ပ္ဍဲကဵုလ္ပာ်ကွာန် (ချောၚ်းစောၚ့်) ၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဝွံ ဒပ်ကမ္မယှေန်တံ ဗ္တိုက်ထောံဖျေံဗမ်ကဵုက္ၜၚ်ကျာ (၂) တ္ၚဲအဆက်ဆက်တုဲ ညးဒေသတံ ဒးဂြိပ်ပဲါဒဴအာ ဒၞာဲဗၠးဘဲနွံရဂှ် ဂွံတီကေတ် နူညးဒေသတံရ။
လ္ပာ်ကွာန် (ချောၚ်းစောၚ့်) ၊ ဂကောံကွာန် (ကျောက်ဖျာ) ၊ ပွိုၚ်ဍုၚ်ကျာ်ထဝ်ဂှ်ဝွံ ပ္ဍဲဂိတုဂျောန် စၟတ်တ္ၚဲ (၁၈၊ ၁၉) တုဲကၠုၚ်ဏံဂှ် ဒပ်ကမ္မယှေန်တံ ဗ္တိုက်ထောံဖျေံဗမ်ကဵုက္ၜၚ်ကျာ (၂) တ္ၚဲအဆက်ဆက်ရ။
အပ္ဍဲကဵုဗ္တိုက်ထောံဖျေံဗမ်ဂှ်ဝွံ တၠဆေၚ်ဖျာ စၞစသုၚ်ကပေါတ်မရပ်စပ် သဝ်ကျဝ်တေအ် အာယုက် (၃၈) သၞာံ ပ္ဍဲကွာန် (ချောၚ်းစောၚ့်) ဂှ် ချိုတ်အာလဝဲါဂှ်တုဲ သမ္ဘာညး နဝ်လုလုဖဝ် သၟာၚ်နူဒးဘဲဝပ်သ္ကာတ်မြဟ်ဂှ်မ္ဂး အလုံဆေၚ်ဖျာမွဲဂှ်လေဝ် တူပၟတ်လီုလာ်အာကီုရောၚ် ဗော်သွးကရေၚ် ကေအေန်ယူ လလောၚ်ပ္တိတ်လဝ်ရ။
ပ္ဍဲကဵုဗ္တိုက်ထောံဖျေံဗမ်ကဵုက္ၜၚ်ကျာ ကွာန် (ချောၚ်းစောၚ့်) ဂှ်ဝွံ ဂကောံဒပ်ပၠန်ဂတးတံလေဝ် ဒးဘဲဇီုကပိုက်ချိုတ်ဂျိုၚ်နွံမံၚ်ရောၚ် တမ်ရိုဟ်ပရိုၚ်ဗလးတိတံ ဟီုရ။
တုဲပၠန် ပ္ဍဲဂိတုဂျောန် (၁၉) ဏံဂှ်လေဝ် ဒပ်ကမ္မယှေန်ပၞာန်တံ ထပ်ထောံဖျေံဗမ်ကဵုက္ၜၚ်ကျာ လ္ပာ်ကွာန် (ချောၚ်းစောၚ့်) ဂှ်ပၠန် ဂွံတီကေတ်ရ။
ဒပ်ကမ္မယှေန်ပၞာန်တံဝွံ ပန်ဗ္တိုက်ထောံဖျေံဗမ်ကဵုက္ၜၚ်ကျာ (၂) တ္ၚဲအဆက်ဆက်တုဲဂှ် ညးဒေသတံ ဖေက်လကိုတ်ဘဲအန္တရာဲက္ၜၚ်ကျာတုဲ ဒးဂြိပ်ပဲါဒဴအာ ဒၞာဲဗၠးဘဲရ။
“ကၠုၚ်ထောံဖျေံမဗ်ကဵုၜၚ်ကျာတှေ် ဖေက်တုဲ ဒးဂြိပ်ပဲါရ။ လ္ပာ်ဏံဂှ် ဒၞာဲဂြိပ်ဟီုတှေ် ဂြိုပ်ဟေၚ်နွံတှေ် ဒးဂြိပ်အာ လ္ပာ်ဂြိုပ်ရ။ ဒှ်မံၚ်အခိၚ်ကသီုတှေ် ခက်ခုဲနာနာသာ်ရ” သာ်ဝွံ ညးဒေသမွဲတၠ ဟီုရ။
ဂိတုဂျောန် စၟတ်တ္ၚဲ (၅) တုဲကၠုၚ်ဏံဂှ်လေဝ် လ္ပာ်ကွာန်ညးဍုၚ်ကွာန်တန်တဴဒၟံၚ် အပ္ဍဲပွိုၚ်ဍုၚ်ကျာ်ထဝ်ဂှ် နူဌာန်ဂအုပ်ပၞာန်ဒပ်တိုက် စၟတ် (၄၄) ကမ္မယှေန်ပၞာန်တံ ပန်နၚ်ကဵုလွဟ်ဇၞော် (၁၂၀) မမ ပန်မတုဲ ဒတုံခတိုဟ်အာ အပ္ဍဲဗွိုၚ်ကမၠောန်ညးဍုၚ်ကွာန် ဗဒဲါကွာန် (ၚှက်ပျောတော) ဂှ်ရ။
ဟိုတ်နူလွဟ်ဇၞော်ဒတုံခတိုဟ်အာဂှ်ရ သဝ်သုၚ်ကဠာ အာယုက် (၄၄) သၞာံ၊ ဒၟံၚ်တန်တဴမံၚ် ပ္ဍဲကွာန် (တဂေးချောၚ်းဖျား) ဂှ် ဒးချိုတ်အာလဝ်ရောၚ် ဂွံတီကေတ် နူကေအေန်ယူ လလောၚ်ပ္တိတ်လဝ်ရ။
ဒပ်ပၞာန်တံဝွံ စွံပွန်ကဵု ညးဍုၚ်ကွာန်တံတုဲ ဗ္တိုက်မံၚ်ကဵုက္ၜၚ်ကျာသၟးဟွံက သီုပန်မံၚ်ကဵုလွဟ်ဇၞော်ဂှ်ရ ပရေၚ်ညးဍုၚ်ကွာန်တံ ညးဘဲဝပ်ချိုတ်ဂျိုၚ်၊ ပရေၚ်ဆောံလေၚ်ဒြပ်ကသပ်သ္ၚိဒၟံၚ်ဂမၠိုၚ် နွံမံၚ်ရောၚ် ကေအေန်ယူ လလောၚ်ပ္တိတ်လဝ်ဂှ် ဂွံတီကေတ်ရ။