သ္ဂံၚ်ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD ပါလုပ်ကီု သီုဖအိုတ်သ္ဂံၚ်ပၠန်ဂတး (၈) တၠ လုပ်အာဇရေၚ်ပ္ဍဲဌာန်ဂအုပ်ပၞာန်ရးအဂၞဲ ကမ္မယှေန်ပၞာန် လလောၚ်ပ္တိတ်လဝ်ဂှ်ဝွံ ဒှ်တြးဝါဒဟေၚ်တုဲ ပ္ဍဲဗလးတိဂှ် ညးလုပ်အာ ဇရေၚ်ကမ္မယှေန်ပၞာန်ဟွံမွဲရောၚ် ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD ဟီုရ။
ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD ၊ ဒပ်ဒဳမဝ်ကရေတ်တေတ်ကွးဘာအလုံဍုၚ်ဗၟာ ABSDF ၊ ဒပ်ပၞာန်ဗၠးၜးကရေၚ် KNLA ကေုာံ ဒပ်စဵုဒၞာညးဍုၚ်ကွာန် PDF ကီု သီုဖအိုတ် သ္ဂံၚ် (၈) တၠတံဂှ် ဂိတုဂျောန် (၃)၊ နူတနေံဏံ လုပ်အာဇရေၚ်ကမ္မယှေန်ပၞာန်ရောၚ် လလောၚ်ပ္တိတ်လဝ်ရ။
ညးလုပ်ကၠုၚ်အပ္ဍဲဗွိုၚ်သၞောဝ်တံဂှ်ဝွံ ဂိတုဂျောန် (၃)၊ နူတနေံဏံ အခိၚ်နူဂယးဂှ် ကၠောန်ဗဒှ်လဝ် အသေအဟာန် က္လေၚ်ပအပ်ကုမိမညးထိၚ်ဒဝ်တံ ပ္ဍဲခဒံအံၚ်သာန်၊ ဌာန်ဂအုပ်ပၞာန်ရးအဂၞဲ၊ ဍုၚ်မတ်မလီုဂှ်တုဲ သ္ကိုပ်ဝန်ဇၞော်တွဵုရးဍုၚ်မန် ကေုာံ သ္ကိုပ်ရးကီု သီုကဵုညးတာလျိုၚ်ဂမၠိုၚ်တံ တိုန်စိုပ်လဝ်ရောၚ် ဂးရ။
သ္ဂံၚ်လုပ်အာ ဇရေၚ်ကမ္မယှေန်ပၞာန်ဂမၠိုၚ်တံဂှ်ဝွံ နူကဵုလှာဒကှ် (၁) တၠ၊ ကျာ်မြဟ် (၁) တၠ၊ ရေဝ် (၁) တၠ၊ ဘာအၚ် (၁) တၠ၊ တွဵုရးသေံ (၁) တၠ၊ ရးလ္ဂုၚ် (၁) တၠ၊ ရးဒေသဇၞော်အဝ (၁) တၠကဵု ရးဒေသဇၞော်ဨရာဝတဳ (၁) တၠ ပါလုပ်ရောၚ် ဓမံက်ထ္ၜးလဝ်ရ။
ၜိုန်ဂှ်ကီုလေဝ် ပ္ဍဲဗလးတိဝွံ သ္ဂံၚ်လုပ်စိုပ်အာ ဇရေၚ်ကမ္မယှေန်ပၞာန်တံဟွံမွဲတုဲ နူကဵုဒပ်ပၠန်ဂတးမကြပ်တံဂှ်လေဝ် ညးလုပ်စိုပ်အာဟွံမွဲဂှ်ရ ဒှ်နဲကဲဗျူဟာ ဆေၚ်စပ်ကဵုပရေၚ်ဗ္တိုက်စိုတ်ဓာတ်ရောၚ် ညးမၞုံအခေါၚ်ဟီုဂး ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD နာဲဂံၚ်သ္ကာ ဟီုရ။
“ကိစ္စသ္ဂံၚ်တံ ဂွံလုပ်အာ ဇရေၚ်ကမ္မယှေန်ပၞာန်ဂှ် ပ္ဍဲကဵုပိုဲတံ ဟွံမွဲပုဟ်။ တြးဝါဒတုဲ ပ္တိတ်မံၚ်ပရိုၚ်ပတောံရ။ အဓိကဂှ်တှေ် ပၠန်ဂတးတံ စိုတ်ဓာတ်ဂွံစှေ်ဂှ် ကၠောန်သ္ပဗ္တိုက်မံၚ် နကဵုပရေၚ်စိုတ်ဓာတ်ရ။ သ္ဂံၚ်ဂကောံတၞဟ်တံလေဝ် လုပ်အာဂှ် ဟွံမိၚ်ပုဟ်” သာ်ဝွံ နာဲဂံၚ်သ္ကာ ဟီုရ။
ကမ္မယှေန်ပၞာန်တံဝွံ သ္ဂံၚ် (၈) တၠ လုပ်စိုပ်ကၠုၚ်အပ္ဍဲဗွိုၚ်သၞောဝ်တံဂှ် တန်တဴကဵု ကပေါတ်လွဟ်လနက်ပါကၠုၚ် မွဲကရောံကုညးတံတုဲ ပအပ်ကဵုသြန်ကီု ကဵုပြၚ်တဲကပေါတ်ကီုဂှ် တြးဝါဒစန္ဒက်လဝ်ရ။
တုဲပၠန် သ္ဂံၚ်ပၠန်ဂတးတံ သွက်ဂွံလုပ်စိုပ် ဇရေၚ်ကမ္မယှေန်ပၞာန်ဂှ်မ္ဂး ညးဆန္ဒနွံတံ သှေ်မံၚ်ဗွဲမဂၠိုၚ်ဏီရဂှ်လေဝ် နူကမ္မယှေန်ပၞာန်တံ ဂးလဝ်ရ။
ဆေၚ်စပ်ကဵုကမ္မယှေန်ပၞာန်တြးဝါဒတုဲ သ္ဂံၚ် PDF မွဲတၠဂှ် “သ္ဂံၚ်ပၠန်ဂတးဗွဲမဂၠိုၚ်တံဂှ် သၞာံလအ်ကၠုၚ်တှေ် ဒှ်မံၚ်သံယောဇိုန်ညးသ္ကံအိုတ်ရ။ ချိုတ်တုပ်၊ ဂျိုၚ်တုပ်ရလေဝ်။ သွက်ဂွံလုပ်အာ ဇရေၚ်ကမ္မယှေန်ပၞာန်ဂှ် စိုတ်ဆန္ဒဟွံမွဲပုဟ်။ ဂွံစဴသ္ၚိဂှ်လေဝ် ဒှ်ဟွံမာန်ရပုဟ်။ အဲဟီုတှေ် မိမတံလေဝ် ဟွံမွဲရပုဟ်” သာ်ဝွံ ဟီုရ။
ကမ္မယှေန်ပၞာန်တံဝွံ ဗွဲကြဴနူဓမံက်ရုပ်ရဴ ကိုန်စဳဇန် (၁၀၀) တ္ၚဲဂှ်မ္ဂး ပ္ဍဲဒေသတိဍာ်ဂကောံပၠန်ဂတးဇြဟတ်ခိုဟ်တံဂှ် နကဵုပရေၚ်ထ္ပက်ပၞာန်ကီု၊ ဗ္တိုက်ကဵုက္ၜၚ်ကျာကီု ဘပဠကၠုၚ် ဒပ်ပၠန်ဂတးတံနွံရ။
မွဲလ္ပာ်ဂှ် နဲကဲဗျူဟာ ဆေၚ်စပ်ကဵုပရေၚ်ဗ္တိုက်စိုတ်ဓာတ် သ္ဂံၚ်ပၠန်ဂတးတံ စိုတ်ဓာတ်ဂွံစှေ်ဂှ် စကာဂၠိုၚ်ကၠုၚ်ဒၟံၚ်တုဲ နကဵုဂကောံဒပ်ပၠန်ဂတးဂမၠိုၚ်တံ သ္ပသတိကဵု ပရိုၚ်တြးဝါဒ ကမ္မယှေန်ပၞာန်တံညိဂှ် နူလ္ပာ်ဂကောံဒပ်ပၠန်ဂတးတံ ဟီုဂးကဵုမံၚ်သတိ မွဲနှေံမွဲနှေံနွံရ။