တိဝါဗ္ၚဇိုၚ်ဍုၚ်/ဇိုၚ်ကွာန် ဗ္စလာပ်ဗဇဴ ကၟာတ်ပလီုလဝ်တိဝါဗ္ၚတအ်ဂှ် နူကဵုဌာနစရၚ်တိတအ် ဒးဒုၚ်စၟဳစၟတ်ဒၟံၚ်နွံရောၚ် တခဳရုၚ်စရၚ်တိ နူဍုၚ်မန်မွဲတၠ ဟီုလဴထ္ၜးရ။
တိဝါဗ္ၚဂှ် ဟိုတ်ကိစ္စဇၞော်ဇၞော် ဟွံမွဲ မွဲသာ် ဟွံကဵုလဝ်အခေါၚ်ပလီုပလာ်ရောၚ် နကဵုလိက်ပၟိၚ် ပတိတ်လဝ်စၞောန်နွံကၠာလေဝ် နတဲဍာံဍာံဂှ် တိဝါဗ္ၚဇိုၚ်ဍုၚ်/ဇိုၚ်ကွာန်တအ်ဂှ် မၞိဟ်တာလျိုၚ်ဆက်စပ်တအ် ဗ္စလာပ်ဗဇဴတုဲ ကၟာတ်ပလီုလဝ် တိဝါဗ္ၚတအ် ညောန်ကြပ်အိုတ်ဒၟံၚ်ရ။
ဒဒှ်ရတိဝါဗ္ၚဇိုၚ်ဍုၚ်/ဇိုၚ်ကွာန်တအ် ပလီုကၠေံလဝ်ဂှ် ပ္ဍဲဌာနစရၚ်တိအဆံၚ်လတူတေံ စရၚ်ဟွံကၠေံဏီဂှ်တုဲ လၟုဟ်မ္ဂး နူကဵုအဆံၚ်လတူတေံ စှေ်စၟဳစၟတ်ဒၟံၚ် စရၚ်တိဝါဗ္ၚ ပ္ဍဲဍုၚ်၊ ပ္ဍဲကွာန်/အရာပ်တအ်နွံရောၚ် တခဳရုၚ်ဂှ် ဟီုထ္ၜးဗီုဏံရ။
“ပလီုလဝ်တိဝါတအ်ဂှ် နူကဵုသၟဝ်ဏံဂှ် ပတိုန်လဝ်စရၚ်ချိုတ်ပၠိုတ်ရ၊ ခရိတ်ၜိုတ်အိုတ်ဂှ်လေဝ် ဗစကဵုလဝ်ပေၚ်ပေၚ်ဖအိုတ်ရ၊ နူကဵုပွိုၚ်ဍုၚ်ဂှ် ဟွံပတိုန်ကဵု အဆံၚ်တွဵုရးဟာ၊ ဟွံသေၚ်တှေ် နူတွဵုရးဂှ် ဟွံပတိုန်ကဵု နေပျဳတဝ်တေံဟာ၊ ကေတ်ဟွံဒး၊ လၟုဟ်ဂှ် ဒဒှ်ရတိဝါဇိုၚ်ဍုၚ်/ဇိုၚ်ကွာန်တအ် ဟွံမွဲဒၟံၚ်ဂှ် သၞာံလအ်ကွေံကွေံရ၊ လတူတေံ စရၚ်သှေ်မံၚ်ဏီဖိုဟ်၊ လၟုဟ်မှ နူကဵုလတူတေံ စှေ်စၟဳစၟတ်ဒၟံၚ် စရၚ်တိဝါ အကြာပွိုၚ်ဍုၚ်တအ်၊ တိဝါတအ်ဂှ် အလဵုကေတ်မံၚ်ဏီ” သာ်ဝွံ ညးဟီုရ။
တိဝါဗ္ၚဇိုၚ်ဍုၚ်/ဇိုၚ်ကွာန်တအ်ဂှ် နူလက်ထက်အလဵုအသဳအေန်အေလ်ဒဳတုဲကၠုၚ်တေံကီု၊ ပ္ဍဲကာလလက်ထက်ပၞာန်သီအဝဵုဏံဂှ်ကီု ပလီုပလာ်ထောံတုဲ တက်သွံဒၟံၚ် တိကၠအ် ဂအာၚ်သ္ၚိ အိုတ်အာဒၟံၚ် သၞာံဗွဲမလအ်လရ။
နူကဵုအဆံၚ်သၟဝ် (ပွိုၚ်ဍုၚ်) ဏံ စရၚ်ပလီုလဝ်တိဝါဗ္ၚဂှ်နွံကီုလေဝ် အဆံၚ်လတူတေံ စရၚ်တိဝါဂှ် နွံဒၟံၚ်ဏီဂှ်ရ နူကဵုညးတာလျိုၚ်ဌာနစရၚ်တိတအ် ကၠုၚ်စၟဳစၟတ်ဒၟံၚ် ဒဵုကဵုအဆံၚ်သၟဝ်ဏံ (အရာပ်/ကွာန်) နွံရောၚ် သ္ဂးရ။
“တိဝါဗ္ၚကွာန်ပိုဲဂှ် ကၠောန်ဟွံကိတ်တုဲတှေ် ပလီုထောံလဝ် ဒှ်အာကၠအ် သၞာံလအ်ကွေံကွေံရ၊ ပ္ဍဲရုၚ်စရၚ်တိပွိုၚ်ဍုၚ်ဂှ်တှေ် တီမံၚ်ရရဏောၚ်၊ လၟုဟ်ကၠုၚ်စၟဳစၟတ်ဒၟံၚ် စရၚ်တိဝါ ပ္ဍဲကွာန်ပိုဲဏံဖိုဟ်၊ တိဝါကွာန်ပိုဲ အလဵုကေတ်မံၚ်ဏီရော၊ စရၚ်သှေ်မံၚ်ဏီတှေ် သ္ဇက်သ္ပဟွံမွဲ ဗီုလဵုဂွံပသောၚ်၊ တိလေဝ်ဟွံမွဲရ ဒှ်အာဂအာၚ်ကၠအ်၊ ဒှ်အာကၠအ်ထ္ၜိုတ်အိုတ်အာရတှေ် စရၚ်တိဝါသှေ်မံၚ်ဏီတှေ် သ္ဇက်သ္ပဟွံမွဲရ” သာ်ဝွံ ဂကောံအုပ်ဓုပ်ကွာန် ပွိုၚ်ဍုၚ်ဇြပ်ဗုမွဲတၠ ဟီုရ။
တိဝါဗ္ၚဂှ် ယဝ်ရနွံပၟိက်ဒးပလီုကၠေံ ပြံၚ်သၠာဲသ္ဒးပတန်အရာပ်တၟိ၊ ဍုၚ်တၟိ/ကွာန်တၟိ ဟွံသေၚ်သာ်ဂှ် သိုၚ်ခၞံစမြိုၚ်ရုၚ်စက်/ရုၚ်ကမၠောန်မမိက်ကဵု မွဲမွဲသာ်တုဲ ပလီုကၠေံမ္ဂး တိဝါဗ္ၚ သၟဝ် (၅) ဨကမ္ဂး ပ္ဍဲအဆံၚ်တွဵုရး (ဍုၚ်မန်) ပတိုန်စရၚ်ဂွံတုဲ ယဝ်ရပဵုၜက်တိုန်အာ နူ (၅) ဨကမ္ဂး သ္ဒးပတိုန်စရၚ်ကဵု အဆံၚ်ကၟိန်ဍုၚ် (နေပျဳတဝ်) ရောၚ် ပတိတ်လဝ်စၞောန်ရ။
စၞောန်ပၟိၚ်ဂှ် ၜိုန်ရပ္တိတ်ကရေပ်ဂရတ်လဝ် နွံသာ်ဂှ်ကၠာလေဝ် တိဝါဗ္ၚဇိုၚ်ဍုၚ်/ဇိုၚ်ကွာန်၊ ဇိုၚ်အရာပ်တအ် လၟိဟ်ဨကဂလိုၚ်လဵုဂၠိုၚ်ဂၠိုၚ်ဂှ် လၟုဟ်မ္ဂး တိဝါဗ္ၚတအ် ကၠေံအာအိုတ်တုဲ တန်ဒှ်ဒၟံၚ် ကၠအ်ထ္ၜိုတ်၊ ကၠအ်သတ်ဆု၊ အရာပ်တၟိ တက်သွံဒၟံၚ်ဂအာၚ်ကၠအ်သ္ၚိ နွံဒၟံၚ်ဇၟာပ်ပွိုၚ်ဍုၚ်ရ။