ပ္ဍဲဒေသကၞောတ်ၜဳရေဝ်၊ တိဍာ်ဗော်ဍုၚ်မန်တၟိထိၚ်ဒဝ်ဂှ်ဝွံ ဟွံဒှ်ပေဲါဗ္တိုက်မွဲသာ်ကီုလေဝ် နူကဵုကမ္မယှေန်ပၞာန်တံ ကၠုၚ်ထောံဖျေံမံၚ်ဗမ် မွဲနှေံမွဲနှေံဂှ်ရ ပရေၚ်မံၚ်စံၚ်အာကၠုၚ်ဟွံဂီုကၠီုရဂှ် ညးဒေသတံ ဟီုရ။
အပ္ဍဲဒေသဂှ်ဝွံ စပ္တံနူဂိတုမေအိုတ်ဂှ် ဒးဒုၚ်ဗ္တိုက်ကဵုက္ၜၚ်ကျာ (၃) ဝါတုဲ စဵုကဵုတ္ၚဲဏံ က္ၜၚ်ကျာဂေတ်ကၚ်တံ ဆက်ဂေတ်ပဝ်မံၚ်ဂှ်ရ ညးပဲါဒဴဘဲပၞာန်ဂၠိုၚ်ကၠုၚ်မံၚ်ရောၚ် ဂွံတီကေတ်ရ။
ဟိုတ်ဂှ်ရ မံၚ်စံၚ်တန်တဴဒၟံၚ် ပ္ဍဲတိဍာ်ဗော်ဍုၚ်မန်တၟိထိၚ်ဒဝ်ကီုလေဝ် အခိၚ်ဟွံရုဲ နူကမ္မယှေန်ပၞာန်တံ ကၠုၚ်စိုပ်ထောံဖျေံဗမ်မာန်ဂှ်ရ ပရေၚ်မံၚ်စံၚ်အာကၠုၚ်ဟွံဂီုကၠီုရဂှ် ညးတြုံဒေသမွဲတၠ ဟီုရ။
“လ္ပာ်ဏံဂှ်တှေ် ဂွံမံၚ်စံၚ်ဂှ် ဟွံဂီုကၠီုကွေံရပုဟ်။ အခိၚ်ဟွံရုဲ ကၠုၚ်ထောံဖျေံမံၚ်ဗမ်တှေ် ဒးဖေက်မံၚ်ရ။ ဗွဲကရဴဏံလေဝ် ၜၚ်ကျာဂှ် ဗီုကၠာတေံဟွံသေၚ်ရပုဟ်။ ကၠာဟွံမိၚ်ရမျာၚ်ဂှ် ထောံဖျေံဗမ်တုဲမှ ဂွံမိၚ်ကေတ်ရမျာၚ်ၜၚ်ကျာရ။ ဟိုတ်ဂှ်ရ အခိၚ်ဗ္တံတှေ် ဗွဲမဂၠိုၚ်ဂှ် ဟွံဂံၚ်တိက်ရပုဟ်” သာ်ဝွံ ညးဟီုရ။
ညးဒေသကွာန်ခၟောံ ကေုာံ ၜါသွာၚ် ဒးဆဵုဗဂ ဘဲအန္တရာဲထောံဖျေံဗမ်ကဵုက္ၜၚ်ကျာဂှ်ဝွံ ဒးဂြိပ်ပဲါဒဴဒၟံၚ် ဒၞာဲဗၠးဘဲဖိုဟ်ရ။
နကဵုညးဒေသဂြိပ်ပဲါဒဴဟွံမာန်ဏီတံ ဗွဲမဂတာပ်အခိၚ် ညံၚ်ဂွံဂြိပ်ပဲါဒဴ ကၠာဟွံဂွံထောံဖျေံဗမ်မာန်ဂှ်မ္ဂး ဒစးဒုၚ်ပလေဝ်ပလေတ် ပကောံပကေဝ်လဝ် ဇွောံမစၞစ ကေုာံ ဂၠိက်ယာတ်နွံရဂှ် ညးဒေသကၞောတ်ၜဳရေဝ်မွဲတၠပၠန်ဂှ် ဟီုရ။
“ဟွံပဲါဏီလေဝ် စွံသတိတုဲ ဒးမံၚ်ဒၟံၚ်ရ။ ၜၚ်ကျာတံ ထပ်ကၠုၚ်ထောံဗမ်မာန်ဏီ ဂွံမိၚ်မံၚ်ပရိုၚ်ဂှ်တှေ် ညးဂြိပ်ပဲါဒဴတံလေဝ် ဟွံဂံၚ်စဴတုဲ ညးနွံမံၚ်ပ္ဍဲကွာန်တံလေဝ် ဖေက်လကိုတ်မံၚ်အိုတ်ရ” သာ်ဝွံ ညးဟီုရ။
အခိၚ်ကၠာသ္ၚိဒၟံၚ်နိပေါန်ဖံၚ်ဒေယှေန် ဒးဒုၚ်ထောံဖျေံဗမ်ဏီဂှ်မ္ဂး နူကဵုညးဂြိပ်ပဲါဒဴ ပ္ဍဲကၠအ်ဂူ၊ သ္ၚိမသကောဒေံ၊ ဘာလကျာ် အပ္ဍဲကွာန်ဗော်ဍုၚ်မန်တၟိထိၚ်ဒဝ် နူကဵုဟွံအောန်နူ (၇၀၀) ဂှ် အခိၚ်လၟုဟ်ဏံ (၁၀၀၀) တၠပြၚ်ကၠုၚ်ရောၚ် ညးစုက်လုက်ဂမၠိုၚ်တံ ဟီုရ။
ပ္ဍဲကဵုဒၞာဲညးဂြိပ်ပဲါဒဴဘဲပၞာန်ဂမၠိုၚ်ဂှ်ဝွံ နွံပၟိက်ဒၟံၚ်ကဵု ဂဥုဲဇဗ၊ စၞစဇွောံမ ကေုာံ ကပေါတ်ကၟဳ/ဒၞာတံရ။
ပ္ဍဲသ္ကုတ်သၠုၚ်ကျာကၟိန်ဍုၚ်ဗၟာဝွံ ပေဲါဗ္တိုက်ၜါလ္ပာ် ကေုာံ ပရေၚ်ပြုပြေၚ်ပၞာန်ဇၞော်ဇၞော် အောန်စှေ်ကီုလေဝ် ညးဍုၚ်ကွာန်တံ ပရေၚ်ဂီုကၠီုဟွံမွဲမွဲသာ် အခိၚ်လၟုဟ်ဏံ ဒးဂွိၚ်မံၚ်ဘဲအန္တရာဲက္ၜၚ်ကျာဂၠိုၚ်အိုတ်ရောၚ် နူဇာနှိက်ဓဝ်ဗ္စာရဏာဆာန်ဍူမၞိဟ် သ္ကုတ်သၠုၚ်ကျာကၟိန်ဍုၚ်ဗၟာ ထံက်ထ္ၜးလဝ်ရ။