်နၚ်မံၚ်” သာ်ဝွံ ကောန်သဂံၚ်ဒပ်ပၠန်ဂတးဂှ် ဟီုရ။

ကောန်ၚာ်ဒးဘဲဝပ်ကဵု သၟတ်တြုံတံဂှ် ဟိုတ်နူဒှ်ဂဝိၚ်ကဵုဘဲဝပ်ဂှ်ရ သွက်ဂွံပလံၚ်ဗစိုပ် ရုၚ်ဂဥုဲညးဍုၚ်ကွာန်ဍုၚ်ဗိက်ဂှ် စဳဇန်မံၚ်ရောၚ် ဂွံတီကေတ်ရ။

ဒပ်ပၞာန်တံဝွံ ပ္ဍဲကဵုပွဳဗွိုၚ်ဗဒဲါကွာန်ဗာန်ဠဝ် ကေုာံ (၅) မိုၚ်၊ (၆) မိုၚ်ဂှ် ပန်ထောံဖျေံဗမ်ကဵုက္ၜၚ်ကျာ၊ ပန်ကဵုလွဟ်ဇၞော် မွဲနှေံမွဲနှေံကီုရ။

အပ္ဍဲဂိတုအေဗရဴတုဲကၠုၚ်ဏံလေဝ် ညးဒေသနူကွာန် မၞုံပ္ဍဲသ္ကုတ်ဂၠံၚ် (ဘောဓိကမ်း – ညောၚ်ပၚ်ကွၚ်း) တံ ညံၚ်ဟွံဂွံမံၚ်ပ္ဍဲကွာန်ကီု၊ ညံၚ်ဂွံပဲါတိတ်ဒၞာဲဗၠးဘဲကီုဂှ် နူဒပ်ပံၚ်ကောံပၠန်ဂတးတံ ဟီုဂးကဵုလဝ်သတိရ။

ၜိုန်ဂှ်ကီုလေဝ် ညးဒေသကွာန်လ္ၚဵုတံဟေၚ် ပဲါဒဴတိတ်အာဒၞာဲဗၠးဘဲကီုလေဝ် ညးဒေသဗွဲမဂၠိုၚ်တံဝွံ ဟိုတ်နူခက်ခုဲပရေၚ်စသုၚ်မံၚ်စံၚ်ဂှ်ရ အခိၚ်ဂၠေံဂၠေံ (ဗွဲချိုန်ခဏ) ဟေၚ် ပဲါဒဴမာန်တုဲ ဆက်မံၚ်အာအပ္ဍဲကွာန်ရဂှ် ကောန်သဂံၚ်လ္တူဂှ် ဆက်ဟီုလဝ်ရ။

“လွဟ်ဇၞော်ဂှ်လေဝ် ပ္ဍဲကွာန် (၅) မိုၚ်၊ (၆) မိုၚ်၊ ဗာန်ဠဝ်၊ (ကျွဲထိန်းကုန်း) တံကီု သီုလ္ပာ်ကွာန်တၞဟ်လေဝ် ပန်မံၚ်မွဲနှေံမွဲနှေံရ။ ကောန်ကွာန်တံ ပရေၚ်စသုၚ်မံၚ်စံၚ် ဟွံပြေပြံၚ်တှေ် ပဲါဍာ်ဇမၠိၚ်ဟွံမာန်ပုဟ်။ ဒှ်တှေ် ပဲါဏောၚ်၊ ဟွံဒှ်တှေ် ဟွံပဲါပုဟ်။ ပိုဲတံလေဝ် ဒးကၠိုဟ်ရ။ မံၚ်တှေ်လေဝ် ဘဲအန္တရာဲၜၚ်ကျာကဵု လွဟ်ဇၞော်ဂှ်တှေ် စွံသတိညိ မိက်ဂွံဟီု” သာ်ဝွံ ဂးရ။

ဂိတုမေ (၂၀) တုဲကၠုၚ်ဏံ အခိၚ်နူဂယး ၜိုတ် (၁၀) နာဍဳဂှ်ဝွံ ကရောၚ်ပၞာန်ကမ္မယှေန်ပၞာန် ကၠုၚ်ပလံၚ်ဇွောံမဂှ် ဒပ်ပၠန်ဂတးတံ ကြတ်ဗ္တိုက်ဏာလဝ် ပ္ဍဲကွာန် (၆) မိုၚ်တုဲ ကတဵုဒှ်အာပေဲါဗ္တိုက် ၜိုတ် (၂၀) မိ်နေတ်ရ။

ဒပ်ပၞာန်တံဝွံ နကဵုတၚ်ရန်တၟံနွံနွံ စွံပွန်ကဵုညးဍုၚ်ကွာန်တံတုဲ ဗ္တိုက်မံၚ်ဂှ်ရ နကဵုညးဍုၚ်ကွာန်၊ ကောန်ကွာန်တံ စွံသတိကဵု ဘဲအန္တရာဲက္ၜၚ်ကျာ၊ လွဟ်ဇၞော် ဗွဲတၟေၚ်ညိဂှ် ဂကောံဒပ်ပၠန်ဂတးတံ ဟီုဂးဖ္တိုက်ဖၟောဝ်လဝ်ရ။