အပ္ဍဲဍုၚ်မဝ်တာၚ် (မောတောၚ်) ၊ ပွိုၚ်ဍုၚ်တၞၚ်သဳ၊ ပယျဵုသေံ-ဗၟာဂှ်ဝွံ နူကဵုဒပ်ပၞာန်ဗၟာ ထောံဖျေံဗမ်ကဵုက္ၜၚ်ကျာ Jet Fighter ဂှ်ရ ကောန်ၚာ်အာယုက်ကဵုဂိတုမွဲတၠပါလုပ်ကီု သီုဖအိုတ် ဒးအာဝပ် (၃) တၠရဂှ် ဗော်သွးကရေၚ် ကေအေန်ယူ လလောၚ်ပ္တိတ်လဝ်နူတနေံဏံရ။

ဂိတုမေ စၟတ်တ္ၚဲ (၂)၊ အခိၚ်တ္ၚဲစေၚ် ၜိုတ် (၂) နာဍဳဂှ် နူကဵုဒပ်ပၞာန်ဗၟာ ထောံဖျေံဗမ် ပံၚ် (၂၅၀) ၜါမ နကဵုက္ၜၚ်ကျာ Jet Fighter အပ္ဍဲဍုၚ်မဝ်တာၚ်ရ။

ဗမ်ဝွံ ဒတုံခတိုဟ်အာ အပ္ဍဲကွာန်တုဲ ကောန်ၚာ်အာယုက်ကဵုဂိတုမွဲတၠပါလုပ်ကီု သီုဖအိုတ် ဒးအာဘဲဝပ် (၃) တၠနွံရဂှ် ဓမံက်ထ္ၜးလဝ် ပ္ဍဲလိက်လလောၚ်ကေအေန်ယူရ။

ဍုၚ်မဝ်တာၚ် မၞုံပ္ဍဲဒေသပယျဵုသေံ-ဗၟာဂှ် သၞာံတုဲကၠုၚ်ဏံ ဂကောံဒပ်ပၠန်ဂတးတံ ထိၚ်ဒဝ်လဝ်တုဲ အခိၚ်လၟုဟ်ဏံ နူဒပ်ပၞာန်ဗၟာတံ ဗ္တိုက်မံၚ်ကဵုက္ၜၚ်ကျာ ထောံဖျေံမံၚ်ဗမ်တုဲ သွက်သ္ဂောံက္လေၚ်ထိၚ်ဒဝ်ဂှ် ဂိုတ်ဂစာန်မံၚ်ရောၚ် ညးတာလျိုၚ် နူတမ်ဒပ် စၟတ် (၂)၊ ခရိုၚ်ဗိက်-ထဝဲါမွဲတၠဂှ် ဟီုရ။

“မိက်ဂွံက္လေၚ်ထိၚ်ဒဝ် ဍုၚ်မဝ်တာၚ်တုဲ ကြပ်အရိုဟ်တ္ၚဲ ကၠုၚ်ထောံမံၚ်ဗမ်ရ။ ဆလတှေ် မွဲတ္ၚဲပိဝါ ထောံဖျေံဗမ်ရ။ ဍေံတံဂှ်တှေ် နူကဵုပရေၚ်ဆက်စၠောံဇြဟတ်ဗလးတိဂှ် ထံၚ်ဂွံပရိုၚ်တုဲ ကၠုၚ်ထောံဖျေံဗမ်ရ။ မွဲအခိၚ်ကဵု ထ္ပက်ကရောၚ်ပၞာန်ဗလးတိဂှ် ထောံဖျေံဗမ်ရ” သာ်ဝွံ ညးတာလျိုၚ်ဂှ် ဟီုရ။

ဂိတုအေဗရဴ စၟတ်တ္ၚဲ (၂၆၊ ၂၇) တုဲကၠုၚ်ဏံ ဟိုတ်နူထောံဖျေံဗမ် ဟွံအောန်နူ (၁၂) မ အပ္ဍဲအရာပ်လ္တူဍုၚ်မဝ်တာၚ်ဂှ်ရ ဒၞာဲဒၟံၚ်သၟာကမၠောန် ကိုန်စဳဇန်တဵုသတ်ဗြဴကၠေၚ် လီုလာ်အာတုဲ သၟာကမၠောန်တြုံဗြဴၜါတၠ ဒးချိုတ်အာကီုရ။

သၟာၚ်နူဍုၚ်မဝ်တာၚ်တုဲ လ္ပာ်ကွာန် (၆) မိုၚ်ကဵု ဗာန်လဝ် ဂကောံဒပ်ပၠန်ဂတးတံ ချဳဓရာၚ်မံၚ်ပရေၚ်ပၞာန်ဂှ်လေဝ် သွက်ဂွံထိၚ်ကေတ်ပေၚ်ပေၚ်မာန်ဂှ် က္လေၚ်ထပ်ဗပေၚ်လဝ်ဇြဟတ်ပၞာန် အပ္ဍဲဗဒိုပ်ကမ္မယှေန်ပၞာန်နွံရောၚ် ဂွံတီကေတ်ရ။

ဒပ်ကမ္မယှေန်ပၞာန် ထ္ပက်ကၠုၚ်ကရောၚ်ပၞာန် သွက်ဂွံဗပေၚ်ဇြဟတ်အပ္ဍဲကွာန်တံဂှ် နူဒပ်ပံၚ်ကောံပၠန်ဂတးတံ ကြတ်ဗ္တိုက်မံၚ်ဂှ်ရ ဂကောံကရောၚ်ပၞာန်တံ ဒးဂိတုဲ ဆက်အာဂတဟွံမာန်ရောၚ် ညးတာလျိုၚ် နူတမ်ဒပ် စၟတ် (၂)၊ ခရိုၚ်ဗိက်-ထဝဲါမွဲတၠဂှ် ဟီုရ။

“ဍေံတံမိက်ဂွံဂွံဂှ် မဝ်တာၚ်မွဲဓဝ် ဟွံသေၚ်ပုဟ်။ ဒၞာဲပရေၚ်ချဳဓရာၚ်ပၞာန်ဇြဟတ်ခိုဟ်တံဂှ် ဍေံတံ မိက်ဂွံထိၚ်ရ။ ဟိုတ်ဂှ်ရ ထပ်ဗပေၚ်ဇြဟတ် ပ္ဍဲဗဒိုပ်နွံလ္ပာ်ဏံရ။ အေဇှ်ရ ပိုဲတံ နကဵုဒုၚ်ဒဝ်တုဲ ဗ္တိုက်မံၚ်သၞောတ်ဒမၠုက်ရ။ ထောံဖျေံဗမ်ကဵု စက်ဗရုသာဲ၊ ကၠတ်ပန်တုဲ ဍေံတံ ဒးဂိမံၚ်” သာ်ဝွံ ညးဟီုရ။

ဂိတုအေဗရဴ စၟတ်တ္ၚဲ (၂၇၊ ၂၈၊ ၃၀) တုဲကၠုၚ်ဏံဝွံ ဂကောံဒပ်ပၠန်ဂတးတံ ကြတ်ဗ္တိုက်ကရောၚ်ပၞာန်ကမ္မယှေန်ပၞာန် ဗဒဲါကွာန် (၅) မိုၚ်၊ (၆) မိုၚ်ကဵု ကွာန်ဗာန်လဝ်ဂှ်ကီု၊ ပန်ဗ္တိုက်ကဵု RPG ကီု၊ ဒှ်ပေဲါဗ္တိုက်ၜါလ္ပာ်ကီုဂှ်ရ ကောန်သ္ဂံၚ်ကမ္မယှေန်ပၞာန် ပြဟ်လလုဲအာ (၁) တၠတုဲ ဒးဝပ် (၇) တၠရ။

တမ်ဒပ်တိုက် စၟတ် (၂၂၄) ကေုာံ ဗၠာဲသၟိၚ်ကဵု ပၞာန်မၚ်ကွာန်တံ ဖျေံလဝ်ဒပ်တုဲ (အမြှောက်ကုန်း) မၞုံပ္ဍဲဍုၚ်မဝ်တာၚ်မွဲဂှ် နူဂိတုနဝ်ဝေမ်ဗာ (၁၄)၊ သၞာံ (၂၀၂၅) တုဲကၠုၚ်ဏံရ ဂကောံဒပ်ပံၚ်ကောံပၠန်ဂတးကဵု ဗော်သွးကရေၚ် ကေအေန်ယူ ဗ္တိုက်ထိၚ်ဂွံလဝ်ရ။

အပ္ဍဲရးတၞၚ်သဳဝွံ ပ္ဍဲဂိတုမာတ်တုဲကၠုၚ်တေံ ပေဲါဗ္တိုက်အကြာဒပ်ကမ္မယှေန်ပၞာန်ကဵု ဂကောံဒပ်ပၠန်ဂတးတံ ကတဵုဒှ်လဝ် ဟွံအောန်နူ (၇၀) ဝါတုဲ ညးဒေသ (၇၉၇၀၀) တၠ ဒးဂြိပ်ပဲါဒဴဘဲပၞာန်နွံရောၚ် နူ FE5 ရးတၞၚ်သဳ လလောၚ်ပ္တိတ်လဝ် ပ္ဍဲဂိတုအေဗရဴ (၂၁) တုဲကၠုၚ်ဏံဂှ် ဂွံတီကေတ်ရ။