မၞိဟ်ဒယှ်လ္တူလပှ်ကျာ သၟာဗၠံက်ဂါ ခုတ်လဝ်နကဵုယၟု (Hlun Solo) ဏအ်ဝွံ ကၠေံမံၚ်ပွိုၚ်မွဲသတ္တဟ ပ္ဍဲကၟိန်ဍုၚ်ဂျဝ်ဂျဳယျာဂှ် ပ္ဍဲဂိတုဂျူလာၚ် စၟတ်တ္ၚဲ (၂၉) နူတနေံဏအ် ဗွဲမအောန်စိုတ် ဂွံဆဵုကေတ်ချိုတ်မံၚ်ဣရဂှ် ပရိုၚ်မံက်တိတ်ကၠုၚ်ရ။
ပ္ဍဲဂိတုဂျူလာၚ် စၟတ်တ္ၚဲ (၁၃) တုဲကၠုၚ်ဏံ သၟာဗၠံက်ဂါ (Hlun Solo) ကောန်ဍုၚ်သေံဏအ်ဝွံ အဃောညးတိတ်တရဴ ပ္ဍဲကၟိန်ဍုၚ်ဂျဝ်ဂျဳယျာဂှ် အဆက်ပိုတ်ကဵုပ္ဍဲသ္ၚိ သီုကဵုသ္ကအ်ရဲမိတ်သဟာဲညးတုဲ ဟိုတ်နူအဆက်ပိုတ်ကၠေံမံၚ် ပွိုၚ် (၁၅) တ္ၚဲပြၚ်ဂှ် ပ္ဍဲသ္ၚိကၟိန်ညး မိဇၞော် ကဵု ဒေံတြုံညးတေံ ကေတ်အဆက်ကဵု ညးတာလျိုၚ်သေံတအ် ကဵုသမ္တီဏာ ကုဗၠာဲသၟိၚ်ဂျဝ်ဂျဳယျာတအ်တုဲ ဂၠိုက်ဂၠာဲဂွံဆဵုကေတ် ချိုတ်မံၚ်ပ္ဍဲဟိုဝ်တေဝ် အခန်ဒၟံၚ်ညးတေံဂှ်ရ။
သၟာဗၠံက်ဂါ (Hlun Solo) ဏအ်ဝွံ အာယုက် (၂၆) သၞာံ ယၟုအရၚ် “နာဲၜါဝန်ထက် ဘေန်သု’’ မၞုံတန်တဴမံၚ် ပ္ဍဲကၟိန်ဍုၚ်သေံ သ္ကုတ်ဒေသ ကာလာဇြေန် (Kalasin) ဒှ်ကောန်သေံမွဲတၠတုဲ အခိၚ်ညးတေံ မၞုံအဝဲကောန်ၚာ်ဍောတ်တ်ဂှ်ရ မိကီု မအံက်ကီု ဟွံမွဲတုဲ ဇၞော်ဂေါဝ်ကၠုၚ် ပ္ဍဲတဲမိဇၞော်ညးတေံရ။
သွက်သ္ဂောံတိုန်ဘာ ကတ်လ္ၚတ်ပညာပၠန်ဂှ် စရိတ်တိုန်ဘာ ဩန်ဟွံရုမ်ဂပ်တုဲ နအလဵုညးတေံ ဂၠာဲကၠောန်ကမၠောန်တုဲ ကတ်လ္ၚတ်ပညာ တိုန်မံၚ်ဘာသာ်ဏအ်ကီုရ၊ အဆံၚ်ပညာညးတေံ တိုန်စိုပ်ကၠုၚ် ဘာတန်သၠုၚ် ပ္ဍဲလ္တူဍုၚ်ဇၞော်ၜၚ်ကံက်ဂှ် ဂၠာဲကၠောန်ကမၠောန် ပ္ဍဲကဵုရုၚ်မွဲဒၞါဲ နဒဒှ်သၞာဲဒဴမွဲတၠဂှ် ကလိဂွံဩန်ဂိတု ဗ္ဒါဲမွဲလက်ၝာတ်တုဲ ပကောံစွံလဝ်ဩန် ဂွံဆက်တိုန်အာ ဘာတန်သၠုၚ်ဂှ်ရ။
(Hlun Solo) ဏအ်ဝွံ ဟိုတ်နူပရေၚ်ရုန်ဂ္စာန်ဘဝညးတေံတုဲ တိုန်စိုပ်ကၠုၚ်တက္ကသိုလ်အဆံၚ်သၠုၚ် (Chulalongkorn) ကတ်လ္ၚတ်ကၠုၚ်ပွိုၚ် (၄) သၞာံဂှ် ကလိဂွံတဆိပ်ကြာတုဲ အကြာတိုန်ဘာတက္ကသိုလ်ဂှ် ကၠောန်မံၚ်ကမၠောန်နာနာသာ် ကလိဂွံမံၚ်ဩန်ဂိတု အကြာ (၈,၀၀၀) ၝာတ် ကဵု (၉,၀၀၀) ၝာတ်နွံတုဲ အခိၚ်ညးတေံဘာတုဲဂှ် ဩန်ဗိတ်ဂျိတ်သှေ်မံၚ် (၃) ကိုဋ်ၝာတ်ပြၚ်တုဲ အတိုၚ်သွပ်လ္ပအ် အခိၚ်ညးတေံဍောတ်တ်တေံဂှ်ရ ဝါသနာမိက်ဂွံတက်ဗီုရုပ်စၟတ်သမ္တီတုဲ ညးတေံ စချဳဒရာၚ်ကၠုၚ် နကဵုဗီုပြၚ် (ဗၠံက်ဂါ) ညးအာတရဴမွဲတၠတုဲ ကၠောန်ကၠုၚ်ရ။
Hlun Solo ဂှ်ဝွံ တိုၚ်ပ္ကဴဘဝညးရန်လဝ် အံၚ်ဇၞးကၠုၚ်တုဲ အတိုၚ်ကူချပ်လဝ် သ္ဂောံဂေတ်အာတရဴ အလုံဂၠးတိရောၚ်ဂးတုဲ သော်သ္ၚေၚ်ညးတေံ ဍိုက်ပေၚ်ကၠုၚ်ဂှ်ရ အဃောညးတေံ ပဝ်ဂေတ်အာတရဴ လ္ပါ်ကဵုဇြိုဝ်မာလဳယျာ၊ ဗရန်ဒဳ၊ အိန္ဒဳယျ၊ ဂျပါန် စပ္တမ် (၅၀) ဍုၚ်ပြၚ်ဂှ် တက်လဝ်ဗီုရုပ်စၟတ်သမ္တီ ဗဳဒဳယိုဝ်နာနာသာ်တုဲ ပ္ဍဲကဵုမုက်လိက် (Facebook) နကဵုယၟု (Hlun Solo) ဂှ် ဖဝ်လိုဝ်ဝါ (၂ ဒဿမ ၅) ပြကောတိကိုဋ်ကဵု ပ္ဍဲယူကျုတ် (YouTube) နကဵုယၟု (Travel Vlogger) “Hlun Solo” ဂှ် (Subscribe) နွံမံၚ် (၉) ကိုဋ် (၁) လက်ပြၚ်ကၠုၚ်မံၚ်ဣရတုဲ ဆဂး အတိုၚ်ရန်တၟံတရဴအလုံဂၠးတိဂှ် ဟွံဍိုက်ပေၚ်ကၠုၚ်တုဲ ဗၞတ်(၅၀) ဍုၚ်ပြၚ်ဂှ်ဟေၚ် ညးတေံ ဒးဒေါံဇူထောံတရဴတုဲ သာဲတိတ်အာ နူကဵုလိုက်ဘဝမၞိဟ်ဏအ်ရ။
‘’နာဲၜါဝန်ထက် ဘေန်သု’’ဏအ်ဝွံ ဒှ်ညးမၞုံကဵုလစွံစိုတ် ဓရ်မေတ္တာလ္တူညးဂမၠိုၚ် ဗုအးမံၚ်မွဲတၠတုဲ ပရေၚ်ဟဒးဒယှ်ဍုက်ကေဝ်လ္တူညးဂမၠိုၚ်လေဝ်ခိုဟ်မံၚ်မွဲတၠကီုရ၊ ဟိုတ်ပရေၚ်ပရူ ဒးချိုတ်အာလဝ် သာ်ဏအ်ဝွံ ညးဍုၚ်ကွာန်သေံတအ်သၟးက သီုကဵုပရိတ်သာတ်ညးတေံ လ္ပါ်ဍုၚ်တၞဟ်သ္အာၚ်တအ်လေဝ် ဒှ်လၞီအောန်စိုတ် ဂိုဟ်ကဟောံမံၚ်အိုတ်ရ။
ပြဟ်ဟ်ဏအ်ဝွံ ပရူဒဒှ် “နာဲၜါဝန်ထက် ဘေန်သု’’ ချိုတ်အာလဝ်ဂှ် ညးတာလျိုၚ်သေံတအ် ဟွံတီလဝ်ချိုတ်တ်ပၠိုတ်တ်ဏီတုဲ ဗၠာဲသၟိၚ်ဂျဝ်ဂျဳယျာတအ် ဂွံဆဵုကေတ်လဝ် ဗီုပြၚ်ဇကုဇကုဂစိုတ်လဝ်ရောၚ် စၟတ်လဝ်တုဲ သာ်လဵုဂစိုတ်လဝ်ဇကုဇကုဂှ် ညးတာလျိုၚ်သေံ ကေုာံ ဗၠာဲသၟိၚ်ဂျဝ်ဂျဳယျာတအ်ကီု ဂၠိုက်ဂၠာဲမံၚ်သွဟ်ဍာံဖိုဟ်ဏီရောၚ် ဂွံတီကေတ်ရ။