ပေဲါဗ္တိုက်ကတဵုဒှ်မံင် ကြပ်ခရိုင်တက်၊ ပယျဵုသေံ-ဗၟာဂှ် သ္ကာတ်မြဟ်ဂၠိုင်ကၠုင်တုဲ မွဲကရောံကဵုရမျှာင်လွဟ်ဂှ် ဟိုတ်နူကမ်လွဟ်ဒတုံၜက်ကၠုင်ပယျဵုဂှ်ရ ညးဒေသ ကောန်ကွာန်မၞုံလ္ပာ်သေံတံ ဖေက်လကိုတ်မံင်အိုတ်ရောင် ဂွံတီကေတ် နူ (Thai PBS North) ဓမံက်ထ္ၜးလဝ်ရ။
အပ္ဍဲပေဲါဗ္တိုက်ဂှ်ဝွံ နူကမ္မယှေန်ပၞာန်တံ သၟာင်နူပန်ကဵုစက်ဗရုသာဲ၊ ကမ်လှောဝ်လံင်ချာဂှ်မ္ဂး စကာဗမ် ပံင် (၅၀၀) တုဲ ပန်ကဵုက္ၜင်ကျာကီု၊ ဗပေင်မံင်ဇြဟတ် ပ္ဍဲဗလးတိကီုဂှ်ရ ပေဲါဗ္တိုက်ၜါလ္ပာ် သ္ကာတ်မြဟ်ဂၠိုင်နူကၠာတေံဏီရောင် ပ္ဍဲပရိုင်သေံတံ ဂးလဝ်ရ။
အပ္ဍဲကဵုပေဲါဗ္တိုက် ကတဵုဒှ်လဝ် ဂိတုဂျူလာင် (၂၆) ၊ နူတနေံဏံ အခိင်သဝ်တ္ၚဲဂှ်ဝွံ ကမ်လွဟ်ပန်ပှော်ဏာဂမၠိုင်ဂှ် ဒတုံစှေ် လ္တုသ္ၚိဒၟံင်ညးဍုင်ကွာန်/ကောန်ကွာန် မၞုံပ္ဍဲအရာပ်မေဝ်ကအ်ဂကဵု ဟိုဲမဝ်ဝေါင်၊ ဂကောံကွာန်မဟာဝါန်၊ ပွိုင်ဍုင်မာဲချံက်၊ ခရိုင်တက်၊ ကၟိန်ဍုင်သေံရ။
ပရူဒဒှ်ကမ်လွဟ်ဒတုံခတိုဟ်အာဂှ်ဝွံ ဂွံဆဵုကေတ် ပ္ဍဲစၟတ်သမ္တီကေမ်မရာ CCTV အပ္ဍဲဒေသဂှ်ဗွဲမကၠးဖ္ဍးတုဲ ပေဲါဗ္တိုက်ဂှ်ဝွံ ကတဵုဒှ်လဝ် ပ္ဍဲဒေသပယျဵု၊ အကြာပွဳဗွိုင်ဍုင်ဗြဝတဳကဵု ဒေသမေန်လက်ပါန်ရ။
ဟိုတ်နူရမျှာင်လွဟ်ဇၞော်၊ လွဟ်ဍောတ် ကေုာံ ကမ်လွဟ်ဒတုံစိုပ်လ္ပာ်ပယျဵုဂှ်ရ ကောန်ကွာန်မၞုံလ္ပာ်သေံတံဝွံ သၟာင်နူဖေက်လကိုတ်တုဲ စဵုကဵုဗ္တံသ္ဂာတိက်ဟွံလှိင်မွဲသာ် ဒးအောပ်ဇူဒီုဒၟံင် ဒၞာဲဂီုကၠီုဗၠးဘဲဂှ်ရ။
ညးတာလျိုင် နူကဵုဒပ်တၟေင် ဒပ်ပၞာန်ဝင်နန်သေံ၊ ဂကောံဒပ်ဗၠာဲသၟိင်ပယျဵု ခရိုင်မာဲချံက် ကေုာံ ဂကောံဗျူဟာဒပ်တိုက် စၟတ် (၃၄) (ဝါ) နူတမ်ဒပ် စၟတ် (၃၄၆) တံ အာစိုပ်စၟဳစၟတ် ဒၞာဲသ္ၚိဒၟံင်ဒးကမ်လွဟ်၊ ဒၞာဲလီုလာ်ဆောံလေင်အာတံ နကဵုကာတၟေင်ရ။
ညးတာလျိုင် ဒပ်ပၞာန်သေံကဵု ဂကောံဒပ်ဗၠာဲသၟိင်တံဝွံ ကဝေက်ဗမ်၊ ကဝေက်ကမ်လွဟ် မပြာတ်လုပ်စိုပ်ကၠုင် နူပေဲါဗ္တိုက် အပ္ဍဲကၟိန်ဍုင်ဗၟာဂှ် ဂိုင်သီလဝ်နဒဒှ်သက်သဳတုဲ သက်သဳဂမၠိုင်ဏံဂှ် ချူလိက်ဒုင်စဳရေင်ဗဗွဲဓဝ်တုဲ သွက်ဂွံဆက်ပ္တိုန် ဇရေင်ညးတာလျိုင်အဆံင်လ္တူဂှ် ပကောံပကေဝ်မံင်နွံရ။
အတိုင်ညးတာလျိုင် ပရေင်ဂီုကၠီုသေံဟီုဂှ်မ္ဂး ဒပ်ကမ္မယှေန်ပၞာန်တံဝွံ သွက်ဂွံသီကေတ် ဗဒိုပ်ဒုင်ပၞာန် ဂကောံဒပ်ပံင်ကောံပၠန်ဂတးတံမာန်ဂှ် စကာစက်ဗရုသာဲ ကေုာံ ပန်ရီုကဵုက္ၜင်ကျာတုဲ ဗ္တိုက်ကၠုင်ဗွဲမသ္ကာတ်မြဟ် ကြပ်ပွိုင်မွဲသၞာံကီုလေဝ် စဵုကဵုအခိင်လၟုဟ် ဗွဲမအံင်ဇၞး သီကေတ်ဗဒိုပ်ဒပ်တံဂှ် ဟွံမာန်ဏီရောင် ဂွံတီကေတ်ရ။