ပ္ဍဲသ္ကုတ်သၠုၚ်ကျာ/သၟဝ်ကျာ ပွိုၚ်ဍုၚ်ရေဝ်ဂှ်ဝွံ စပ္တံနူလဒေါဝ်ဂိတုဂျောန်ဏံတုဲ နူဒပ်ပၞာန် ထ္ပက်ကၠုၚ်မံၚ်ကရောၚ်ပၞာန်အဆက်ဆက်ရောၚ်ဂှ် ဂွံတီကေတ် နူတမ်ရိုဟ်ပရိုၚ်ဗလးတိရ။
အပ္ဍဲတ္ၚဲအကြာတဏံဝွံ ကရောၚ်ပၞာန်ဇြဟတ် ၜိုတ် (၁၀၀) ပြၚ် နူတမ်ဒပ် (ခလရ ၆၁) သၟဝ် (စကခ ၁၉) ဖျေံသဇိုၚ်ဍုၚ်ရေဝ်ဂှ် ထ္ပက်မံၚ်ကရောၚ်ပၞာန် ပ္ဍဲသ္ကုတ်ဂၠံၚ်ကွာန်ဘာနွံရ။
ကရောၚ်ပၞာန်ဂှ်ဝွံ ညးတတ်အာကၠုၚ် နကဵုကွဳစက်၊ ကွဳလိုန်ဓာတ်ဂမၠိုၚ်ဂှ် အာတ်ကေတ်မံၚ်သြန်တုဲ ညးဒေသ မနွံအပ္ဍဲကၠအ်ဂူဂမၠိုၚ်ဂှ်လေဝ် သကဵုက္လေၚ်စဴလ္တူဍုၚ်ရ။
ညးဒေသရေဝ်သၟဝ်ကျာမွဲတၠဂှ် “လၟုဟ် ထ္ပက်မံၚ်ကရောၚ်ပၞာန် လ္ပာ်ရေဝ်သၟဝ်ကျာရ။ လ္ပာ်ရေဝ်သၠုၚ်ကျာဂှ်တှေ် ကရောၚ်ပၞာန်ဇြဟတ် ၜိုတ် (၁၃၀) မွဲကရောၚ်ပၞာန်ဂှ် စနူကွာန်ကြုၚ်လံၚ်တၟိတုဲ ထ္ပက်အာကရောၚ်ပၞာန် အတိုၚ်ဂၠံၚ်ကွာန်ဘာတုဲတှေ် ပတဝ်အာမံၚ် လ္ပာ် (လိပ်ပုတ်) တေံရ” သာ်ဝွံ ညးဟီုရ။
အတိုၚ်ကိုန်အစဳဇန် (၁၀၀) တ္ၚဲဂှ်မ္ဂး ထ္ပက်ကရောၚ်ပၞာန်ဒှ်မာန်တုဲ အခိၚ်လၟုဟ်ဏံ စွံပွန်ကဵု ဒၞာဲ PDF ပ္ဍဲဒေသရေဝ်တုဲ အကာဲအရာ ကၠောန်သ္ပဗ္တိုက်မံၚ်နွံရောၚ် ညးသ္ၚဳဂၠိပ်လဝ်ရ။
ပ္ဍဲမွဲဒမြိပ်ဂၠံၚ်ရေဝ်-ကွာန်ဘာဂှ်ဝွံ ဟိုတ်နူဒှ်ဂဝိၚ်ဂွိၚ်ကဵု ထ္ပက်ကရောၚ်ပၞာန်၊ ဗ္တိုက်ကဵုက္ၜၚ်ကျာတုဲ ညးဒေသနူကွာန်ဘာ၊ ကွာန် (နတ်ကြီး) တံ အခိၚ်ဗ္တံမ္ဂး အကာဲအရာ ဒးဂြိပ်ပဲါဒဴမံၚ် ဒၞာဲဗၠးဘဲနွံရ။
ညးတြုံဒေသကွာန်ဘာမွဲတၠဂှ် “ကောန်ပၞာန်တံ ချဳဓရာၚ်မံၚ်တှေ် ညးတံ ဖေက်လကိုတ်ရ။ ဘဲၜၚ်ကျာလေဝ် ဒးဂွိၚ်တှေ် အခိၚ်ဗ္တံဂှ် ဟွံဂံၚ်တိက်ပ္ဍဲကွာန်ရ။ အခိၚ်တ္ၚဲတှေ် သွက်ဂွံစသုၚ်ဂှ် ရံၚ်အကာဲအရာတုဲ ဒးအာမံၚ်ဒၞာဲဗွိုၚ်ကမၠောန်ရ” သာ်ဝွံ ညးဟီုရ။
ဒပ်ပၞာန်ထ္ပက်မံၚ်ကရောၚ်ပၞာန် အခိၚ်လၟုဟ်ဏံဝွံ အတိုၚ်ပရေၚ်ပၞာန်မ္ဂး အကာဲအရာ မိက်ဂွံက္လေၚ်အုပ်ဓလီုတိဍာ်ဒှ်မာန်တုဲ စကာကၠုၚ်ဂၠံၚ်တရဴက္ၜၚ်ကျာဂှ်ရ ညးဒေသတံ စွံသတိညိဂှ် ဂကောံပၠန်ဂတးတံ ဖတိုက်ဖအောဝ်လဝ်ရ။
ဂိတုဂျောန် စၟတ်တ္ၚဲ (၁၈) တုဲကၠုၚ်ဏံဝွံ ဒၞာဲဗဒိုပ်ညးဒဒိုက် နိပေါန်ဖံၚ်ဒေယှေန် မနွံအပ္ဍဲဒေသကၞောတ်ၜဳရေဝ်၊ ဗော်ဍုၚ်မန်တၟိထိၚ်ဒဝ်ဂှ် ဒပ်ကမ္မယှေန်ပၞာန်တံ ကၠုၚ်စိုပ်ထောံဖျေံဗမ်တုဲ သ္ၚိဒၟံၚ် (၄) မ လီုလာ်အာကီု၊ သီုဘာကောန်ဂကူမန် တန်မူလမွဲဘာ ကေုာံ ကၠအ်ဂူတံ ဒးကဝေက်ဗမ်လီုလာ်အာနွံဂှ် ဂွံတီကေတ်ရ။