အခိင်စပံက်ခွာတ်ထၜိုတ်လၟုဟ်ဏံဂှ် ၚုဟ်ထၜိုတ်ခိုဟ်တိုန်နူကဵုသၞာံတုဲကၠုင်တေံ ကြပ် (၁၀၀၀) ဒကေဝ်ဒှ်ရောင် တၠကမၠောန်သွံရာန်ထၜိုတ်တအ် ဟီုထ္ၜးလဝ်ဂှ် ဂွံတီကေတ်ရ။
ၚုဟ်ထၜိုတ်စပံက်တၟိတၟိလၟုဟ်ဂှ် ထၜိုတ်ကဆံင်သၠုင်အိုတ် မုက်ဂၞန် ၁ No.1 ဂှ် မွဲပံင် (၄၀၀၀) ပြင်တုဲ ဍာ်ထၜိုတ်ဂှ် မွဲပံင် (၃၃၀၀) ကဵု (၃၅၀၀) ၚုဟ်ပံက်ဒၟံင်ရောင် သ္ဂးရ။
“ၚုဟ်ထၜိုတ်ဂှ် ဟွံဂွံပံက်ခိုဟ်ခိုဟ်ဏီပုဟ်၊ ၜိုတ်ဆပံက်မံင်လၟုဟ်ဂှ်တှ်ေ ထၜိုတ်ကဆံင်သၠုင်အိုတ် No.1 ဂှ် မွဲပံင် (၄၁၀၀) ၊ ဍာ်ထၜိုတ်ဂှ် ဆေင်လ္ၚဵုဂှ် ရာန်မံင် (၃၃၀၀) နွံ၊ ဆေင်လ္ၚဵုဂှ် ဒဵုကဵု (၃၅၀၀) ရာန်မံင်နွံ၊ ၚုဟ်ဟွံချိုတ်ပၠိုတ်ဏီပုဟ်” သာ်ဝွံ တၠရုင်စက်ထၜိုတ် နူဍုင်ဇြပ်ဗုမွဲတၠ ဟီုရ။
လၟုဟ်ဂှ် ဗြဲအိုတ်ဟွံခိုဟ်ဏီတုဲ ဆေင်သွံရာန်ထၜိုတ်တအ်လေဝ် ပံက်ဟွံဇဳဏီတုဲ ၚုဟ်ထၜိုတ်ဂှ် ဟွံချိုတ်ပၠိုတ်ဏီရ။ ဆဂး ဆေင်သွံရာန်ထၜိုတ်လ္ၚဵုတအ် သွံရာန်မံင်လၟုဟ်မ္ဂး ၚုဟ်သၠုင်နူကဵုသၞာံတုဲကၠုင်တေံ မွဲပံင် ကြပ် (၁၀၀၀) ဒကေဝ် ပဵုတိုန်ဒှ်ရ။
“ထၜိုတ်ခိုဟ်အိုတ် No.1 ဂှ် (၄၀၀၀) ပြင်မံင်၊ တော်ကဵုသၞာံတုဲကၠုင်တေံတှ်ေ ၚုဟ်ပဵုတိုန် ကြပ် (၁၀၀၀) ၊ အခိင်ကၟာတ်ထၜိုတ်သၞာံတုဲကၠုင်တေံဂှ် ဂွံမံင် (၃၀၀၀) ၊ (၃၀၀၀) ပြင်ညိဓဝ်ရ၊ အခိင်စပံက်ဏံဂှ် ၚုဟ်ပဵုတိုန် ကြပ် (၁၀၀၀) ဒှ်မံင်၊ လအ်ညိတှ်ေ ဗီုလဵုကၠုင်ပၠန် ဟီုဟွံဒးရ” သာ်ဝွံ တၠရုင်စက်ထၜိုတ်ဂှ် ထပ်ဟီုထ္ၜးရ။
သၞာံတုဲတုဲကၠုင်တေံမ္ဂး ၚုဟ်ဍာ်ထၜိုတ်ကဵု ၚုဟ်ထၜိုတ်ကဆံင်သၠုင် No.1 ဂှ် ၚုဟ်ခြာဒၟံင် အကြာ (၅၀၀) ဒကေဝ်ရတုဲ အတိုင်ၚုဟ်ပံက်ဒၟံင်လၟုဟ်မ္ဂး ၚုဟ်ခြာဒၟံင် ဗၞတ် (၈၀၀) ဒကေဝ်ဒှ်ရ။
ၚုဟ်ထၜိုတ်စပံက်သၞာံတုဲကၠုင်တေံဝွံ ထၜိုတ်ကဆံင်သၠုင်အိုတ် မုက်ဂၞန် ၁ No.1 ဂှ် ၚုဟ်နွံအကြာ (၃၀၀၀) ဒကေဝ်တုဲ ဍာ်ထၜိုတ်ဂှ် ၚုဟ်နွံအကြာ (၂၆၀၀) ဒကေဝ်ရ။
ကာလအခိင်ကၟာတ်ထၜိုတ်တုဲကၠုင်တေံဂှ်မ္ဂး ထၜိုတ်ကဆံင်သၠုင်အိုတ် မုက်ဂၞန် ၁ No.1 ဂှ် ၚုဟ်ကၟာတ်အာ အကြာ (၃၇၀၀) ဒကေဝ် ပြင်ညိတုဲ ၚုဟ်ဍာ်ထၜိုတ်ဂှ် ၚုဟ်ကၟာတ်အာ အကြာ (၃၁၀၀) ဒကေဝ်ရ။