သၞာံ (၂၀၂၆) အပ္ဍဲကဵုပွိုၚ် (၃) ဂိတုဏအ်ဝွံ အလုံကၟိန်ဍုၚ်သေံဂှ် ဗၠာဲသၟိၚ်သေံတအ် သၠုၚ်ပ္တိုန်အသိၚ် ပရေၚ်စၟဳစၟတ်တုဲ ရပ်စပ်ပသောၚ်အာ သၟာကမၠောန်ကောန်ဍုၚ်သ္အာၚ် ဟွံလုပ်သၞောဝ်တအ်ရောၚ် နူတနေံဏအ် ဂိတုမေ စၟတ်တ္ၚဲ (၁၂) ဂှ် အလဵုအသဳသေံတအ် ဟီုလလောၚ်ပ္တိတ်ကၠုၚ်အမိၚ် ပ္ဍဲကဵုပေါဲကောံဓရီုနွံရ။

ဗွဲကိုပ်ကၠာ နကဵုအစဳဇန် သ္ဂောံဗ္တိုက်သရိုဟ်ကၠေံဂှ်ဝွံ အပ္ဍဲကဵုပွိုၚ် (၃) ဂိတုဏအ် စွံအဓိက စၟဳစၟတ်အာ ညးသွံရာန်မံၚ် ဂဥုဲၜူမာဲကဵု ညးကၠောန်မံၚ်ကမၠောန်ဟွံလုပ်သၞောဝ်တအ်ကၠာတုဲ ပ္ဍဲကဵုအကြာပွိုၚ် (၆) ဂိတုကဵု (၉) ဂိတုဂှ် ဗက်စၟဳစၟတ်အာ ညးလိက်သက်သဳဟွံဍိုက်ပေၚ်၊ ညးအာယုက်လိက်အိုတ်မံၚ်တအ် ဂှ်ရောၚ် ဂွံတီကေတ်ရ။

စနူကဵုဂိတုမေမံက်ဏအ်တုဲ အတိုၚ်စၞောန်နူအလဵုအသဳသေံဂှ် ဗၠာဲသၟိၚ်သေံတအ် ဗက်လုပ်စၟဳစၟတ် ရပ်စပ်ပသောၚ်အာ သၟာကမၠောန်ကောန်ဍုၚ်သ္အာၚ်ဟွံလုပ်သၞောဝ် သီုပါလုပ်ကောန်ဍုၚ်မန်ဗၟာတအ်တုဲ အပ္ဍဲဂှ်မ္ဂး ညးတၞးလိက်သက်သဳဟွံဍိုက်ပေၚ်၊ လိက်အုပ် Visa အာယုက်အိုတ်၊ ညးဟွံမွဲကဵုတၞးလိက် သက်သဳ (Work Permit) ၊ ညးစှေ်ကၠောန်ကမၠောန်တ္ၚဲဟွံမှာန်ကဵု ဒၞါဲသၟာကမၠောန်ကောန်ဍုၚ်သၟာၚ်တအ် ကောံကလောံမံၚ်တန်တဴဂၠိုၚ်ဂှ် စွံအဓိက စၟဳစၟတ်အာရောၚ် ဂွံတီကေတ်ရ။

ဒှ်သာ်ဂှ်ရ “နကဵုသၟာကမၠောန်ကောန်ဍုၚ်မန်ဗၟာတအ် စွံအရီုကဵုသၞောဝ်ညးတအ် လလောၚ်ပ္တိတ်လဝ်ဂှ်တုဲ ဗက်စၟဳစၟတ်ကျောဝ်တၞးလိက်ဇကု ဍိုက်ပေၚ် /ဟွံဍိုက်ပေၚ်တုဲ ဍိုက်ပေၚ်မံၚ်တှ်ေလေဝ် တၞးလိက်ဇကု စဝ်လဝ်ကဵုမုက်တူတုဲ အာကၠုၚ်တိတ်မ္ၚးတှ်ေ ညံၚ်ဂွံစုတ်လဝ်ပ္ဍဲထိုၚ်ဇကုမာန်’’ သာ်ဝွံ ဂကောံညးမၚ်ရံၚ် သ္ၚဳဂၠိပ်သၟာကမၠောန်ကောန်ဍုၚ်ဗၟာတအ် ဟီုကဵုသတိရ။

တုဲပၠန် ပ္ဍဲကဵုဇကု တၞးလိက်သက်သဳ ဍိုက်ပေၚ် / ဟွံဍိုက်ပေၚ် ဗက်စၟဳစၟတ်ကျောဝ်ကဵု မပ္တမ် လိက်အုပ် (Passport)၊ လိက်အုပ် (Visa)၊ တၞးလိက်သက်သဳ အခေါၚ်ကၠောန်ကမၠောန် (Work Permit) ၊ လိက်ဒုၚ်တဲလုပ်ကၠောန်ကမၠောန် (90Day Report) ၊ လိက်ကဵုသမ္တီလုပ်မံၚ်ပ္ဍဲကမၠောန် (TM30) ကီု မပ္တံတၚ်နၚ်တၞးလိက်တဏအ် သ္ဒးကဵုဍိုက်ပေၚ်မာန်ရောၚ်။

ပ္ဍဲကဵုဂိတုမေစမံက်ဏအ်ဝွံ နူကဵုအလဵုအသဳသေံတအ် လလောၚ်ပ္တိတ်ကၠုၚ်လဝ် ကိစ္စရပ်စပ် သၟာကမၠောန်ပဆုဲပြံၚ် ညးလိက်တၞးသက်သဳဟွံမွဲတအ်တုဲဂှ်ဗက်ဗၠာဲသၟိၚ်သေံတအ် လုပ်စၟဳစၟတ်ရပ်စပ်ဂွံလဝ် သၟာကမၠောန်ကောန်ဍုၚ်မန်ဗၟာ ဟွံမွဲကဵု လိက်တၞးသက်သဳတအ်သၟးဂှ် လၟိဟ်ဗ္ဒါဲ (၁၀၀) တၠ နွံကၠုၚ်ယျရောၚ် ဂွံတီကေတ်ရ။