ပ္ဍဲသၞာံဗ္တောန်ပညာ (2026-2027) ဏံ သွက်သၟတ်ဘာတုဲလဝ် ပရေင်ပညာကဆံင်သၠုင်တအ် နူကဝ်လိက်ကောန်ဂကူမန် ထပ်ပံက်အာ တန်ဥပဒေ (law program) မွဲနွံရောင်ဂှ် နူကဵုမုက်လိက် ကဝ်လိက်ကောန်ဂကူမန် လလောင်တြးလဝ်ရ။
ပ္ဍဲတန်ဥပဒေ (law program) ဂှ်မ္ဂး သ္ဇိုင်သၞောဝ်ဥပဒေကၟိန်ဍုင်၊ သၞောဝ်ဥပဒေဂၠးတိ၊ သၞောဝ်ပိုင်ပြဳတိဍာ် ကေုာံ သၞောဝ်ညးဍုင်ကွာန်တအ် ဒးတီထေက်ဂှ်လေဝ် ပါလုပ်ဗ္တောန်အာကဵုရောင် ဂွံတီကေတ်ရ။
ရန်ကဵုသွက်သၟတ်မန်တအ် ဂွံဒှ်အာ အထံက်အရီု ပ္ဍဲကမၠောန်လၟေင်တ္ၚဲကီု၊ ကွးဘာတအ် သ္ဂောံကၠိုဟ်အာ သ္ဇိုင်သၞောဝ်ဥပဒေကီု ရန်တၟအ်တုဲ ပံက်လဝ်တန်ဗ္တောန်ဏံရောင်ဂှ် ဂအုပ်ဘာကဝ်လိက်ကောန်ဂကူမန် ဒံက်တာနာဲပညာမန် ဟီုရ။
“ယဝ်ကွးဘာတအ်ဂွံလဝ် ဘာဥပဒေဏံတှ်ေ ကၠောန်ပရေင်ဍုင်ကွာန်ကဵုဒှ်၊ ရီုဗင်ညးဍုင်ကွာန်ကဵုဒှ် ဇကုတီမံင်သၞောဝ်တှ်ေ ရဲအုပ်ဓုပ်ကဆံင်လ္တူတအ် ဟွံဂံင်ဍဵုဍိုက်ဇကုပုဟ်။ ဂွံလဝ်ဘာဏံတှ်ေ ကာလကၠောန်ပေါဲရုဲမာဲတအ်တှ်ေ ဒှ်အထံက်အရီုတၟာဂလိုင်” သာ်ဝွံ သ္ဂးရ။
ဘာသာဏံဂှ် သွက်သၟတ်ဘာတုဲလဝ် ပရေင်ပညာကဆံင်သၠုင်တအ်ဟေင် ရန်တၟအ်လဝ်တုဲ ကွးဘာ ညးမတုဲလဝ် post-ten၊ ၜိုပ်ထဝ်၊ ကဝ်လိက်မန်တအ် သွက်ဂွံကၠုင်စိုပ် ပ္ဍဲဂိတုဂျူလာင် (၃၁) ဏံ စွံလက်ကရဴအိုတ်တုဲ ပတိုန်စာရင်ညိဂှ်လေဝ် နူဘာကဝ်လိက်ကောန်ဂကူမန် လလောင်လဝ်ကီုရ။
ပံက်အာတန်ဗ္တောန် နကဵု online ကၠာတုဲ ပ္ဍဲဘာသာဏံ ဒၞာဲခန်လ္ၚတ် ဒးဗတောန်အာ နတဲတအ်ဂှ် သွက်ဂွံကော်ဗတောန်အာ နတဲ ပွိုင် (၂) ဂိတုနွံရောင်ဂှ် ဂွံတီကေတ်ရ။
“လ္ၚတ်လဝ်သၞောဝ်ဏံတုဲတှ်ေ ဆေင်ကဵုလိက်ကသုက်ပိုယ်သွံရာန်တိကၠအ်တအ်တှ်ေ ပိုယ်ဂွံသွံအာနဲလဵု ပိုယ်ဒးဒုင်မံင်အလီဟာဂှ် ပိုယ်တီအာမာန်ဏောင်လေဝ်။ အောန်အိုတ်ဂှ် ဍေံဒှ်မံင်ဂုန်ဖဵုသွက်ပိုဲကဵု ပွဳပွူပိုဲဏောင်လေဝ်၊ ဗက်အမှုဂှ် လ္ပဟီုဏီ။ ” သာ်ဝွံ သၟတ်မန်မွဲတၠဂှ် ဟီုရ။
ကွးဘာဂွံလဝ်မူလဝိဇ္ဇာ ပ္ဍဲကဝ်လိက်မန်တအ်ဂှ် ယဝ်တိုန်တန်ဗ္တောန်ဏံမ္ဂး ထပ်ဂွံတဆိပ်ကြာ မူလဝိဇ္ဇာဥပဒေမွဲပၠန်တုဲ ကွးဘာတၞဟ်ဟ်တအ်ဂှ် ဂွံဒဳပလိုမာ ပ္ဍဲသၞောဝ်ဥပဒေမာန်ရောင်ဂှ် ဂအုပ်ဘာကဝ်လိက်မန် သောင်ကလးလဝ်ရ။
“ကွးဘာကဝ်လိက်တအ်ဂှ် ဍေံတအ်တိုန်လဝ် တန်ဗ္တောန်နာနာ နူကဝ်လိက်ပိုဲတုဲ ဂွံကဵု associate degree ဂှ် credits ဍေံတအ်ပေင်မံင်။ ကွးဘာသၟေဟ်တအ်ဂှ် ဂွံဏာနူဘာသာအဓိက 33 credits ရ။ ဟိုတ်ဂှ်ရ ပိုယ်တအ်ကဵုဍေံတအ် ဒဳပလိုမာရဂွံ” သာ်ဝွံ ဟီုရ။
ကဝ်လိက်ကောန်ဂကူမန်ဂှ် ဒက်ပ္တန်လဝ် နူသၞာံ (2022) ပ္ဍဲဗဒိုပ်ညဳသာတုဲ ပ္ဍဲသၞာံဗ္တောန်ပညာ (2026-2027) ဏံမ္ဂး လၟိဟ်ကွးဘာနွံမံင် (354) တၠတုဲ ကတ်လ္ၚတ်မံင် နကဵုဘာသာအဓိက (7) ဘာသာ မဳဒဳယာ ကေုာံ ပရိုင်၊ ပရေင်ပညာ၊ သိပ္ပံပရေင်မၞိဟ်၊ ပရေင်အာက္ဍိုပ် ကေုာံ ကောပ်ကာဲဂကောံ၊ ကတ်လ္ၚတ်မန်၊ Information Technology (IT) တအ်နွံရ။