သၞာံ (၂၀၂၆) ပ္ဍဲဂိတုဂျူလာၚ်မံက်မ္ဂး အလုံကၟိန်ဍုၚ်သေံ သၟာကမၠောန်ကောန်ဍုၚ်သ္အာၚ် ညးရပ်လဝ်တၞးလိက် Work Permit မၞုံကဵုအခေါၚ်ကၠောန်ကမၠောန်ကီုလေဝ် အလဵုအသဳသေံတအ် လလောၚ်ပ္တိတ်ကၠုၚ်လဝ်သၞောဝ် အခေါၚ်ကၠောန်ဟွံဂွံ အပ္ဍဲဍုၚ်သေံ (၁၀) တၚ်နွံရောၚ် ဂွံတီကေတ်ရ။
ကိစ္စဏအ်ဝွံ နကဵုသၟာကမၠောန်ကောန်ဍုၚ်သ္အာၚ်လ္ၚဵုတအ် ရပ်လဝ်တၞးလိက်တတ်ကၠောံဍုၚ်တုဲ ဗက်ကၠောန်မံၚ်ကမၠောန် သွံဖျာလေဝ်နွံ၊ ညးလ္ၚဵုတအ် ကမၠောန်ဇကုမၞုံပၟိက်ဂှ် ဗက်ကၠောန်မံၚ်အိုတ်ဂှ်ရ လ္ပာ်ညးဍုၚ်ကွာန်သေံတအ် ဟွံဒးကဵုပၟိက်စိုတ်တုဲ အာတေၚ်စိုပ်လဝ်ကဵု ပ္ဍဲရုၚ်ဗၠာဲသၟိၚ်သေံတအ်နွံရ။
ဒှ်သာ်ဂှ်ရ သၟာကမၠောန်ကောန်ဍုၚ်သ္အာၚ် ညးရပ်လဝ်တၞးလိက် Work Permit ကီုဒှ် ညးရပ်လဝ်တၞးလိက် တတ်ကၠောံဍုၚ်ကီုဒှ် နူကဵုဌာနဝန်ဇၞော်သၟာကမၠောန်သေံတအ် သ္ဂောံတာဒၞါကမၠောန်တအ်ဂးတုဲ နကဵုသၞောဝ်ဥပဒေကၟိန်ဍုၚ်သေံဂှ် ပ္တိတ်ကၠုၚ်လဝ်သၞောဝ် (၁၀) တၚ်သာ်ဏအ်တုဲ ရပ်စပ်ထိၚ်အာရောၚ်။
၁။ “ဆေၚ်စပ်ကဵုကၠောန်ကမၠောန်သွံဖျာ ပ္ဍဲဍုၚ်သေံ မပ္တံကဵု သွံဖျာပ္ဍဲသ္ကဲဂၠံၚ်၊ သွံဖျာ နကဵုကွဳသၠာပိ ကေုာံ သွံတၞးထဳကီုရ’’။
၂။ “ဆေၚ်စပ်ကဵုညးကၠောန်ကမၠောန်ဃံၚ်စအကြာဂမၠိုၚ်’’။
၃။ “ကမၠောန်ပံက်ဆေၚ်ကျိုၚ်ကျဝ် မပ္တံကဵု ခေတ်သော်၊ ပဠေဝ်ပလေတ်သော်၊ ကျိုၚ်ကျဝ် ပယျေဝ်ကျေဝ်နာနာသာ် ပါလုပ်ရ’’။
၄။ “ကမၠောန်အခိုက်ကၞာပတ် နကဵုကွတ်တဲသေံတအ်ဟွံဂွံ’’။
၅။ “ကမၠောန်ဒဳကွဳစက်ယာဉ် ပါဲနူကမၠောန် သ္ဒးဒဳကွဳစက်ကာ ဖောအ်ကလေတ် (Forklift) ပ္ဍဲရုၚ်စက်ဂမၠိုၚ်တုဲ ဒဳကွဳစက်ကာ တက္ကသဳ၊ ကွဳစက်ဒမြိပ်လာၚ်၊ ကွဳစက်သၠာပိတအ်ဂှ် ဟွံဂွံရောၚ်’’။
၆။ “ကမၠောန်ဟီုစၞောန်ထ္ၜး စဳဇန်ဖန်ဗဒှ်ကဵု သွက်ညးကွာ်တရဴဂမၠိုၚ်’’။
၇။ “ကမၠောန်ရေၚ်တၠုၚ်ကဵုကသပ်ဥပဒေ ကုတၠပညာသၞောဝ်ဥပဒေ’’။
၈။ “ကမၠောန်ဇိၚ်စက် ကမၠောန်တုတ်တုတ်’’။
၉။ “ကမၠောန်ကွတ်တဲအခိုက်ကၞာ မပ္တံ ပုတ်ရုပ်နကဵုဆု၊ ကၠောန်ပ္တိတ်ရုပ်ထဝ်/ရုပ်ဩန်၊ ချူတၟံ၊ ချူဗၞိက်တုဲ ကၠောန်ပ္တိတ်ရုပ်ဂမၠိုၚ်တအ်ကီု’’။
၁၀။ “ကမၠောန်သၞာဲဒဴ ကၠောန်ကမၠောန်ညးမၚ်ဂီုကၠီု ပ္ဍဲရုၚ်သိုၚ်ခၞံ ကေုာံ ဒၞါဲရုၚ်ဌာနမဆေၚ်စပ်တအ်ဂှ် သာ်ဝွံ ကၠောန်တဴဟွံဂွံရောၚ် အလဵုအသဳသေံတအ် ဖျေံကၠုၚ်လဝ်သၞောဝ်ရ’’။
ကမၠောန်ကောန်ဍုၚ်သ္အာၚ်တအ် အခေါၚ်ကၠောန်ဟွံမွဲ မဖျေံလဝ် (၁၀) တၚ်ဏအ်ဝွံ ညးဟွံဒ္ဂေတ်ဗက် ညးၜက်ၜေတ်ဒးအာတအ်ဂှ် ယဝ်ရပ်စပ်ဂွံမ္ဂး ဒးဒုၚ်တပ်ဒဏ် ဩန်သေံ အကြာ (၅,၀၀၀) ၝာတ်ကဵု (၅၀,၀၀၀) ၝာတ်၊ သီုကဵုဒးဒုၚ်တၟာတ် အခေါၚ်ကၠောန်ကမၠောန် ပွိုၚ် (၂) သၞာံတုဲ နကဵုတၠကမၠောန်သေဌဳတအ်ပၠန် ယဝ်ဒှ်ကောန်လိၚ် ကောန်ကမၠောန်ဇကုမ္ဂး သၟာကမၠောန်မွဲတၠဂှ် ဒးကဵုဒဏ်ဩန် အကြာ (၁၀,၀၀၀) ၝာတ်ကဵု (၁၀၀,၀၀၀) ၝာတ်၊ သီုကဵုဒဏ်ထံၚ်ပွိုၚ်မွဲသၞာံတုဲ ဒဏ်ဩန် အကြာ (၅၀,၀၀၀) ၝာတ်ကဵု (၂၀၀,၀၀၀) ၝာတ်ကဵု ဒးဒုၚ်တၟာတ်အခေါၚ်ကော်သၟာကမၠောန် ပွိုၚ် (၃) သၞာံကီုရောၚ် ဂွံတီကေတ်ရ။