ပ္ဍဲကွာန် ကေုာံ အရာပ် မၞုံအပ္ဍဲတွဵုရးဍုၚ်မန်ဝွံ ညးမိက်ဂွံစကာပံက်သံၚ်ဗံက်၊ စက်သၠဲရမျာၚ်တံ အောန်အိုတ် ဒးပ္တိုန်စရၚ်အာတ်အခေါၚ် ဒစးဒုၚ် (၃) တ္ၚဲ ဇရေၚ်သ္ကိုပ်အုပ်ဓုပ်ကွာန်/အရာပ် မဆေၚ်စပ်တံဂှ်ရောၚ် ပ္ဍဲဂိတုဂျောန် စၟတ်တ္ၚဲ (၂၀) တုဲကၠုၚ်ဏံ ညးတာလျိုၚ်ကွာန်/အရာပ် မဆေၚ်စပ်တံ ဆဝ်မ္ၚုဟ်ကဵုလဝ်သမ္တီရ။
အတိုၚ်ဆဝ်မ္ၚုဟ်ကဵုလဝ်သမ္တီဂှ်မ္ဂး ညးမိက်ဂွံပံက်တံ၊ ပရူပရာဒးပံက်နကဵုဂကောံ၊ စၟတ်တ္ၚဲ ကေုာံ အခိၚ်ပံက်စကာဂှ် ဒးဓမံက်ထ္ၜးတုဲ အောန်အိုတ် ဒးပ္တိုန်စရၚ်ဒစးဒုၚ် (၃) တ္ၚဲရ။
လိက်ဂရၚ်ပ္တီပ္တိုန်စရၚ်ဂှ်ဝွံ သ္ကိုပ်အုပ်ဓုပ်ကွာန်/အရာပ် မဆေၚ်စပ်တံ စၟဳစၟတ်တုဲမ္ဂး နကဵုဓမ္မတာ စနူဂယး (၆) နာဍဳ စဵုကဵုဗ္တံ (၉) နာဍဳဟေၚ် ကဵုအခေါၚ်ပံက်ရောၚ် ဂွံတီကေတ်ရ။
“ညးမိက်ဂွံပံက်စက်သၠဲရမျာၚ်တံ ဓမံက်ထ္ၜး ပရူဒဒှ်မိက်ဂွံပံက်၊ စၟတ်တ္ၚဲကဵု အခိၚ်တုဲ အောန်အိုတ် ဒးပ္တိုန်စရၚ်ဒစးဒုၚ် (၃) တ္ၚဲရ။ စၟဳစၟတ်လိက်ပ္တိုန်စရၚ်ဂှ်တုဲတှေ် ဗွဲမဂၠိုၚ်ဂှ် နူဂယး (၆) နာဍဳ ဒဵုကဵုဗ္တံ (၉) နာဍဳဟေၚ် ကဵုအခေါၚ်ပံက်ရ” သာ်ဝွံ ညးလိၚ်စ စက်သၠဲရမျာၚ်/သံၚ်ဗံက်မွဲတၠ ဟီုရ။
တုဲပၠန် ညံၚ်ဟွံဂွံဒှ်ပလာပ်ပထုဲကဵု ဒၞာဲညးဍုၚ်ကွာန်မံၚ်တန်တဴဂှ်မ္ဂး ရမျာၚ်ထတ်သာ မကဵုလဝ်အခေါၚ်ဂှ်ကဵု အခိၚ်ကာလစၟတ်လဝ်ဂှ်ဟေၚ် ဒးစကာပံက်အာတုဲ သၟာၚ်နူတၚ်ရန်တၟံ မကဵုလဝ်အခေါၚ်ဂှ်မ္ဂး သွက်ကိစ္စတၞဟ်တၞဟ် စကာဟွံဂွံရဂှ်လေဝ် ကဵုလဝ်သမ္တီရ။
အတိုၚ်နဲကဲဥပဒေအုပ်ဓုပ် ဂကောံကွာန်/အရာပ် ပိုဒ် ၁၄(ဂ)(၁) ဂှ်မ္ဂး ဒးဒ္ဂေတ်ဗက် အတိုၚ်နဲကဲဥပဒေဂှ်တုဲ ညးပံက်စက်သၠဲရမျာၚ် ဟွံဂွံအခေါၚ်မွဲသာ်တံဂှ် အတိုၚ်ဥပဒေအုပ်ဓုပ် ဂကောံကွာန်/အရာပ် ၝောံပိုဒ် (၂၇) ဂှ်မ္ဂး သြန်ဟွံဂၠိုၚ်နူမွဲဠက်ဒကေဝ် တပ်ဒဏ်မာန်ရ။
ယဝ်ဟွံကဵုဒဏ်သြန်မ္ဂး နူရုၚ်သၞောဝ်ဓဝ် ကဵုဒဏ်ထံၚ်ဟွံဂၠိုၚ်နူ (၇) တ္ၚဲမာန်ရောၚ် ဓမံက်ထ္ၜးလဝ် ပ္ဍဲလိက်လလောၚ်ဂှ်ရ။
“လၟုဟ်ဏံ ဗီုကဵုဍေံတံအာဟီုဂှ် ဂွံဆဵုကေတ်ရ။ သ္ၚိပံက်လဝ်သံၚ်ဗံက်ထတ်ထတ်တံဂှ် ညံၚ်ဂွံပံက်သာသာ၊ လ္ပကဵုၜက် (၉) နာဍဳဗ္တံတံ ဗီုကဵု ကဵုသတိဂှ် ဂွံဆဵုကေတ်ရ။ ကေတ်အရေဝ်ဂှ်တှေ် ဟွံဂွံကေတ်ဏီပုဟ်” သာ်ဝွံ ညးဒေသမွဲတၠ ဟီုရ။
ပ္ဍဲကဵုကွာန် ကေုာံ အရာပ် မၞုံအပ္ဍဲတွဵုရးဍုၚ်မန်ဝွံ သွက်ဂွံထိၚ်ဒဝ်ကောပ်ကာဲ ပရေၚ်စကာစက်သၠဲရမျာၚ်ကီု ကေုာံ ညံၚ်ဟွံဂွံဒှ်ပလာပ်ပထုဲကဵု ညးဍုၚ်ကွာန်ဒၟံၚ်တန်တဴမံၚ်တံဂှ်ကီု ရန်တၟံတုဲ ဖျေံစၞောန်လဝ်ရ။
သၟာၚ်နူကိစ္စကဵုလဝ်အခေါၚ်ဂှ်မ္ဂး စကာသွက်တၚ်ရန်တၟံတၞဟ်တၞဟ် ဟွံဂွံတုဲ ညးတာလျိုၚ်တံ ထေၚ်ခယျနွံပၟိက်မ္ဂး ဗဒေံါအခေါၚ်ကဵုလဝ်ဂှ်မာန်ရောၚ် ဓမံက်ထ္ၜးလဝ် ပ္ဍဲလိက်လလောၚ်ဂှ်ရ။
သွက်ဂွံကေတ်အရေဝ် စက်သၠဲရမျာၚ်/သံၚ်ဗံက်မာန်ဂှ်ဝွံ ပ္ဍဲကၠတ်ထဝ်တွဵုရးဍုၚ်မန် အလန်တတိယ ကောံဓရီုအလန်ဒုတိယ (တ္ၚဲပထမ) ဂိတုဂျောန် (၉) ဂှ် ပၠောပ်ဏာဂလာန်တုဲ ပ္ဍဲဂိတုဂျောန် (၁၂) ဂှ် သ္ပဏာဒတန်ရ။
ပ္ဍဲပေဲါမ္ၚဵုကဵုဒါန်ဂမၠိုၚ် တွဵုရးဍုၚ်မန်ဝွံ ဟိုတ်နူရမျာၚ်သံၚ်ဗံက်ဂမၠိုၚ်ထတ်က္ညာန်ဂှ်တုဲ သၟာၚ်နူပြဒ္ဒညာပရေၚ်ထတ်ယုက် ညးမံၚ်တန်တဴပွဳဗွိုၚ်တံဂှ်မ္ဂး ကိစ္စပံက်သံၚ်ဗံက်ဂမၠိုၚ်ဏံ သကဵုဒှ်ပလာပ်ပထုဲစိုတ်ကီုဂှ်ရ ပ္တိုန်ထ္ၜးပၠောပ်ဏာဂလာန် ပ္ဍဲကၠတ်ထဝ်ရ။