ပ္ဍဲလ္တူဍုင်မတ်မလီု၊ တွဵုရးဍုင်မန်ဝွံ အမှုဒုစရိုတ်ဂမၠိုင်ဂၠိုင်ကၠုင်ဂှ်ရ အကာဲအရာ ဒးဒှ်မံင်ဂဝိင်ကဵု ပရေင်ဂီုကၠီုနွံရောင် ညးဒေသဍုင်မတ်မလီုတံ ဟီုရ။
ဗွဲကြဴနူဒပ်ပၞာန်သီအဝဵုတုဲဂှ်မ္ဂး ပ္ဍဲလ္တူဍုင်မတ်မလီုဝွံ အမှုကၠတ်ဂၠံက်၊ ပၠံင်ၜး၊ အမှုလီဠာန်၊ ဂစိုတ်မၞိဟ်၊ အမှုဒမၠဗ္တိုက်၊ ဘပဠ မပ္တံအမှုဒုစရိုတ်ဂမၠိုင်ဂၠိုင်ကၠုင်တုဲ အမှုကၠတ်ဂၠံက်ဂှ် ကြပ်ရိုဟ်တ္ၚဲ ကတဵုဒှ်မံင်ရောင် ညးဒေသတံ ဂးရ။
ပ္ဍဲကဵုဂၠံင်ဍာန်လ္တူဒဵု ဒၞာဲဒယှ်တှ် ဍုင်မတ်မလီုမွဲဒၞာဲဂှ် ပ္ဍဲဂိတုဂျူလာင် စၟတ်တ္ၚဲ (၂) တုဲကၠုင်ဏံ ညးဒဳတိတ်သဳကွဳလိုန်ဓာတ်မွဲတၠ ဒးဒုင်ပၠံင်ၜးကွဳလိုန်ဓာတ်တုဲ ပရူဒဒှ်ဒးဒုင်ဂစိုတ်ဂှ်လေဝ် ကတဵုဒှ်လဝ်ရ။
တုဲပၠန် ပ္ဍဲကဵုဂၠံင်ဍာန်လ္တူဒဵုဂှ်ဝွံ ညးတတ်အာကၠုင်ဂမၠိုင်၊ ညးကွာ်ပရေင်ထတ်ယုက်ဂမၠိုင်တံ ပရူဒဒှ်ဒးဒုင်ပၠံင်ၜး၊ ကၠတ်ဂစိုတ် ကတဵုဒှ်မံင် မွဲနှေံမွဲနှေံနွံဂှ်ရ သွက်ဂွံစကာအာကၠုင်ဂၠံင်ဍာန်ဂှ်မ္ဂး ပရေင်ဂီုကၠီုဟွံမွဲရဂှ်လေဝ် ညးဒေသတံ ဂးရ။
“ပ္ဍဲကဵု(မလမ)ဂှ် အမှုပၠံင်ၜး၊ ၜုင်တက်၊ အမှုမၞိဟ်ချိုတ်၊ ဝိုင်ဝေင်တံဂှ်တှ်ေ ဒှ်မံင်ဍုင်ဇၞော်ဒုစရိုတ်ရ။ ဂၠံင်ဍာန်လ္တူဒဵုဂှ်လေဝ် ညးမွဲဓဝ်တှ်ေ ဒဵုကဵုကြပ်ဟွံဂံင်အာဂှ် ဒှ်မံင်ဣရ။ မုပရေင်ဂီုကၠီုလေဝ် ကဵုဟွံမာန်တှ်ေ အမှုဒုစရိုတ်တံ ပဵုပရေံနူဏံဟေင်နွံရ” သာ်ဝွံ ညးဒေသလ္တူဍုင်မတ်မလီုမွဲတၠ ဟီုရ။
တုဲပၠန် ပ္ဍဲဂိတုဂျူလာင် စၟတ်တ္ၚဲ (၂၃) တုဲကၠုင်ဏံဂှ်လေဝ် ကွဳလိုန်ဓာတ်သၞာဲဒဴရုင်ဂဥုဲ (ရေႊလမင်း) မွဲတၠဂှ် အတိုင်စၟတ်သမ္တီနူ CCTV မ္ဂး ပရူဒဒှ် ညးတြုံ၊ ညးဗြဴ ကေုာံ ကောန်ၚာ်ဍောတ်ပါမံင်တံ ကၠတ်ဏာဂှ်လေဝ် ကတဵုဒှ်လဝ်ရ။
ပရူဒဒှ် အမှုကၠတ်ဂၠံက်ပၠံင်ၜး၊ အမှုဂစိုတ်မၞိဟ်ဂမၠိုင် ကတဵုဒှ်မံင် လ္တူဍုင်မတ်မလီုဂှ် ညးတာလျိုင် မဆေင်စပ်တံ ရပ်စပ်ကေတ်အရေဝ် ဗွဲမစိုပ်တရဴဟွံမာန်ဂှ်ရ အကာဲအရာ ပရေင်ဂီုကၠီု ကေုာံ သၞောဝ်ဥပဒေအုပ်လဒံ ပရေံလ္တူပရေံ ပရေံကၠုင်မံင်ရောင် ညးဒေသတံ ဂးရ။
ညးဒေသမွဲတၠပၠန်ဂှ်လေဝ် “ဒြပ်ဇကုဒးဒုင်ကၠတ်တုဲ အာတေင်လေဝ် မုဟွံတၟေင်ပုဟ်။ မၞိဟ်ဒးဒုင်ကၠတ်ကွဳလိုန်ဓာတ်တံ အာတေင် ပ္ဍဲကဵုဗဒိုပ်ဗၠာဲသၟိင်ရ။ ၜိုတ်အာတေင်ဟေင်ရနွံ။ ဗၠာဲသၟိင်တံရ ညံင်ကဵုဟလးလဝ် ကမၠတ်တံဟာ။ ဒၞာဲလ္ၚဵုဂှ်တှ်ေ ညးဍုင်ကွာန်တံ ရပ်ဂွံကမၠတ်တုဲ အာပအပ်ကဵု ဗၠာဲသၟိင်ရ” သာ်ဝွံ ညးဟီုရ။
ပ္ဍဲဍုင်မတ်မလီုဝွံ သၟာင်နူပရူဒဒှ် အမှုကၠတ်ဂၠံက်ပၠံင်ၜး၊ ဂစိုတ်မၞိဟ်ကေတ်ဒြပ်တုဲ အမှုဒမၠဗ္တိုက်ဂှ်လေဝ် ကတဵုဒှ်လဝ်နွံရ။
