အပ္ဍဲအရာပ်လ္တူဍုၚ်ပံၚ်၊ တွဵုရးဍုၚ်မန်ဝွံ ဟိုတ်နူလဗိုတ်ကျာမေလံၚ်မပိုက်ဏာဂှ်မ္ဂး လၟိဟ်စမြိုၚ်ကြပ်ကဵုကၠံ လီုလာ်အာတုဲ ဂွံရီုဗၚ်အောန်ဂှ်ရ သွက်ဂွံက္လေၚ်ပလေဝ်သိုၚ်ခၞံသ္ၚိဂှ် ဒှ်မံၚ်ခက်ခုဲရောၚ် ဂွံတီကေတ်ရ။
အတိုၚ်စရၚ်ဂကောံအုပ်ဓုပ်ပွိုၚ်ဍုၚ် ကမ္မယှေန်ပၞာန်ဂှ်မ္ဂး ပ္ဍဲဂိတုဂျူလာၚ် (၅) ဏံ ဟိုတ်နူလဗိုတ်ကျာမေလံၚ်မပိုက်ဏာဂှ်ရ နူသ္ၚိကၟိန် (၆၆) သ္ၚိ၊ လၟိဟ်မၞိဟ် (၂၄၄) တၠ မၞုံပ္ဍဲအရာပ် (ကဒါ၊ ကဒုံစီး) ဂှ် ဒးအာဘဲလဗိုတ်ကျာရောၚ် ဓမံက်ထ္ၜးလဝ်ရ။
ဗော်ပရေၚ်ဍုၚ်ကွာန်လ္ၚဵုတံ ကဵုထံက်ပၚ်ဇွောံမစၞစကီု၊ ဂကောံအုပ်ဓုပ်ကွာန်/အရာပ်တံ မွဲသ္ၚိကၟိန်မ္ဂး ကဵုထံက်ပၚ်သြန်လၟိဟ်ကဵုဠက်ဒကေဝ်ကီုလေဝ် သွက်သ္ၚိကၟိန်သဇိုၚ်တံဂှ် ဟွံပြေပြံၚ် (ဟွံရုံဂပ်) ရောၚ် ညးဒေသမွဲတၠ ဟီုရ။
“ဒးက္လေၚ်ပလေဝ်သ္ၚိတှေ် လ္ၚဵုတံ ဒးပံၚ်ပွံၚ်ဂၠေံလှုဲလေဝ်နွံရ။ မၞိဟ်သြန်နွံတံဂှ် သ္ၚိညးကဵုညး က္လေၚ်ပလေဝ်တုဲမံၚ်ရ။ ကၟဳသောတ်တှေ် အိုတ်ၜိုတ် (၃၀) ရ။ မွဲသ္ၚိဂှ် ကဵုဒစာံဠက်ရတှေ် သောတ်ၜါတၞးဟေၚ်ဂွံရ။ မွဲသ္ၚိတှေ် အောန်အိုတ် သောတ် ၜိုတ် (၃၀) တၞး” သာ်ဝွံ ဟီုရ။
ပ္ဍဲကဵုဗလးတိဂှ် သ္ၚိကၟိန်ဒးဘဲလဗိုတ်ကျာ နွံကြပ် (၁၀၀) ကီုလေဝ် ဟိုတ်နူဒှ်သ္ၚိကၟိန် မံၚ်တန်တဴၜက်ၜေတ်လုပ်ဂှ်ရ နူဂကောံကမ္မယှေန်ပၞာန်တံ ဟွံကဵုရီုဗၚ်ရ။
သၟာၚ်နူဂှ်ပၠန် တာဲ၊ သ္ၚိဒၟံၚ်၊ ဆေၚ်ဖျာ လုပ်ၜက်ၜေတ်သိုၚ်ခၞံလဝ်ဂမၠိုၚ်ဂှ် နူဂကောံဗဂဵုလဟဵုဍုၚ်ကွာန်တံ ဟွံကဵုအခေါၚ်က္လေၚ်သိုၚ်ခၞံရဂှ်လေဝ် ဂွံတီကေတ်ရ။
“သၠဲဂၠံၚ်ဂှ် နွံ (၁၀၀) ပေရ။ ကၠအ်နွံမံၚ် ပ္ဍဲကဵုပေ (၁၀၀) တံဂှ်တှေ် သ္ၚိလုပ်သၞောဝ် စၟတ်ကေတ်တုဲတှေ် ဖျာသ္ကဲဂၠံၚ်၊ တာဲ၊ ဆေၚ်ဇဗၠုတံဂှ် ဟွံတော်မွဲသာ် သ္ၚိနွံပ္ဍဲကၠအ်တံဂှ် တော်တုဲတှေ် နူတနေံဏံ (၆၅) ဟာ ဟွံတီပုဟ်၊ ၜိုတ်ဂှ်ဟေၚ် ဂွံဒတန်ရ” သာ်ဝွံ ညးဒေသဂှ် ဟီုရ။
သ္ၚိဒၟံၚ် ကေုာံ ဆေၚ်ဖျာဂမၠိုၚ် ဟိုတ်နူအခေါၚ်က္လေၚ်သိုၚ်ခၞံဟွံမွဲဂှ်ရ သွက်သ္ၚိကၟိန်ၜက်ၜေတ်လုပ်တံဂှ် ဒးဆဵုဂဗခက်ခုဲ ပရေၚ်စသုၚ်မံၚ်စံၚ်မာန်ရောၚ် ညးဒေသဍုၚ်ပံၚ်မွဲတၠ ဟီုရ။
ပ္ဍဲဍုၚ်ပံၚ်ဝွံ သွက်ဘဲအန္တရာဲသဘာဝ မဒးဆဵုဂဗမံၚ် အခိၚ်ကာလကသီု ဇၟာပ်သၞာံဂှ်လေဝ် ဒးဒစးဒုၚ်ပလေဝ်ပလေတ်လဝ်ရောၚ် ဂကောံရီုဗၚ်မၞိဟ်တံ ဖ္တိုက်ဖၟောဝ်ကဵုလဝ်ကသပ်ရ။
အပ္ဍဲရာသဳကသီု သၞာံ (၂၀၂၅) တုဲကၠုၚ်ဏံဝွံ အရာပ်ပံၚ် ၊ အရာပ် “မိုးနိုၚ်” ၊ ဍုၚ်ပံၚ် ပါလုပ်ကီု သီုဖအိုတ် ဟွံအောန်နူ (၆) ဒၞာဲဂှ် ဒးဆဵုဂဗဘဲဒဏ် လဗိုတ်ကျာမေလံၚ်တုဲ ပရေၚ်လီုလာ်ကီု မၞိုဟ်ဒးဘဲဝပ်ကီု နွံကၠုၚ်လဝ်ဂှ် ဂွံတီကေတ်ရ။