ပ္ဍဲအကြာပွိုၚ်မွဲသတ္တာဟဏံ ညးဍုၚ်ကွာန် ပ္ဍဲပွိုၚ်ဍုၚ်ဇြပ်ဗုတအ် ဒးဒုၚ်ဂစိုတ်ဏာလဝ်ၜါဝါ လၟိဟ် (၅) တၠနွံတုဲ ညးဒေသတအ် ဖေက်လကိုတ်ဒၟံၚ်နွံရောၚ် တၠဆေၚ်ဖျာ နူကွာန်ပြဳမွဲတၠ ဟီုရ။
ဒေသပွိုၚ်ဍုၚ်ဇြပ်ဗု သကုတ်သၠုၚ်ကျာဂှ် ဂကောံရပ်လွဟ်နာနာ ဂေတ်ဂေၚ်ချဳဒရာၚ်ဒၟံၚ်နွံတုဲ ခြာ (၂) တ္ၚဲဓဝ် ညးဍုၚ်ကွာန် ဒးဒုၚ်ဂစိုတ်ဏာ (၅) တၠဏံဂှ် ဟွံကေၚ်ဒှ်မွဲလှေ်တုဲ ညးဍုၚ်ကွာန်ဒေသတအ် ဖေက်လကိုတ်ဒၟံၚ်အိုတ်ရ။
“ဒေသပိုဲဏံ ဗီုဏံ ခြာကဵုၜါပိတ္ၚဲဓဝ် ညးဍုၚ်ကွာန်ဒးဒုၚ်ဂစိုတ်ဏာ (၅) တၠ ဗီုဏံဂှ် မွဲအလန်လေဝ် ဟွံကေၚ်မိၚ်မွဲလှေ်ပုဟ်၊ ဒေသပိုဲဏံဂှ် ဂကောံဇဳဂေတ်ဂေၚ်ချဳဒရာၚ်နွံမံၚ် ဒပ်မန်၊ ဒပ်ကရေၚ်၊ ဒပ်ပဳတဳအေဖ် ဂကောံလဵု ကၠောန်သ္ပဏာဂှ် ဟွံတီ၊ ညး ဍုၚ်ကွာန်ဒေသတအ်ဂှ် ဖေက်လကိုတ်မံၚ်ဍုတ်အိုတ်ရ” သာ်ဝွံ တၠဆေၚ်ဖျာဂှ် ဟီုရ။
ဂိတုမေ (၂၀) တုဲကၠုၚ်ဏံ ပ္ဍဲဂၠံၚ်ကွာန်ပြဳ အာကဵုကွာန်အနေၚ် သ္ကဲဂၠံၚ်မွဲဒၞာဲဂှ် ကောန်ကမၠောန်တိုၚ်ဖုၚ် အေမ်ပဳတဳ (MPT) မၞိဟ်တြုံၜါတၠဂှ် ကၠေၚ်ဒက်လဝ်လ္ပာ်လက္ကရဴတုဲ ဒးဒုၚ်ပန်ဂစိုတ်လဝ်ဂှ်ကီု၊ ဂိတုမေ (၁၄) ဂှ်လေဝ် ပ္ဍဲကဵုသ္ကဲဂၠံၚ်ဇၞော် ဇြပ်ဗု-ရေဝ် ကရပ်ပါၚ်ကွာန်ဝါခ္ဍး ဗဒါဲကျာ်ဟွံမွဲ-မွဲချိုန်ခဏဂှ် သၟာကမၠောန်လံက်ကၠေၚ်တိသ္ၚိ မၞိဟ်တြုံပိတၠ ကၠေၚ်ဒက်လဝ်တဲလ္ပာ်လက္ကရဴတုဲ ဒးဒုၚ်ဂစိုတ်လဝ်ကီု နွံရ။
“ခြာကဵုသတ္တာဟဓဝ် မၞိဟ် (၅) တၠ ဒးဒုၚ်ဂစိုတ်ဏာ ဓဇန်ဓဇန်ဗီုဏံဂှ် ဒေသပိုဲဏံ မွဲအလန်လေဝ် ဟွံကေၚ်ဒှ်ကၠုၚ်ဏီပုဟ်၊ ဒေသဇြပ်ဗုသၠုၚ်ကျာပိုဲဏံပၠန်လေဝ် ဂကောံရပ်လွဟ်ဂၠိုၚ်မံၚ်၊ ညးဂှ် ကၠောန်သ္ပဏာဂှ်လေဝ် ညးမွဲလေဝ် ဟွံဂံၚ်တီ ဟွံဂံၚ်ဟီုဓမံက်ပုဟ်၊ ၜါဏံဂှ်လေဝ် ဒဵုကဵုသ္ၚောဲညးသ္ကအ်ကွေံကွေံဟွံသေၚ်၊ ညးဍုၚ်ကွာန်မၞုံဒေသကွာန်ပွဳဗွိုၚ်ကွာန်တအ်ဂှ်တှေ် ဖေက်လကိုတ်မံၚ် အာကၠုၚ်ဖေက်ဒညအိုတ်တး” သာ်ဝွံ ညးဍုၚ်ကွာန်နူကွာန်ကအ်လေဝ်မွဲတၠပၠန်ဂှ် ဟီုရ။
ဒေသပွိုၚ်ဍုၚ်ဇြပ်ဗု သကုတ်သၠုၚ်ကျာဂှ်ဝွံ ဂကောံရပ်လွဟ်ပၠန်ဂတးမန်၊ ဂကောံပၠန်ဂတးကရေၚ်၊ ဂကောံပၠန်ဂတး ပဳတဳအေဖ် ကေုာံ ဒပ်ပၞာန်ဗၟာတအ် ဂေတ်ဂေၚ်ချဳဒရာၚ်အာကၠုၚ်ဒၟံၚ်နွံတုဲ ကိစ္စပန်ဂစိုတ်ဏာ ညးဍုၚ်ကွာန်တအ် ပ္ဍဲဒေသ သကုတ်သၠုၚ်ကျာဇြပ်ဗုဂှ် ဂကောံလဵု ကၠောန်သ္ပဏာဂှ်လေဝ် ဓမံက်ပတိတ်လဝ်ဟွံမွဲရ။
ပ္ဍဲကဵုဂိတုမေမွဲဂိတုဏံဓဝ်ဂှ် ညးဍုၚ်ကွာန်ဒေသပွိုၚ်ဍုၚ်မုဟ်ဍုၚ် ကွာန်ဘာဒေါဝ်ကီု၊ ပွိုၚ်ဍုၚ်ဇြပ်ဗု ဒေသသကုတ်သၠုၚ်ကျာဂှ်ကီု၊ ပွိုၚ်ဍုၚ်ရေဝ်သၟဝ်ကျာကဵု လတူဍုၚ်ရေဝ်ဂှ်ကီု ညးဍုၚ်ကွာန်တအ် ဒးဒုၚ်ဂစိုတ်ဒၟံၚ် ကုဂကောံရပ်လွဟ်တအ် ကြပ် (၁၀) တၠနွံရောၚ် ဂွံတီကေတ်ရ။
