ညးဒေသကြပ်တ္ကအ်ကအ်လှာ်၊ ပွိုၚ်ဍုၚ်ဘာအၚ်၊ တွဵုရးကရေၚ် ကၠောန်မံၚ်ကမၠောန်တမ္ၚာ (ရပ်က) အပ္ဍဲၜဳ်သြၚ်လောန်ဂှ်ဝွံ ပ္ဍဲဂိတုဂျောန် စၟတ်တ္ၚဲ (၁၀) တ္ၚဲယးမ္ဂး နူက္ၜၚ်ပၞာန်ဂကောံကမ္မယှေန်ပၞာန်တံ သွက်ဂွံစမ်ၜတ်ပန်ပှော်အာလွဟ်ဇၞော်နွံရောၚ် နူသ္ကိုပ်အုပ်ဓုပ်မွဲတဆံၚ် ဟီုဂးကဵုလဝ်သမ္တီ ကုညးဒေသတံရ။
အစဳဇန်စမ်ၜတ်ပန်ပှော်လွဟ်ဇၞော်ဂှ် ပ္ဍဲဂိတုဂျောန် စၟတ်တ္ၚဲ (၁၀) ဏံ က္ၜၚ်ပၞာန် နွံသၟဝ်ကောပ်ကာဲ ဂကောံက္ၜၚ်ပၞာန် စၟတ် (၄၆)၊ ဌာန်ဂအုပ်ဒပ်ပၞာန်ဍာ်မောရဝတဳတံ ကၠောန်ဗဒှ်အာရောၚ် ဂွံတီကေတ်ရ။
“အေဒၞာဲဂှ်ဂှ်တှေ် စမ်ၜတ်ပန်ပှော်လွဟ်ဇၞော်ကဵုက္ၜၚ်ဂှ် လၟုဟ်ဏံ အလန်ကၠာအိုတ်ရ။ ဒၞာဲဏံဂှ် ဟွံကေၚ်ကၠောန်လဝ်မွဲလှေ်ပုဟ်။ သၞာံကၠာကၠာတေံတှေ် လ္ပာ်ကအ်ဂုတ်၊ ကျာ်ခၟဳဟေၚ် ပ္ကတ်ပ္ကေၚ်ပန်ပှော်ဗီုဏံဂၠိုၚ်ရ။ လၟုဟ်ဏံ ကွာန်ဂွံမိၚ်ကေတ်ရမျာၚ်ပန်ပှော်မာန်တံဂှ် ကာလညးတံပ္ကတ်ပ္ကေၚ်ပန်ပှော်တှေ် လ္ပဖေက်ညိဂှ် ပလံၚ်လဝ်လိက်ကဵုသတိနွံ” သာ်ဝွံ ညးဒေသဘာအၚ်မွဲတၠ ဟီုရ။
ဟိုတ်ဂှ်ရ မၞိဟ် ကေုာံ ဂၠုၚ်ရပ်ကဂမၠိုၚ်၊ ဂၠုၚ်ဍောတ်ဍောတ်ဂမၠိုၚ် ညံၚ်ဟွံဂွံလုပ်စိုပ်ကီု၊ ပြဒ္ဒညာဟွံမွဲပၟိက်တံ ညံၚ်ဟွံဂွံဒှ်ကၠုၚ်ကီုဂှ် ပ္ဍဲကဵုမ္ၚးသ္ၚောဲခြာ (၃) မိုၚ် ကုတ္ကအ်ကအ်လှာ်ဂှ် ဟေၚ် အာကၠုၚ်ညိဂှ်လေဝ် ကဵုလဝ်သမ္တီရ။
ဒၞာဲညးဒေသတံ ကၠောန်မံၚ်ကမၠောန်ဂယိုၚ်လမျီု နကဵုကမၠောန်ရပ်ကီု၊ ပ္ဍဲကဵုကြပ်ကွာန် မၞိဟ်မံၚ်တန်တဴကီုဂှ် နူက္ၜၚ်ပၞာန်တံ ကၠောန်သ္ပအစဳဇန် စမ်ၜတ်ပန်ပှော်လွဟ် ဟွံထေက်တုဲ ဒးဇီုကပိုက်အာကဵု ပွဳပွူသဘာဝ ကေုာံ သယံဇာတအပ္ဍဲဍာ်ရောၚ်ဂှ် ညးဒေသတံ ဒှ်မံၚ်ဂဝိၚ်အိုတ်ရ။
“ဍာံဍာံတှေ် ဒၞာဲသ္ၚောဲကဵုမၞိဟ်ဂှ် ဘိုအ်ဂွံစမ်ၜတ်ပန် နွံဗွဲမဂၠိုၚ်ရ။ လၟုဟ်ဏံ ကၠောန်ဏာဂှ်လေဝ် ညးဒေသတံ ဟွံမိက်ကဵုကၠောန်ပုဟ်။ မုရောဟီုတှေ် ကွာန်နွံကြပ်ကဵု ၜဳသြၚ်လောန်ဏံဂှ်တှေ် ဗွဲမဂၠိုၚ်ဂှ် ဂယိုၚ်မံၚ်လမျီုကဵု ကမၠောန်ရပ်ကရ။ ကၠောန်သ္ပ ဒၞာဲညးဒေသတံ ဂၠာဲရပ်ကၚုဲဂှ်တှေ်၊ ဂွိၚ်ဖေက် သယံဇာတအပ္ဍဲဍာ်တံ ဟွံမံၚ်ရ” သာ်ဝွံ ညးဒေသဂှ် ဟီုရ။
အခိၚ်လၟုဟ်ဏံ နူဌာနက္ဍိုက်က္ဍိုပ်ပရေၚ်အုပ်ဓုပ်ပွိုၚ်ဍုၚ်ဘာအၚ်တံ ပလံၚ်ဗ္စိုပ်လဝ်လိက်ကဵုသတိ ကုသ္ကိုပ်အုပ်ဓုပ် ဇရေၚ်ကြပ်ကွာန်တ္ကအ်ကအ်လှာ် မပ္တံကွာန်ထုၚ်အိုၚ်၊ ကအ်ဂေါန်၊ ကအ်လှာ်တံဂှ်ရောၚ် ဂးရ။
အခိၚ်ကၠာဒပ်ပၞာန်ဟွံဂွံသီအဝဵုဂှ်လေဝ် ပ္ဍဲဒေသၜဳဂြာၚ်ဝွံ နူဒပ်ဍာ်မောရဝတဳ ကၠောန်သ္ပဏာ ပရေၚ်စမ်ၜတ်ပန်ပှော်လွဟ်ဇၞော်တုဲ သယံဇာတတိတ်နူဍာ်/ၜဳဂမၠိုၚ် အောန်စှေ်အာ ဗွဲမကၠးဖ္ဍးရောၚ် ညးဒေသၜဳဂြာၚ်မွဲတၠ ဟီုရ။
“ကၠာဟွံဂွံသီအဝဵုဂှ်ဟီုတှေ် ပ္ဍဲကဵုၜဳဂြာၚ်ဂှ် ဍေံတံစမ်ၜတ်ပန်ပှော်မံၚ် မွဲနှေံမွဲနှေံရ။ ကၠောန်မွဲဝါတှေ် လွဟ်ဇၞော်ရမျာၚ်ထတ်ထတ် လ္တူ (၁၀) မ ပန်ပ္တိတ်ရ။ ဒပ်ပၞာန်သီအဝဵုဂှ်တှေ် သ္ၚိတ်အာရ။ လၟုဟ် ပြံၚ်ဒၞာဲတုဲ ထပ်ကၠောန်ပၠန်ရ” သာ်ဝွံ ညးဟီုရ။
ပ္ဍဲအစဳဇန်စမ်ၜတ်ပန်ပှော်လွဟ်ဇၞော် နူကဵုက္ၜၚ်ပၞာန်လၟုဟ်ဏံဝွံ ကၠောန်သ္ပအာ နကဵုပွန်ဗလးဍာ်ဟေၚ်ဟီုကီုလေဝ် လၟိဟ်လွဟ်ဇၞော်မူစိဝါပန်ရောဂှ် ဟွံဟီုဂးလဝ်ဂှ်ရ ညးဒေသတံ ဒှ်ဂဝိၚ် ဂွိၚ်ဖေက်ပန်ပှော် လောန်နူသၞောတ်ဗ္ၜတ်ရ။