ရုင်ဌာန်ဂအုပ်ပၞာန်ရးတၟေင် မၞုံသၟဝ်ဌာနဝန်ဇၞော်ပရေင်စဵုဒၞာ၊ အလဵုအသဳညဳသၟဟ်ဂကူ အေန်ယူဂျဳ၊ မၞုံအကြာအဆက်စပ် တွဵုရးဍုင်မန်ကဵု ရးဒေသဇၞော်ဗ္ဂေါဂှ် ဂိတုသေပ်တေမ်ဗာ (၂၄) ၊ နူတနေံဏံ ဂကောံဒပ်ပၞာန်တံ ပန်ဗ္တိုက်ထောံဖျေံဗမ်ကဵုက္ၜင်ကျာတုဲ ကောန်သဂံင်ပၠန်ဂတး ဟွံအောန်နူ (၄) တၠ ပြဟ်လလုဲအာကီု သီုညးဒးဘဲဝပ်လေဝ်နွံဂှ် ဂွံတီကေတ် နူတမ်ရိုဟ်ပရိုင်ပၞာန်ရ။
နူတနေံဏံ အခိင်ဗဂါပ်ဂယး နူ (၁၁) နာဍဳ စဵုကဵု (၁၂) နာဍဳဂှ် ဒပ်ပၞာန်တံ ပန်ဗ္တိုက်ထောံဖျေံဗမ်ကဵု ဌာန်ဂအုပ်ပၞာန်ရးတၟေင် အေန်ယူဂျဳ နကဵုက္ၜင်ကျာဗ္တိုက် “ဂျက်ဖိုက်တာ” (၃) ဖ္ဍိုက် ဗွဲမသကာတ်မြဟ်ရ။
“ဌာန်ဂအုပ်ပၞာန်ရးတၟေင် အေန်ယူဂျဳ ဂှ်တှ်ေ နူကဵုဍာန်ကျာ ပန်ဗ္တိုက်ထောံဖျေံဗမ် နကဵုက္ၜင်ကျာဗ္တိုက် (ဂျက်ဖိုက်တာ) ဗွဲမသကာတ်မြဟ်တုဲ လ္ပာ် (သိမ်ဇရပ်) ဂှ်လေဝ် ပန်ဏာကဵုလွဟ်ဇၞော်အဆက်ဆက်ရ” သာ်ဝွံ နူတမ်ရိုဟ်ပရိုင်ပၞာန်ဗလးတိမွဲတၠ ဟီုရ။
အတိုင်တင်နင်ပရိုင်ကိုပ်ကၠာ (တံဝါဒိ) မ္ဂး ပ္ဍဲကဵုပရူဒဒှ် ဌာန်ဂအုပ်ပၞာန်ရးတၟေင် အေန်ယူဂျဳ ဒးဒုင်ထောံဖျေံဗမ်ဂှ် ကောန်သဂံင်ဒပ်စဵုဒၞာညးဍုင်ကွာန် PDF ပြဟ်လလုဲ (၄) တၠတုဲ ညးဒးဘဲဝပ်လၟိဟ်ကဵုစှ်နွံရောင် ဂးရ။
ဗွဲကြဴနူဒးဒုင်ထောံဖျေံဗမ်တုဲဂှ် လ္ပာ်ဒပ်ကမ္မယှေန်ပၞာန်တံ သၟာင်နူမင်ရံင်ဒၟံင်ကင် နကဵုစက်ဗရုသာဲတုဲ ပ္ဍဲကဵုဗလးတိဂှ်လေဝ် ပန်ဏာမံင်လွဟ်ဇၞော်အဆက်ဆက်ဂှ်ရ ကၠောန်သ္ပပရေင်ရီုဗင်ဟံင်ပြာ်ဟွံမာန်ဏီ ဂးရ။
ပ္ဍဲအလဵုအသဳညဳသၟဟ်ဂကူ အေန်ယူဂျဳ ဂှ် ဒက်ပ္တန်လဝ် ဌာန်ရးပၞာန် (တိုင်းစစ်ဌာန) (၁၀) တုဲ ဌာန်ရးပၞာန်တၟေင် ဒးဒုင်ပန်ဗ္တိုက်ထောံဖျေံဗမ် လၟုဟ်ဏံဝွံ အဓိက ချဳဓရာင်မံင်ပရေင်ပၞာန် အကြာအဆက်စပ် တွဵုရးဍုင်မန်ကဵု ရးဒေသဇၞော်ဗ္ဂေါရောင် ဂွံတီကေတ်ရ။