ပ္ဍဲသ္ကုတ်ဂၠံင်ကွဳစက် မတ်မလီု – ဇြပ်ဗု၊ ကွာန်သၞေဟ်ဗ္ဒဝ်၊ ပွိုင်ဍုင်မုဟ်ဍုင်ဂှ် တ္ၚဲဏံ ဂိတုအဝ်ဂေတ် (၂၀) ၊ အခိင်နူဂယးဂှ် ဍာ်ဇၞော်ဍာ်ကလိုပ်ဒၟံင်ရောင် ညးဒေသတံ ဟီုရ။
အပ္ဍဲတွဵုရးဝွံ ဟိုတ်နူဗြဲဂူဇၞော်ဂှ်ရ ပ္ဍဲသ္ကုတ်ဂၠံင်ကွဳစက် အကြာကွာန်သၞေဟ်ဗ္ဒဝ်ကဵု ကွာန်ယေန်ဒံင်ဂှ် စနူ နူဗ္တံဏံတုဲ ဍာ်တိုန်ကၠုင်ဂှ်ရ အခိင်နူဂယးဏံ ဍာ်ၜက် (ဍာ်ကလိုပ်) ဂၠံင်ကွဳစက်တုဲ သွက်ဂွံတတ်ကၠောံအာကၠုင်ဂှ် ဒှ်ကၠုင်ခက်ခုဲကီု ဂးရ။
ဟိုတ်နူဍာ်ဇွောဝ်ထတ်မံင်လ္တူဂၠံင်ကွဳစက်ဂှ်ရ ကွဳလိုန်ဓာတ် ကေုာံ ကွဳစက်ဍိုက်သွက်သ္ၚိ၊ ကွဳစက်ဍောတ်ဍောတ်ဂမၠိုင် တတ်ကၠောံအာကၠုင်ဟွံဂွံရဂှ် ညးဒေသမွဲတၠ ဟီုရ။
“ကွဳလိုန်ဓာတ်၊ ကာဍိုက်သွက်သ္ၚိ ဍောတ်ဍောတ်တံ တတ်ဟွံဂွံရပုဟ်။ ဍာ်ဇွောဝ်ထတ်တုဲ တတ်တှ်ေ အန္တရာဲဂၠိုင်ရ။ ကာဇၞော်ဇၞော်ဂှ်တှ်ေ တတ်ဂှ် တတ်မံင်ဏီရ။ ပရေံကၠုင်နူဏံတှ်ေ ကာဇၞော်ဇၞော်တံလေဝ် တတ်ဟွံဂွံရပုဟ်” သာ်ဝွံ ညးဒေသသၞေဟ်ဗ္ဒဝ်မွဲတၠဂှ် ဟီုရ။
ယဝ်စကာအာကၠုင်ဂၠံင်ဍာန်ဂှ်မ္ဂး ဒးဒစးဒုင်သၟာန်သၟုက်ဂၠိုက်ဂၠာဲ အကာဲအရာဂၠံင်တရဴတုဲ ပ္ဍဲသ္ကုတ်ဂၠံင်ဍာ်ၜက်ကၠောံဇွောဝ်မံင်တံဂှ် လ္ပတတ်ကၠောံဒဳအာအတေင်ညိဂှ်လေဝ် ဂကောံဟံင်ပြာ်မၞိဟ်ဒေသတံ ဟီုဂးဖ္တိုက်ဖၟောဝ်လဝ်ရ။
ပ္ဍဲသ္ကုတ်ဂၠံင်ကွဳစက် ဍာ်ဇၞော်ဍာ်ကလိုပ်မံင်ဂှ်ဝွံ ကွဳစက်ဂမၠိုင်၊ ကွဳလိုန်ဓာတ်ဂမၠိုင် ညံင်ဂွံတတ်ကၠောံအာကၠုင် ဗၠးဘဲအန္တရာဲမာန်ဂှ် ဂကောံအုပ်ဓုပ်ကွာန်၊ ကောန်ကွာန်၊ ဂကောံဟံင်ပြာ်မၞိဟ်ဒေသတံ ဘိုင်ရေင်တၠုင်ရီုဗင်မံင်နွံရ။
တုပ်သာ်ဂှ်ကီု ပ္ဍဲကွာန်ဖံင်စိင်၊ ကြပ်ဍုင်ဇြပ်ဗုဂှ်လေဝ် စနူအခိင်နူဂယးဏံတုဲ ဍာ်တတ်ၜက်မံင်ဂၠံင်ကွဳစက်ရောင် ညးဒေသတံ ဟီုရ။
အပ္ဍဲတ္ၚဲအကြာတဏံဝွံ ဟိုတ်နူဗြဲဂူဆက်မံင်ဂှ်ရ ပ္ဍဲကဵုကွာန် ကေုာံ အရာပ်လ္ၚဵု မၞုံသ္ကုတ်တိသဝ်တံဂှ် ဍာ်လုပ်စိုပ်ဒၟံင်နွံရ။
အတိုင်ဌာနဗြဲကျာ လလောင်ပ္တိတ်လဝ် ပ္ဍဲဂိတုအဝ်ဂေတ် စၟတ်တ္ၚဲ (၂၀) ၊ အခိင်နူဂယးဏံမ္ဂး ပ္ဍဲတွဵုရးဍုင်မန်ဝွံ နလၟေင်ဒေသ ဗြဲဇၞော်ပြံက်ဂူမာန်ရောင် လလောင်ပ္တိတ်လဝ်ရ။
မွဲကရောံကဵုဗြဲဂူဇၞော်ဂှ်မ္ဂး မပ္တံဘဲအန္တရာဲသဘာဝ လဗိုတ်ကျာထတ်ကီု၊ ဍာ်ဇၞော်ဍာ်ကလိုပ် ကေုာံ တိလာ်ကီု ကတဵုဒှ်မာန်တုဲ ညးမံင်တန်တဴ ကြပ်ဒေသတိကုန်/တိသၠုင်တံ စွံသတိဘဲအန္တရာဲတိလာ်ကီု၊ ညးမံင်တန်တဴ ကြပ်ကဵုၜဳကြုင်တံ စွံသတိကဵု ဘဲအန္တရာဲ ဍာ်ဇၞော်ဍာ်ကလိုပ်ညိဂှ် ဌာနဗြဲကျာတံ လလောင်ပ္တိတ်လဝ်ရ။