ဒၞာဲဗဒိုပ်ညးဒှ်ဒဒိုက် “နဳပေါန်ဖံၚ်ဒေယှေန်” မၞုံအပ္ဍဲဒေသကၞောတ်ၜဳရေဝ်၊ တိဍာ်ဗော်ဍုၚ်မန်တၟိထိၚ်ဒဝ်ဂှ်ဝွံ နူကမ္မယှေန်ပၞာန်တံ ကၠုၚ်စိုပ်ဗ္တိုက်ထောံဖျေံဗမ်ကဵုက္ၜၚ်ကျာရဂှ် တမ်ရိုဟ်ပရိုၚ်ဗလးတိတံ ဟီုရ။
တ္ၚဲဏံ ဂိတုဂျောန် (၁၈)၊ အခိၚ်နူဂယးပြဟ် ၜိုတ် (၁) နာဍဳပြၚ်ဂှ် နူက္ၜၚ်ကျာကမ္မယှေန်ပၞာန် ကၠုၚ်စိုပ်ဂြာတ်ထောံဖျေံဗမ် ပံၚ် (၅၀၀) ၜါမ ပ္ဍဲဒၞာဲဗဒိုပ်ညးဒှ်ဒဒိုက် နဳပေါန်ဖံၚ်ဒေယှေန်ဂှ်ရ။
ပ္ဍဲကဵုဂြာတ်ထောံဖျေံဗမ်ဂှ်ဝွံ မၞိဟ်ဒးဘဲဇီုကပိုက်ချိုတ်ဂျိုၚ်ဟွံမွဲကီုလေဝ် သ္ၚိဒၟံၚ်ညးဒှ်ဒဒိုက် နဳပေါန်ဖံၚ်ဒေယှေန် (၄) မ လီုလာ်အာတုဲ ဘာကောန်ဂကူမန် တန်မူလ (၁) ဘာကဵု ကၠအ်ဂူတံ ဒးကဝေက်ဗမ်လီုလာ်အာနွံရောၚ် နူတမ်ရိုဟ်ပရိုၚ်ဗလးတိမွဲတၠ ဟီုရ။
“မၞိဟ်ဂှ်တှေ် ဒးဘဲချိုတ်ဂျိုၚ်ဟွံမွဲပုဟ်။ ဂြာတ်ထောံဖျေံ မပထမဂှ်ဗက် မၞိဟ်တံ ဂြိပ်တဵုနူဒၞာဲသတိက်ရ။ ဟိုတ်ဂှ်ရ ထပ်ဂြာတ်ဖျေံ မဒုတိယဂှ်တှေ် ဟွံဒးမၞိဟ်ရ။ သ္ၚိ (၄) မဂှ်တှေ် လီုလာ်အာဖအိုတ်ရ။ ဘာတန်မူလနွံမံၚ်ဂှ်လေဝ် ဒးအာညိညနွံရ။ ဒးဟီုတှေ် ကြပ်မွဲကွာန်ဂှ် ပရေၚ်လီုလာ်နွံရ” သာ်ဝွံ ဟီုရ။
ဗွဲကြဴနူဂြာတ်ထောံဖျေံဗမ်တုဲဂှ်မ္ဂး ညးဒေသလ္ၚဵု က္လေၚ်စဴကၠုၚ် နူကွာန်မၞုံကြပ်ပွဳဗွိုၚ်တံဂှ် ဒးဂြိပ်ပဲါအာ ဒၞာဲဗၠးဘဲရောၚ် ဂးရ။
လ္ပာ်ကွာန်ဒေသကၞောတ်ၜဳရေဝ်ဂှ်ဝွံ ကမ္မယှေန်ပၞာန်တံ အခိၚ်ဟွံရုဲ ကၠုၚ်စိုပ်ဗ္တိုက်ဂြာတ်ထောံဖျေံဒၟံၚ်ဗမ်ဂှ်ရ ပရေၚ်ဂီုကၠီုဟွံမွဲရဂှ်လေဝ် ဂးလဝ်ရ။
“ဒေသကၞောတ်ၜဳရေဝ်ဂှ်တှေ် သွက်ဂွံမံၚ်တန်တဴဂှ် ဒှ်ဒေသဖျေံစိုတ်ဂွံ ဟွံသေၚ်ပေၚ်ပေၚ်ရ။ ၜၚ်ကျာဍေံတံဂှ်လေဝ် ရမျာၚ်ဟွံတိတ်ပုဟ်။ နူဗ္တံဏံ ဍေံတံကၠုၚ်ဂြာတ်ဖျေံတုဲမှ ဂွံမိၚ်ရမျာၚ်ၜၚ်ကျာရ။ မၞိဟ်အေလ္ပာ်ဂှ်ဂှ်လေဝ် ပ္ဍဲကဵုဒေသဗၠးဘဲဂှ်ဟေၚ် မိက်ဂွံကဵုမံၚ်ဏီရ။ ဂွံက္လေၚ်ကၠုၚ်မံၚ်ပ္ဍဲကွာန်ဂှ် ဟွံဂီုကၠီုပုဟ်” သာ်ဝွံ ဟီုရ။
ဂိတုဂျောန် စၟတ်တ္ၚဲ (၃) တုဲကၠုၚ်ဏံဂှ်လေဝ် ဒၞာဲမၞုံကြပ်ကဵု ဗဒိုပ်ညးဒှ်ဒဒိုက် နဳပေါန်ဖံၚ်ဒေယှေန်ဂှ် ကမ္မယှေန်ပၞာန်တံ ကၠုၚ်စိုပ်ဗ္တိုက်လဝ်ကဵုက္ၜၚ်ကျာတုဲ ကောန်ညးဍုၚ်ကွာန်မွဲတၠ ဒးချိုတ်အာလဝ်ကီုရ။