နူဗဒိုပ်ဗျူဟာဝါအနာၚ်၊ မၞုံပ္ဍဲသ္ကုတ်ဂၠံၚ်ဇြပ်ဗု-ကျာ်ပိ၊ ပွိုၚ်ဍုၚ်လှာဒကှ်၊ တွဵုရးကရေၚ်ဂှ် ပ္ဍဲဂိတုဂျောန် စၟတ်တ္ၚဲ (၂၁၊ ၂၂) ဏံ ပန်ပှော်ကဵုလွဟ်ဇၞော် လ္ပာ်ကွာန်ပွဳဗွိုၚ်ကြပ်ကြပ်တံဂှ်ရောၚ် ဂွံတီကေတ် နူညးဒေသတံရ။
နူဗဒိုပ်ဗျူဟာဝါအနာၚ်ဂှ် ပန်ပှော်ဏာဒၟံၚ် လွဟ်ဇၞော်ကီု စက်ဗရုသာဲကီုနွံရောၚ် ညးဗြဴဒေသဝါအနာၚ်မွဲတၠ ဟီုရ။
ဟိုတ်နူလွဟ်ဇၞော်ဂမၠိုၚ် ဒတုံခတိုဟ်အာ လ္တူသ္ၚိမၞိဟ်ဒၟံၚ်ဂှ်ရ အပ္ဍဲကဵုပန်ပှော်ဏာ ပွိုၚ် (၂) တ္ၚဲဂှ်မ္ဂး သၟာၚ်နူမိနော်ကောန်စဴ နူကွာန် (ပုတော) ပိတၠဂှ်တုဲ ၝဲဒေံ နူကွာန် (ဝေန်ခဏ) ၜါတၠဂှ်လေဝ် ဒးအာဘဲဝပ်နွံကီု ညးဆက်ဟီုရ။
“တ္ၚဲတေံဂှ်လေဝ် စပန်ဏာ လ္ပာ်ကွာန် (ဝေန်ခဏ) ရ။ နူတနေံဗ္တံဂှ်လေဝ် ထပ်ပန်ဏာ လ္ပာ်ကွာန် (ပုတော) ကဵု (ပန်းအောၚ်) ရ။ မဒတုံစှေ် ပ္ဍဲကွာန် (ပုတော) ဂှ် ဒတုံစှေ်လ္တူသ္ၚိဒၟံၚ်ရ။ ကောန်ကွာန်ဝါအနာၚ်ဟေၚ် မံၚ်ဒၟံၚ်အေဂှ်ရ။ ပ္ဍဲ (ပန်းအောၚ်) ဂှ်တှေ် ဟွံဒးမၞိဟ်ပုဟ်” သာ်ဝွံ ညးဗြဴဂှ် ဟီုရ။
သွက်သ္ဂောံက္လေၚ်ဂွံ ဗဒိုပ်မုဟ်ဒဵု (တောၚ်စွန်း) ဒပ်ပံၚ်ကောံပၠန်ဂတးတံ ဗ္တိုက်သီဂွံလဝ် ပ္ဍဲဗဒဲါဗဒိုပ်ဗျူဟာဝါအနာၚ်ဂှ်ဝွံ ဂိုတ်ဂ္စာန်ဒၟံၚ် သွက်ဂွံထ္ပက်ကရောၚ်ပၞာန်တုဲ ပန်ဘမံၚ်ကဵု လွဟ်ဇၞော်ရဂှ် ညးလ္ၚတ်ပရေၚ်ပၞာန် သ္ကုတ်သၠုၚ်ကျာကၟိန်ဍုၚ်ဗၟာလ္ၚဵုတံ သ္ၚဳဂၠိပ်လဝ်ရ။
ဟိုတ်ဂှ်ရ သွက်သ္ဂောံက္လေၚ်ဂွံ ဗဒိုပ်မုဟ်ဒဵုဂှ် ပလေဝ်ပလေတ်မံၚ်တုဲ အခိၚ်လၟုဟ်ဏံ ပ္ဍဲသ္ကုတ်ဂၠံၚ်ဝါအနာၚ်၊ လောတ်ယှာန်ကဵု တညေန်ဂှ် နူကဵုဂကောံဒပ်ပၞာန်တံ ဗပေၚ်လဝ်ဇြဟတ်ရ။
သၟာၚ်နူဂှ်ပၠန် သွက်သ္ဂောံက္လေၚ်ဂွံ ဍုၚ်ကျာ်ပိ မဒှ်အဓိကပရေၚ်ဆက်စၠောံဗၞိက်ဂှ် နူဒပ်ပၞာန် က္လေၚ်အာတ်ကေတ်မံၚ် ဇရေၚ်ဂကောံဒဳကေဗဳအေဂှ် ပရိုၚ်မံက်တိတ်မံၚ်ဂှ်ရ နကဵုပရေၚ်ပၞာန် စချဳဓရာၚ်မံၚ်ရောၚ်ဂှ်လေဝ် သ္ၚဳဂၠိပ်လဝ်နွံရ။
သၞာံ (၂၀၂၄) တုဲကၠုၚ်တေံ သွက်သ္ဂောံသီကေတ် ဗဒိုပ်ဗျူဟာဝါအနာၚ်ဂှ် ဒပ်ပံၚ်ကောံပၠန်ဂတးတံ ဓမံက်ရုပ်ရဴပေဲါဗ္တိုက်တုဲ သၟာၚ်နူပေဲါဗ္တိုက်ၜါလ္ပာ်သ္ကာတ်မြဟ်ဂှ်မ္ဂး လ္ပာ်ကမ္မယှေန်ပၞာန်တံ ပန်ကဵုလွဟ်ဇၞော်၊ ထောံဖျေံဗမ်ကဵုက္ၜၚ်ကျာဏီရ။
ဟိုတ်ဂှ်ရ ညးဒေသလၟိဟ်ကဵုကၠံ နူကွာန်ယျေဝ်တဃောန်၊ ဗ္ဒဝ်ၜါတၞံ၊ လောတ်ယှာန်၊ ဝါအနာၚ်၊ တညေန်၊ ဖာယာ မၞုံဗဒဲါပွဳဗွိုၚ်ဗဒိုပ်ဗျူဟာဝါအနာၚ်ဂှ်ဝွံ စဵုကဵုတ္ၚဲဏံ ဒးဂြိပ်ပဲါဒဴ ဇူဒီုဒၟံၚ်ဒၞာဲဗၠးဘဲရ။