လ္တူဍုၚ်ကျာ်ပိ ၜိုန်ရဂကောံရပ်လွဟ် DKBA တံ ကၟာတ်လဝ် ပရေၚ်သုၚ်စောဲသွံရာန် ဍာ်တၞးၝာဲကထီုကီုလေဝ် ပြဟ်ပြဟ်ဏံ လ္တူဍုၚ်ကျာ်ပိဂှ် ဍာ်တၞးၝာဲကထီု ဗြေဝ်တိုန်ဒၟံၚ်သိုက်သိုက်တုဲ ဆေၚ်ဖျာသွံရာန် ဍာ်တၞးၝာဲကထီုတံ ကလေၚ်မံက်ဂတဝ်တိုန် နကဵုပရေၚ်ပိုန်ဒြပ်မွဲဝါပၠန်ရောၚ် ညးဒေသဍုၚ်ကျာ်ပိတံ ဟီုရ။
ပရေၚ်သုၚ်စောဲသွံရာန် ဍာ်တၞးၝာဲကထီု လ္တူဍုၚ်ကျာ်ပိဂှ် ဂကောံရပ်လွဟ် DKBA တံ ကၟာတ်လဒဵုလဝ် အပ္ဍဲသၞာံ (၂၀၂၅) တေံရ။
“ဆဂး သွံရာန်ဒၟံၚ် ဍာ်တၞးၝာဲကထီုဂှ် ဂွံအခေါၚ်အရာပေၚ်ပေၚ်တုဲ သွံရာန်မံၚ်ဟွံသေၚ်၊ ညးသုၚ်ကဵု ညးသွံရာန်တံ ကေတ်ဓဝ်ကၠိုဟ်ခၠၚ်ညးသ္ကံတုဲ ကၠတ်သွံ၊ ကၠတ်သုၚ်ဒၟံၚ်နွံရောၚ်” သာ်ဝွံ ညးစုက်လုက်ကဵု ဆေၚ်ဖျာသွံရာန် ဍာ်တၞးၝာဲကထီု မွဲတၠဂှ် ဟီုရ။
မၞိဟ်သုၚ် ဍာ်တၞးၝာဲကထီုဏံဂှ် သၟတ်ဍောတ်၊ သၟတ်လဒေါဝ်၊ မၞိဟ်ဇၞော် စနူအယုက် (၁၂) သၞာံ ဒဵုစိုပ် (၆၀) သၞာံနွံဂၠိုၚ်တုဲ မၞိဟ်တံဏံဂှ် ကၠတ်သုၚ်၊ ကၠတ်ရာန်ဒၟံၚ် ဍာ်တၞးၝာဲကထီုဂှ် မပ္တံကဵု အရာပ်တေံ၊ အရာပ်ဏံ သွံရာန်ဒၟံၚ် ဗၞတ် (၃၀၊ ၄၀) ဒၞာဲနွံရောၚ် ညးဒေသဂှ် ဆက်ဟီုရ။
ပြဟ်ပြဟ်ဏံ လ္တူဍုၚ်ကျာ်ပိဂှ် ၚုဟ်မးညတၞးၝာဲကထီု မွဲကဳလိုဝ် (၂၅၀) ၝာတ်၊ ဍာ်တၞးၝာဲကထီု ဖက်နှဴလဝ်တုဲတုဲ မွဲလဳတာဘာ်ဂှ် ၚုဟ်နွံဒၟံၚ် (၁၀၀) ၝာတ်တုဲ တၟော်ရံၚ်ကဵု သၞာံတုဲတေံမ္ဂး ၚုဟ်ပဵုတိုန်ရောၚ် ဂွံတီကေတ်ရ။
သၞာံတုဲကၠုၚ်တေံဂှ် တၞးၝာဲကထီု မွဲကဳလိုဝ် (၁၀၀) ၝာတ်၊ ဍာ်တၞးဖက်နှဴလဝ်တုဲတုဲ မွဲလဳတာဘာ်ဂှ် ၚုဟ်နွံဒၟံၚ် (၅၀) ၝာတ်ဟေၚ် ဂွံတီကေတ် နူညးသုၚ်ဍာ်တၞးၝာဲကထီု မွဲတၠရ။
ဍာ်တၞးၝာဲကထီု သွံဒၟံၚ်လ္တူဍုၚ်ကျာ်ပိတံဂှ် ကၠုၚ်နူကဵု ကွာန်နွံဒၟံၚ် ပွဳဗွိုၚ်ဍုၚ်ကျာ်ပိတံရောၚ် ဂွံတီကေတ်ရ။
ကၠာဂကောံရပ်လွဟ် DKBA ဟွံကၟာတ်လဒဵု ပရေၚ်သုၚ်စောဲသွံရာန် ဍာ်တၞးၝာဲကထီုဏီဂှ် လ္တူဍုၚ်ကျာ်ပိ ဆေၚ်ဖျာသွံရာန် ဍာ်တၞးၝာဲကထီု ဗၞတ် (၁၀၀) ဆေၚ်နွံတုဲ ညးသုၚ် ဍာ်တၞးၝာဲကထီု ၜိုတ် (၈၀) တၟံကၠံနွံတုဲ လၟုဟ်ဏံ ယအ်စှေ်အာ ဗ္ဒဲါကဝက်နွံရောၚ် ညးဒေသမွဲတၠ ဟီုရ။
အခိၚ်ဂကောံရပ်လွဟ် DKBA တံ စကၟာတ် ပရေၚ်သွံရာန် တၞးၝာဲကထီုတၟိတၟိဂှ် ပရေၚ်သွံရာန် တၞးၝာဲကထီု လ္တူဍုၚ်ကျာ်ပိ ကၠေံအာ (၃/၄) ဂိတုတုဲ ကလေၚ်ကၠတ်သွံ ကၠတ်ရာန်ဒၟံၚ်ညးသ္ကအ်အိုတ်ပၠန်ရ။
ဂကောံရပ်လွဟ် DKBA တံ ပတိတ်လဝ်လိက် စပ်ကဵုပရေၚ်သွံရာန်သုၚ်စောဲ တၞးၝာဲကထီုဂှ်မ္ဂး ရဲသုၚ်ဍာ်တၞးၝာဲကထီုတအ် ယဝ်ရပ်ဂွံမ္ဂး ဒးဒဏ်သြန်သေံ (၅၀၀၀) ၝာတ်သၟးဟွံက သီုဒးဒုၚ်စုတ်ထံၚ် (၃) ဂိတုရ။
ဆေၚ်ဖျား သွံရာန် တၞးၝာဲကထီုတအ် ယဝ်ရပ်ဂွံမ္ဂး ဒးဒဏ်သြန်သေံ (၁၅၀၀၀) ၝာတ် ကေုာံ ဒးစုတ်ချုက်ထံၚ် (၆) ဂိတုရ။
ဆဂး ဂကောံရပ်လွဟ် DKBA တံ ၜိုန်ရပတိတ်လဝ်စေဝ်ပၞောန်ကီုလေဝ် ဒဵုကဵုတ္ၚဲဏံ မၞိဟ်ဒးဒုၚ်ရပ်ဟွံမွဲဏီရောၚ် ညးဒေသကျာ်ပိတံ ဟီုရ။