ပ္ဍဲဍုၚ်မန်ဝွံ ဒၟာနူရာန်ကၠေၚ်ဝါတ်တုဲ တၠကၠအ်ဂမၠိုၚ်တအ် ဒှ်ပရေၚ်ခက်ခုဲကဵု ဗာ်ရာပ်ကၠအ်ရောၚ် တၠကၠအ်တဵုလဝ်ကၠအ်ထ္ၜိုတ်တၟိ နူပွိုၚ်ဍုၚ်ဇြပ်ဗုမွဲတၠ ဟီုရ။
အခိၚ်လဒေါဝ်ကသီုဏံဂှ် ဒှ်ဒၟံၚ်အခိၚ်ဗာ်ရာပ်ကၠအ်ထ္ၜိုတ်တၞံတၟိတၟိတအ်တုဲ ဒၟာနူရာန်ကၠေၚ်ဝါတ်ကၠုၚ်ဂှ်ရ ဂွံဗာ်ရာပ်ကၠအ်ဂှ် ခက်ခုဲဒၟံၚ်ဖိုဟ်ရောၚ် တၠကၠအ်ထ္ၜိုတ်တဵုလဝ်တၟိ နာဲမျေအ်ထောန် ဟီုရ။
“ကၠေၚ်အလန်ဏံ ကြေပ်ဂြတ်တိုန် နူတုဲကၠုၚ်တေံဏီ။ ကွဳစက်ကာ၊ ကွဳလိုန်ဓာတ် လိုၚ်ဇြေန်နွံရ ရာန်ကၠေၚ်ဂွံ၊ ရာန်ဂွံဟီုဂှ်လေဝ် ဂွံအရိုဟ်တ္ၚဲဟွံသေၚ် တ္ၚဲဂွံဂှ်မှဂွံ၊ ကွဳစက်ကာ၊ ကွဳလိုန်ဓာတ်လိုၚ်ဇြေန်ဟွံမွဲဂှ်တှေ် ဗီုလဵုပလေဝ် ရာန်ကၠေၚ်ဟွံဂွံပုဟ်၊ ရာန်ကၠေၚ်ဟွံဂွံတုဲတှေ် ဂွံအာဗာ်ရာပ်ကၠအ်ထ္ၜိုတ်ဂှ်လေဝ် ကၠေၚ်စက်ဟွံမွဲ၊ ရာပ်ဂှ်လေဝ်တိုန် တီတိုန်အရိုဟ်တုဲ ခက်မံၚ်ဖိုဟ်” သာ်ဝွံ တၠကၠအ်ဂှ် ဟီုရ။
ပ္ဍဲဍုၚ်မန်ဂှ် သၞောတ်စုံ-မ ကီု၊ သီုကဵုသၞောတ်ဂျူအာကုဒ်ကီု ကြေပ်ဂြတ်တိုန် နူကဵုတုဲကၠုၚ်တေံဏီတုဲ ကွဳစက်ကာ၊ ကွဳလိုန်ဓာတ် လိုၚ်ဇြေန်ဟွံမွဲတအ်ဂှ် ဒှ်ခက်ခုဲဂၠိုၚ်နူကဵု တုဲကၠုၚ်တေံဏီရောၚ် တၠကွဳစက်ယာန်တအ် သ္ဂးရ။
“ကၠေၚ်ပိုတ်အလန်ကၠာတေံဂှ် ကွဳလိုန်ဓာတ်၊ ကာ လိုၚ်ဇြေန်ဟွံမွဲဂှ်တှေ် ရာန်ဂွံမံၚ်ဏီ၊ အလန်ဏံဂှ် ဟလဵုပလေဝ် ရာန်ဟွံဂွံရပုဟ်၊ ဒေသပိုဲဏံဂှ် ဗွဲမဂၠိုၚ်ဂှ် ကွဳစက်ကာ၊ ကွဳလိုန်ဓာတ် လိုၚ်ဇြေန်ဟွံမွဲသၟးရနွံဂၠိုၚ်တှေ် ရဲဒးကၠောန်ကမၠောန် အရိုဟ်တ္ၚဲတအ်ဂှ်တှေ် ခက်ရ၊ ရဲကၠောန်ကမၠောန်သွံဖျာဂှ်တှေ် ပဵုခက်ဂၠိုၚ်” သာ်ဝွံ တၠကွဳစက်ကာ သွံမံၚ်ဖျာသၞေဝ်ကေဝ်၊ ကဖျုန် အပ္ဍဲပွိုၚ်ဍုၚ်ဇြပ်ဗုမွဲတၠဂှ် ဟီုပၠန်ရ။
ပ္ဍဲဍုၚ်မန်ဂှ် ဒၟာနူရာန်ကၠေၚ်ဟွံဂွံဂှ်တုဲ တၠကမၠောန်လ္ၚဵုတအ်ကီု၊ သၟာကမၠောန်လ္ၚဵုတအ်ကီု ဒးဇူကမၠောန်နွံကၠုၚ်တုဲ သီုကဵုခက်ခုဲကၠုၚ် ပရေၚ်စသုၚ် ဗပေၚ်ဗုၚ်ဂၞဴရောၚ်ဂှ်လေဝ် တၠကွဳစက်ကာ သွံသၞေဝ်ဂှ် ဆက်ဟီုရ။
အသိၚ်အလိုန်ပေါဲဗတိုက် အမေရိကာန်ကဵု အဳရာန်တေံတုဲ ပ္ဍဲကၟိန်ဍုၚ်ဗၟာလေဝ် သံသာဂေတ်ဒၟံၚ်ကဵု ရာန်ကၠေၚ်ကျာတ်ဂှ်ဖအိုတ်တုဲ ဗီုကဵုညးဍုၚ်ကွာန်မန်တအ် ဍိုက်သုၚ်စောဲဒၟံၚ် ကွဳစက်ယာန် လိုၚ်ဇြေန်ဟွံမွဲနွံဂၠိုၚ်တုဲ ရာန်ကၠေၚ်ဟွံဂွံ၊ ဒှ်မံၚ်ဒဒိုက်ကဵု ကၠေၚ်စက်အိုတ်ရောၚ် ဂွံတီကေတ်ရ။