ကွးဘာတန်မူလ ပြံၚ်ကၠုၚ်နူဘာကောန်ဂကူမန်တံ သွက်ဂွံသွဟ် Placement Test ဂှ် ဂွိၚ်ဖေက်ဒှ်ခက်ခုဲရောၚ် မိမကွးဘာ ကေုာံ အ္စာ/အ္စာၝောံ ဘာကောန်ဂကူမန်တံ ဒှ်မံၚ်ဂဝိၚ်အိုတ်ရ။
ပ္ဍဲသၞာံဗ္တောန်ပညာ (၂၀၂၆ – ၂၀၂၇) ဏံ ကွးဘာနူဘာကောန်ဂကူမန် မိက်ဂွံပြံၚ်တိုန် ဘာဗ္တောန်ပညာသဇိုၚ်မ္ဂး ဒးသွဟ် Placement Test တုဲ ပ္ဍဲဂိတုဂျောန် စၟတ်တ္ၚဲ (၁၅) ဏံ စသွဟ်ရောၚ် ဂွံတီကေတ်ရ။
နကဵုမာတိကာဗီုဗ္တောန်တုပ်သၟဟ်ကီုလေဝ် ကွးဘာတန်မူလ မိက်ဂွံပြံၚ်ဘာ အကြာဘာ (၂) ဘာ စကာအရေဝ်ဘာသာသဇိုၚ် ဟွံတုပ်သၟဟ်ဏံ သွက်ဂွံသွဟ်ဂှ် ဂွိၚ်ဖေက်ဒှ်ခက်ခုဲရောၚ် အ္စာဘာ နူဘာကောန်ဂကူမန်မွဲတၠ ဟီုရ။
“ဒးကၠောန် Placement Test ဏောၚ်။ ကွးဘာအံၚ် (၂) တန် တိုန် (၃) တန်တံဂှ် ဍေံတံ ဂွံလဝ်လိက်မန်ဟေၚ်ရ။ ကောန်ၚာ်တန်မူလဂှ်တှေ် ပ္ဍဲဘာကောန်ဂကူမန်ဂှ် ဗ္တောန်လဝ်ဗတ်မန်ဖအိုတ်ရ။ ဂၞန်တံ မုတံ ဘာသာဗၟာတံ သွဟ်ကဵုအရေဝ်ဂွံမာန်တှေ်လေဝ်။ ဟွံအံၚ်တှေ် ဒးက္လေၚ်မံၚ်တန်ဂှ်ပၠန်” သာ်ဝွံ ဟီုရ။
ဇၟာပ်ကာလပြံၚ်လှာဲ သၞောတ်ပရေၚ်အုပ်ဓုပ်မ္ဂး တၚ်တုပ်စိုတ်ပရေၚ်ပညာၜါလ္ပာ်ဂှ် အကာဲအရာဒးသဳကၠဳပ္ညဳပ္ညပ်နွံတုဲ ကိစ္စဒးသွဟ် Placement Test လၟုဟ်ဏံဂှ်လေဝ် နူဌာနပညာကောန်ဂကူမန် သွက်ဂွံအာစိုပ်ပ္ညဳပ္ညပ်နွံရောၚ် ဂးရ။
နူလက်ထက်အလဵုအသဳကၠာတေံရ ဘာအလဵုအသဳကဵုဒှ်၊ ဘာပူဂဵု (ပုဂ္ဂလိက) ကဵုဒှ် မိက်ဂွံဆုဲပြံၚ် ဘာဗ္တောန်ပညာသဇိုၚ်မ္ဂး မူဝါဒ ဒးသွဟ် Placement Test မွဲ နွံရဂှ်လေဝ် ညးစုက်လုက်ကဵု ပွဳဗွိုၚ်ပရေၚ်ပညာမွဲတၠ ဟီုရ။
“နူကၠာကၠာတေံရ လုပ်ဘာအလဵုအသဳတှေ် ဒးသွဟ်ဗီုလၟုဟ်ဏံဂှ် တုပ်လဝ်စိုတ်တုဲမံၚ်ရ။ ဗွဲကြဴဏံ သၞာံလအ်ကၠုၚ်တှေ် အကြာဂှ် ဟွံဒှ်သွဟ်မွဲသာ် နွံကၠုၚ်ရ။ ဍာံဍာံဂှ်တှေ် အစဳဇန်ဏံဂှ် ကွးဘာစိုပ်မံၚ်မ္ၚးတံ နမိက်ဂွံကဵုလုပ်ပ္ဍဲဘာတုဲ ကၠောန်သ္ပလဝ်ရ။ သီုဖအိုတ် က္လေၚ်အာအတိုၚ်မူဝါဒဟာဂှ်တှေ် ဟီုဟွံဒးပုဟ်” သာ်ဝွံ ညးဟီုရ။
ဆဂး အခိၚ်လၟုဟ်ဏံ နူဘာပူဂဵု (ပုဂ္ဂလိက) ကဵု ဘာအလဵုအသဳမွဲစွံတံဝွံ ညးမိက်ဂွံပြံၚ်ဘာဂမၠိုၚ်တံ ဟွံဒးသွဟ် Placement Test ရဂှ်လေဝ် ဂွံတီကေတ်ရ။
ဟိုတ်နူစရာဲဍာ်ဒကေဝ်ကွးဘာ နူဘာကောန်ဂကူမန်ဟွံသေၚ်တုဲ နကဵုသၞောတ်ဟေၚ် ကွးဘာဂမၠိုၚ် ဒးဆဵုဂဗအာခက်ခုဲဂှ်ရ က္လေၚ်ပ္ညဳပ္ညပ်အာရောၚ် ပ္ဍဲဝိုၚ်သဳကၠဳ MNEC ဂှ် အ္စာဇြေ နူကမ္မတဳပရေၚ်ပညာကောန်ဂကူမန် ဟီုဂးလဝ်ရ။
အတိုၚ်ကမ္မယှေန်ပၞာန်တံ လလောၚ်ပ္တိတ်လဝ်ဂှ်မ္ဂး Placement Test ဂှ် ပ္ဍဲဂိတုဂျောန် စၟတ်တ္ၚဲ (၁၅) စဵုကဵု (၂၀) ဂှ် ကၠောန်ဗဒှ်အာ ပ္ဍဲဌာနစၟဳစၟတ်လိက် ပွိုၚ်ဍုၚ်မဆေၚ်စပ်တံဂှ်တုဲ နကဵုလက္ကရဴအိုတ် ဂိတုဂျောန် (၅) ဂှ် ဒးပ္တိုန်လဝ်စရၚ်ရ။
ကွးဘာအံၚ် Placement Test ဂမၠိုၚ်တံဂှ် စနူသၞာံဗ္တောန်ပညာ (၂၀၂၆ – ၂၀၂၇) ဏံတုဲ က္လေၚ်ကဵုအခေါၚ်တိုန်စိုပ် ပ္ဍဲဘာဗ္တောန်ပညာသဇိုၚ်အလဵုအသဳဂှ်ရောၚ် နူဌာနဝန်ဇၞော်ပရေၚ်ပညာ လလောၚ်ပ္တိတ်လဝ်ရ။
ဘာကောန်ဂကူမန်ဝွံ ပ္ဍဲသၞာံဗ္တောန်ပညာလၟုဟ်ဏံလေဝ် ညးပြံၚ်အာ ဘာဗ္တောန်ပညာသဇိုၚ်လ္တူဍုၚ်၊ ဘာပုဂ္ဂလိက ကေုာံ ခဒမ် (ဘော်ဒါဆောၚ်) တံ နွံဒၟံၚ်အတိုၚ်ဓမ္မတာ (ဗီုတြေံ) ရဂှ်လေဝ် ဂွံတီကေတ်ရ။