ပ္ဍဲကၠအ်ထ္ၜိုတ်၊ ကွာန်ကညေန်အိုင်၊ ပွိုင်ဍုင်ကျာ်ထဝ်၊ တွဵုရးဍုင်မန်ဂှ် နူဒပ်ပၞာန်ပန်ကဵုလွဟ်ဇၞော် ဒတုံခတိုဟ်အာတုဲ ကောန်ကွာန်ချိုတ်အာမွဲတၠရဂှ် ဂွံတီကေတ် နူညးဒေသတံရ။
ပ္ဍဲဂိတုသေမ်တေမ်ဗာ စၟတ်တ္ၚဲ (၂၂) တုဲကၠုင်ဏံဝွံ နူတမ်ဒပ်အမၠံက် (၃၁၀) ၊ ဖျေံသဇိုင် (သိမ်ဇရပ်) ၊ ပွိုင်ဍုင်ကျာ်ထဝ်ဂှ် ပန်ပှော်ဏာလွဟ်ဇၞော်အဆက်ဆက် လ္ပာ်ကွာန်မၞိဟ်ဒၟံင်တန်တဴဂမၠိုင်ဂှ်ရောင် ဂးရ။
လွဟ်ဇၞော်ဂမၠိုင်ဂှ်ဝွံ ဒတုံခတိုဟ်အာ ကြပ်ကွာန် (ဇီးပြောင်း) (၃) မ၊ ပ္ဍဲကၠအ်ထ္ၜိုတ် ကြပ်ကွာန်ကညေန်အိုင်ဂှ် (၄) မရ။
ဟိုတ်နူလွဟ်ဇၞော်ဒတုံခတိုဟ်အာ ပ္ဍဲကၠအ်ထ္ၜိုတ်ဂှ်ရ သၟာကၠောန်ထ္ၜိုတ် အာယုက် (၃၀) သၞာံမွဲတၠ ချိုတ်အာလဝဲါဂှ် ပ္ဍဲဒၞာဲဂှ်ရဂှ် ညးဒေသမွဲတၠ ဟီုရ။
“လွဟ်ဇၞော်တံဂှ် ဒတုံစှ်ေ ပ္ဍဲကၠအ်ထ္ၜိုတ်ရ။ ပ္ဍဲကၠအ်ထ္ၜိုတ်ဂှ် သၟာကမၠောန်တံနွံရ။ ဒးအာကဝေက်ကမ်ရ၊ မွဲတၠဂှ် ချိုတ်အာရ။ တၞဟ်သၟာင်ၜါတၠဂှ်လေဝ် ဒးအာဘဲဝပ်ရ” သာ်ဝွံ ညးဟီုရ။
ဟိုတ်နူကမ်လွဟ်ဇၞော် ဒတုံခတိုဟ်အာဂှ်ရ ညးတြုံတၞဟ်သၟာင်ၜါတၠဂှ်လေဝ် ဂွံအာဘဲဝပ်တုဲ ဟိုတ်နူဒပ်ပၞာန် ပန်ပှော်မံင်ကဵုလွဟ်ဇၞော်တုဲ ညးဒေသဂမၠိုင်တံ ဒးဂြိပ်ပဲါဒဴဒၞာဲဗၠးဘဲရ။
ဂိတုသေပ်တေမ်ဗာ စၟတ်တ္ၚဲ (၁၉) တုဲကၠုင်ဏံဂှ်လေဝ် ပ္ဍဲကွာန်ယိုဝ်ကဠာ (ကြသောင်းဆိပ်) ၊ တိဍာ်မဟာဒပ် (၁) ကေအေန်ယူ၊ ပွိုင်ဍုင်ၜဳက္လေင်ဂှ် ဒပ်ပၞာန်တံ ပန်ဗ္တိုက်ထောံဖျေံဗမ်ကဵုက္ၜင်ကျာတုဲ စမြိုင်ဘာဗ္တောန်လိက် ကေုာံ သ္ၚိဒၟံင် (၄၂) မ ဒးဘဲဇီုပိုက်လီုလာ်အာလဝ်လဝ်နွံရ။
အပ္ဍဲဂိတုအဝ်ဂေတ်တုဲကၠုင်တေံဂှ်လေဝ် ဟိုတ်နူလွဟ်ဇၞော်ဒပ်ပၞာန် ဒတုံခတိုဟ်အာ ပ္ဍဲသၠာတ်တေအ်ဗဝ်၊ ကွာန် (ဇီးပြောင်း) ဂှ်ရ ကွးဘာတန် KG အာယုက် (၅) သၞာံမွဲတၠ ချိုတ်အာတုဲ ကွးဘာတၞဟ်သၟာင်တံလေဝ် ဟွံအောန်နူ (၁၁) တၠ ဒးအာဘဲဝပ်ဏီရ။
ဗဒိုပ်ဒပ်/တမ်ဒပ်ကမ္မယှေန်ပၞာန် မၞုံအပ္ဍဲပွိုင်ဍုင်ကျာ်ထဝ်တံဝွံ ပန်ဏာမံင်လွဟ်ဇၞော် လ္ပာ်ကွာန် မၞုံပ္ဍဲတိဍာ်မဟာဒပ် (၁) ၊ ဗော်သွးကရေင် ကေအေန်ယူထိင်ဒဝ်ဂှ်ရ။
ဒပ်ပၞာန်တံဝွံ ပန်ဗ္တိုက်မံင်ကောန်ဍုင်ကွာန်ဒုဟ်ဟွံမွဲတံ နကဵုက္ၜင်ကျာ၊ စက်ဗရုသာဲ ကေုာံ လွဟ်ဇၞော်ဂမၠိုင်ကီု၊ ရပ်ဂစိုတ်မံင်ကောန်ဍုင်ကွာန်တံကီုတုဲ ဇၟာပ်တ္ၚဲ လုတ်လောန်ဒၟံင်ဒုဟ် ဆေင်စပ်ကဵုအမှုရာဇဝတ်ပၞာန်ဂမၠိုင်နွံရောင် ကေအေန်ယူ လလောင်ပ္တိတ်လဝ်ရ။