ပ္ဍဲဒေသကၞောတ်ၜဳရေဝ်၊ ပွိုၚ်ဍုၚ်ရေဝ်၊ တွဵုရးဍုၚ်မန်ဝွံ ဟိုတ်နူကမ္မယှေန်ပၞာန် ထောံဖျေံဗမ်ကဵုက္ၜၚ်ကျာတုဲ ညးဒးဂြိပ်ပဲါဒဴမံၚ်ဘဲပၞာန် ၜိုတ် (၇၀၀) တၠ နွံပၟိက်ဒၟံၚ်ရီုဗၚ်ကာတၟေၚ်ရောၚ် ညးကဵုရီုဗၚ်ပဲါဒဴဘဲပၞာန်တံ ဟီုရ။
သၟာၚ်နူကမ္မယှေန်ပၞာန် ဂြာတ်ထောံဖျေံဗမ် အဆက်ဆက် (၂) ဝါတုဲ ဇၟာပ်တ္ၚဲ ဂေတ်ပဝ်မံၚ်ကၚ်နကဵုက္ၜၚ်ကျာဂှ်ရ နူကဵုကွာန် (ခၟောံ – ကၚ်မွန်း၊ ၜါသွာၚ် – ချောၚ်းနှစ်ခွ၊ အပေါ်ရစ်ချောၚ်း၊ အောက်ရစ်ချောၚ်း၊ တယ်ပြား) ဂှ် လၟိဟ်မၞိဟ် ၜိုတ် (၇၀၀) တၠ ဒးဂြိပ်ပဲါဒဴမံၚ်ရောၚ် ညးကဵုရီုဗၚ်ပဲါဒဴဘဲပၞာန်မန်မွဲတၠ ဟီုရ။
“လၟိဟ်မၞိဟ်ဂှ်တှေ် ဟွံဂွံကံက်လဝ်ချိုတ်ချိုတ်ပၠိုတ်ပၠိုတ်ဏီပုဟ်။ ၜိုတ်ပိုဲအာစိုပ်ထံက်ပၚ် လဝ်ဂှ်တှေ် လၟိဟ်မၞိဟ် အကြာ (၆၅၀) ကဵု (၇၀၀) နွံရ။ လ္ၚဵုဂှ်တှေ် အခိၚ်တ္ၚဲ က္လေၚ်စဴရံၚ်မွဲ စုတ်ရ။ အခိၚ်ဗ္တံတှေ် ဟွံဂံၚ်တိက်ပုဟ်။ မံၚ်ဒၟံၚ်ကွာန်တၞဟ်ရ” သာ်ဝွံ ညးဟီုရ။
ညးပဲါဒဴဘဲပၞာန်ဂမၠိုၚ်တံဝွံ ဂြိပ်ပဲါဇူဒီုဒၟံၚ် ဒၞာဲဗၠးဘဲ မပ္တံပ္ဍဲကၠအ်ဂူ၊ ခလံက်ဒနဳ၊ ကွာန်ဘာ ကေုာံ လ္ပာ်ဍုၚ်ရေဝ်တေံရောၚ် ဂးရ။
ညးဂြိပ်ပဲါဒဴဗွဲမဂၠိုၚ်တံဂှ် ကောံမံၚ်ဒၟံၚ် ပ္ဍဲကၠအ်ဂူ ကေုာံ ပ္ဍဲဘာလကျာ် ကွာန်ချေံဍာ်ဂှ်တုဲ နွံပၟိက်ဒၟံၚ် စၞစဇွောံမ၊ ဂဥုဲဇဗ ကေုာံ ကပေါတ်ဒၞာကၟဳတံရောၚ် ညးဆက်ဟီုရ။
“ကၠုၚ်ကောံဒၟံၚ် ပ္ဍဲချေံဍာ်ရ။ အကြာဏံဂှ်တှေ် နကဵုရီုဗၚ်ကာတၟေၚ် သ္ၚုတံ၊ စၞစသုၚ်သဇိုၚ်တံ၊ ဂဥုဲဇဗတံလေဝ်ဏး။ တုဲတှေ် ကပေါတ်ဒၞာကၟဳတံဂှ်လေဝ် နွံပၟိက်ကီုရ။ စၞစဇွောံမနူရေဝ် ဂွံပလံၚ်လ္ပာ်ဏံဂှ် ပ္ဍဲသၞေဟ်ကၚ်ကမ္မယှေန်ပၞာန်တံ ဗီုကဵုပတေၚ်မံၚ်ညိညိရ” သာ်ဝွံ ဟီုရ။
အတိုၚ်အကာဲအရာလၟုဟ်ဏံမ္ဂး ညးကၠုၚ်စိုပ်ကဵုရီုဗၚ် ကုညးပဲါဒဴဘဲပၞာန်တံ အောန်မံၚ်ဂှ်ရ စၞစဇွောံမကေတ်နၚ်လဝ် အဃောဂြိပ်ကၠုၚ်ဂှ်ကဵု သြန်ညိညဂှ်ဟေၚ် ရာန်စသုၚ်ဒၟံၚ်တုဲ အခိၚ်လအ်ကၠုၚ်မ္ဂး ဒှ်ခက်ခုဲမာန်ရောၚ် ညးကဵုရီုဗၚ်ပဲါဒဴဘဲပၞာန်တံ ဟီုရ။
ပ္ဍဲဒေသကၞောတ်ၜဳရေဝ်ဝွံ ကြပ်ဇၟာပ်တ္ၚဲ က္ၜၚ်ကျာဂေတ်ပဝ်ဒၟံၚ်ၜါအဒိုတ်ပြၚ်တုဲ နကဵုအခိၚ်ဓမ္မတာ (လၟေၚ်ဍာံ) ဟွံသေၚ်ဂှ် သီုဗ္တံသီုတ္ၚဲ ဒဳဂေတ်ပဝ်မံၚ်ကၚ်ရောၚ် ညးဒေသကၞောတ်ၜဳရေဝ်မွဲတၠ ဟီုရ။
“ၜၚ်ကျာဂေတ်ပဝ်မံၚ်ဂှ် ဗီုဓမ္မတာဟွံသေၚ်ပုဟ်။ ဆဠတှေ် အခိၚ်တ္ၚဲစေၚ် (၁) နာဍဳ၊ ဆဠပၠန်တှေ်လေဝ် အခိၚ်ဗ္တံ၊ တုဲတှေ် အခိၚ်ဗ္တံ (၁၀) နာဍဳ၊ (၁၁) နာဍဳ ဂေတ်မံၚ်၊ ဂေတ်မံၚ်ဂှ်တှေ် အရိုဟ်တ္ၚဲရ” သာ်ဝွံ ညးဟီုရ။
ဟိုတ်ဂှ်ရ ညးဒေသဂမၠိုၚ် ဟွံဂံၚ်စဴကွာန်တုဲ ညးသှေ်မံၚ်အပ္ဍဲကွာန်ဂမၠိုၚ်တံလေဝ် သွက်ဂွံထပ်ဂြိပ်ပဲါဒဴနွံရဂှ်လေဝ် ညးဒေသဂှ် ဆက်ဟီုလဝ်ရ။
ဂိတုမေ (၂၇) တုဲကၠုၚ်တေံ ပ္ဍဲကဵုကွာန်ခၟောံ ကေုာံ ပွဳဗွိုၚ်ဗဒဲါဗဒဲါတံဂှ် ကမ္မယှေန်ပၞာန်တံ ကၠုၚ်စိုပ်ထောံဖျေံဗမ် နကဵုက္ၜၚ်ကျာဗ္တိုက်ပၞာန်တုဲ ဂိတုဂျောန် စၟတ်တ္ၚဲ (၃) တုဲကၠုၚ်ဏံဂှ်လေဝ် ဗ္တိုက်ထောံဖျေံဗမ် ကြပ်ကွာန်ၜါသွာၚ်ဂှ်တုဲ ပရေၚ်မၞိဟ်ချိုတ်ဂျိုၚ် နွံကၠုၚ်လဝ်ရ။