ပ္ဍဲခရိုင်ကာန်ချဏၝုရဳ၊ ကၟိန်ဍုင်သေံဝွံ သၟာကမၠောန်ဆုဲပြံင်ကောန်ဍုင်ဗၟာ (၆) တၠ ကၠောန်ဒးကမၠောန်သွံဖျာ ကောန်ဍုင်သေံဟေင် အခေါင်ကၠောန်နွံဂှ် ညးတာလျိုင်သေံတံ အာစိုပ်ရပ်ဏာလဝ်ရောင် ဂွံတီကေတ်ရ။
အတိုင်ကဵုပရိုင်တေင်ဏာဂှ်ရ ဂိတုဂျူလာင် (၂၃) ၊ နူတနေံဏံ အခိင်တ္ၚဲစေင် ၜိုတ် (၃) နာဍဳဂှ် ဂီုကၠီုတွဵုရး၊ ဌာနပရိုင်၊ ဌာနက္ဍိုက်က္ဍိုပ်စၞောန်ပ္ညုင်သၟာကမၠောန်ခရိုင် ကေုာံ ဂကောံဒပ်ဗၠာဲသၟိင်မင်ပယျဵုတံ ပံင်ကောံတုဲ အာစိုပ်စၟဳစၟတ်လဝ် ပ္ဍဲပွဳဗွိုင်ရုင်စက် “Vita Foods Co., Ltd.” မၞုံပ္ဍဲဂကောံကွာန်သေန်တိုဝ်၊ ပွိုင်ဍုင်တာမခါ၊ ခရိုင်ကာန်ချဏၝုရဳဂှ်ရ။
အတိုင်စၟဳစၟတ်ဂှ်မ္ဂး ဂွံဆဵုကေတ် သၟာကမၠောန်ဆုဲပြံင်ကောန်ဍုင်ဗၟာ (၆) တၠ မသွံမံင်ဖျာပ္ဍဲဆေင်အလဵုဇကု ပ္ဍဲဂတမုက်ရုင်စက်ဂှ်ရ ထိင်ဒဝ်ရပ်စပ်ဏာရ။
ကမၠောန်သွံဖျာဝွံ ဒှ်ကမၠောန်သွက်ကောန်ဍုင်သေံဟေင် စၟတ်လဝ်တၞဟ်ခြာ ဒၞာတာလဝ်တုဲ သွက်ညးဒေသသၟာဖျာသေံတံ သကဵုကတဵုဒှ်ဘဲဇီုကပိုက်ဂိလေင်ရဂှ်လေဝ် ဂကောံဒပ်ဗၠာဲသၟိင်တံ ဂးရ။
ညး (၆) တၠဂှ်ဝွံ နကဵုတင်စၞောန်အမိင် ဆေင်ကဵုပရေင်ကောပ်ကာဲဖန်ဇန် သၟာကမၠောန်ဆုဲပြံင် သၞာံ (၂၀၁၇) ကဵု “နကဵုလုပ်ကၠောန်ဒးကမၠောန်ဒၞာတာ ဟွံကဵုအခေါင်” ပ္ဍဲဥပဒၝေောံပိုဒ် (၈) ၊ တင်ပလေဝ်ပလေတ် အလန်ဒုတိယ သၞာံ (၂၀၁၈) ဂှ် ဒးဒုင်ပ္တိုန်လဝ်အမှုတုဲ အတိုင်ၝောံပိုဒ် (၁၀၁) ဂှ် ကေတ်အာအရေဝ်ရောင် ဂးရ။
အခိင်လၟုဟ်ဏံဝွံ နကဵုညးတာလျိုင်သေံတံ အတိုင်သၞောဝ်ဥပဒေ သွက်ဂွံဆက်ကေတ်အရေဝ် ကုသၟာကမၠောန်ဆုဲပြံင်ဒးဒုင်ရပ် (၆) တၠတံမာန်ဂှ် လှောဲပအပ်ဏာလဝ် ဇရေင်ဗဒိုပ်ဗၠာဲသၟိင် “တာမခါ” တေံရောင် ဂွံတီကေတ်ရ။