ကောန်သ္ဂံၚ်ကမ္မယှေန်ပၞာန် ဖျေံလဝ်ဒပ် ပ္ဍဲကျာ်ပါၚ်ၜဳ၊ ကွာန်ကအ်ဗိန်၊ ပွိုၚ်ဍုၚ်ကအ်ကြိက်၊ တွဵုရးကရေၚ်ဂှ် တ္ၚဲဏံ ဂိတုဂျောန် (၁၂)၊ အခိၚ်နူဂယး ၜိုတ် (၁၀) နာဍဳဂှ် ဒးဒုၚ်ဗ္တိုက်တုဲ ပြဟ်လလုဲအာ (၂) တၠနွံရဂှ် ဂွံတီကေတ် နူတမ်ရိုဟ်ပရိုၚ်အပ္ဍဲဒေသရ။
ဇရေၚ်ဒၞာဲကောန်သ္ဂံၚ်ကမ္မယှေန်ပၞာန် ဖျေံလဝ်ဒပ် ပ္ဍဲကျာ်ပါၚ်ၜဳဂှ် သၟာရပ်လွဟ်ဟွံတီယၟု (၄) တၠ ကၠုၚ်စိုပ်နကဵုကွဳလိုန်ဓာတ်ဂှ် ပန်ပှော်ဏာတုဲ ကတဵုဒှ်အာ ပရေၚ်ပန်ပှော်ညးသ္ကံ မွဲလစုတ်ကီု ညးဒေသကအ်ကြိက်မွဲတၠ ဟီုရ။
“ဒှ်ပန်ပှော်ညးသ္ကံ ၜိုတ် (၆) မိနေတ်ရ။ ချိုတ်အာ (၂) တၠ ဂးရ။ ညးဒးဘဲဝပ် နွံဟာ/ဟွံမွဲဟာဂှ် ဟွံတီပုဟ်။ ညးမွဲမှ ဟွံဂံၚ်အာရံၚ်ပုဟ်လေဝ်။ အခိၚ်တိုန်ဘာဟီုတှေ် ကောန်ၚာ်တံလေဝ် ဂြိပ်စဴကၠုၚ်နူဘာအိုတ်ရ” သာ်ဝွံ ဟီုရ။
ဗွဲကြဴနူဒှ်ပန်ပှော်တုဲဂှ်မ္ဂး သၟာရပ်လွဟ် (၄) တၠ ဍိုက်ကၠုၚ်ကွဳလိုန်ဓာတ် (၂) ဖ္ဍိုက်ဂှ် ဒဳတိတ်အာ လ္ပာ်မ္ၚးကွာန်တေံရောၚ် ဂးရ။
ပ္ဍဲကွာန်ကအ်ဗိန်ဂှ် ကောန်သ္ဂံၚ်ကမ္မယှေန်ပၞာန်ဂမၠိုၚ် ကေတ်ဒၞာဲဖျေံလဝ်ဒပ်တုဲ ပ္ဍဲကဵုဒၞာဲဗဒဲါပွဳဗွိုၚ်ဂှ်ဝွံ ကောန်ဂကောံဒပ်မန်ရာမည မၞုံသၟဝ်တဲဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD တံ အဓိက ချဳဓရာၚ်အာကၠုၚ်မံၚ်ရ။
သွက်သ္ဂောံတီ အကာဲအရာပန်ပှော် သောဲသောဲဗြောဲဗြောဲမာန်ဂှ် နူဌာန်ပရိုၚ်ဗၠးၜးမန် ဆက်သၟာန်သၟုက်ဏာ ညးမၞုံအခေါၚ်ဟီုဂး ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD ဂှ် ဟီုသွဟ်နၚ် အတိုၚ်သၟဝ်ဝွံရ။
“အကာဲအရာဏံဂှ် ပိုဲတံ ဟွံတီဏီပုဟ်။ မၞိဟ်ဗလးတိတံ ဟွံပလံၚ်နၚ်ပရိုၚ်ဏီပုဟ်” သာ်ဝွံ ညးမၞုံအခေါၚ်ဟီုဂး နာဲဂံၚ်သ္ကာ ဟီုရ။
အခိၚ်လၟုဟ်ဏံဝွံ ဟိုတ်နူအကာဲအရာ ပရေၚ်ပန်ပှော်ဂှ်တုဲ ညးဒေသတံ ဒှ်ဂဝိၚ် ဂွိၚ်ဖေက် လ္ပာ်ကမ္မယှေန်ပၞာန်တံ ပတေၚ်ကၠုၚ် ပရေၚ်ဂီုကၠီု ကေုာံ ပရေၚ်စၟဳစၟတ်ရ။
ပ္ဍဲဂိတုမာတ်၊ သၞာံ (၂၀၂၄) တုဲကၠုၚ်တေံ ဒပ်ပံၚ်ကောံပၠန်ဂတးတံ ဗ္တိုက်သီထောံ ဗဒိုပ်ဗၠာဲသၟိၚ်ကအ်ဗိန်တုဲ ပ္ဍဲဂိတုအေဗရဴဂှ် ကမ္မယှေန်ပၞာန်တံ က္လေၚ်လုပ်စိုပ်သီကေတ် နကဵုဇြဟတ်ရ။
စပ္တံနူအခိၚ်ဝွံတုဲ သၟာၚ်နူကွာန်ကအ်ဗိန်မ္ဂး အပ္ဍဲကွာန်ဓမ္မသ၊ သၚ်ကၠံ၊ ကြေဝ်ဏာ၊ ကအ်ပံက်တံဂှ်လေဝ် စဵုကဵုအခိၚ်တ္ၚဲဏံ ကောန်သ္ဂံၚ်ကမ္မယှေန်ပၞာန်တံ လုပ်စိုပ်ဖျေံလဝ်ဒပ်ရောၚ် ဂွံတီကေတ်ရ။