ပ္ဍဲကၟိန်ဍုၚ်သေံ၊ ဒေသဖါန်ၚာဂှ်ဝွံ ကောန်ၚာ်ဗြဴ မၞုံယၟု မိအေမန် အာယုက် (၂) သၞာံပြၚ် ကၠေံမံၚ်ပွိုၚ် (၄) တ္ၚဲပြၚ်ဂှ် ဟွံဂွံကလေၚ်ဆဵုဏီရောၚ် ပရိုၚ်သေံဂမၠိုၚ်ချူဓမံက်လဝ်ဂှ် ဂွံဆဵုကေတ်ရ။
စနူဂိတုမေ စၟတ်တ္ၚဲ (၂၈) စဵုကဵုတ္ၚဲဏအ်ဝွံ ကောန်ၚာ်ဂှ် ကၠေံမံၚ်တုဲ ညးတာလျိုၚ်ဗၠာဲသၟိၚ်သေံ ကေုာံ ဂကောံရီုဗၚ်မၞိဟ်သေံတအ် အခိၚ်ဗ္တမ် အခိၚ်တ္ၚဲ ဂၠိုက်ဂၠာဲမံၚ်ကောန်ၚာ်ဂှ်သၟးဟွံက နကဵုအရီုဗၚ်ညးအရာပ် နွံကြပ်ဗ္ဒါဲတအ်ဂမၠိုၚ်လေဝ် ဘိုၚ်ဂၠာဲမံၚ်ကောန်ၚာ်ဗြဴမန် မကၠေံအာလဝ်ဂှ်ကီုရ။
ကောန်ၚာ်ဗြဴဏအ်ဝွံ အပါကီု မိကီု ဒှ်မံၚ်ဂကူမန်တုဲ ပ္ဍဲကဵုဂကောံသ္ၚိကၟိန်အိန်ထံၚ်ဂှ် ကလိဂွံလဝ် ကောန်တြုံမွဲတၠ ကောန်ဗြဴမွဲတၠတုဲ ပ္ဍဲကဵုဂိတုမေ စၟတ်တ္ၚဲ (၂၈) ၜိုတ်အခိၚ်နူဂယး (၁၀) နာဍဳဂှ် ကောန်ၚာ်ဗြဴဏအ် စကၠေံအာရ။
ပရူဒဒှ်ဏအ်ဝွံ “အပါကဵု ကောန်ၚာ်တြုံဂှ် နွံမံၚ်ပ္ဍဲသ္ၚိ၊ မိဂှ်ပၠန် နွံမံၚ်လက်ကြဴသ္ၚိ ကၠောန်သအးဇ္ၚးမံၚ်အုပ်ချဲ လတူဒဵုဂှ်တုဲ မိဂှ် စကာကဵုကောန်ၚာ်တြုံ ကေတ်ဍာ်သုၚ်ပ္ဍဲသ္ၚိဂှ် သီုကောန်ၚာ်ဗြဴဏအ်လေဝ် ဗက်အာလက်ကြဴကောဂၠုဂှ်တုဲ အခိၚ်ပွိုၚ် (၂၀) မိနေတ်ဂှ် ဂွံဆဵုကေတ်မံၚ်ကောန်ၚာ်ဗြဴဂှ်ဏီတုဲ လအ်ဂွံမွဲလစုတ် အပါဂှ် ကၠုၚ်စိုပ်သၟာန်ကောန်ၚာ်ဗြဴ ဇရေၚ်မိဂှ် ဟွံဆဵုကောန်တုဲ ကောန်ဂှ်ကၠေံအာရောၚ်” သာ်ဝွံ မိကဵုမကောန်ၚာ်ဗြဴဂှ် ဟီုလဴထ္ၜးနၚ်ရ။
ပ္ဍဲကဵုပွဳပွူသ္ၚိညးတအ်မံၚ်ဏအ်ဝွံ ကၟာဍာ်နွံမံၚ်တုဲ ပ္ဍဲကဵုဂှ် ဒၞါဲဍာ်ပလိုၚ်၊ ဂြိုပ်ဒဵု၊ ကၟာဍာ်တအ်အိုတ်သီုဂှ် ဂကောံရီုဗၚ်မၞိဟ်တအ် ဗက်ဂၠိုက်ဂၠာဲရံၚ်အိုတ်ဣရတုဲ ပြဟ်ဟ်ဏအ် ညးဇၞော်အရာပ်ဂှ် ဒှ်မံၚ်သလှ်ေပမာ ကုအပါကောန်ၚာ်ဗြဴကၠေံအာဂှ်ရ။
ဒှ်သာ်ဂှ်ရ ပရူဒဒှ်ဏအ်ဝွံ ညးတာလျိုၚ်ဗၠာဲသၟိၚ်သေံ ကေုာံ ညးဇၞော်အရာပ်တအ် ဒှ်မံၚ်သလှ်ေပမာ ကုအပါကောန်ၚာ်ဂှ်တုဲ ဗက်သၟာန်စၟဳစၟတ် ဂၠံက်ကေတ်မံၚ်အရေဝ်နွံရ။