ကောန်ကၟိန်ဍုင်ဗၟာ ညးဒၟံင်တန်တဴ ပ္ဍဲကၟိန်ဍုင်သေံ နကဵုလိက်အုပ်ပါတ်သပတ် ဂကူ PV တံ မိက်ဂွံလှာဲလိက်အုပ်တၟိ၊ ဆက်အာယုက် ကေုာံ မိက်ဂွံပြံင်လှာဲ ဂကူပါတ်သပတ်မ္ဂး သ္ဒးဒစးဒုင်ပ္တိုန်စရင် ပ္ဍဲရုင်ကလုတ်ဗၟာရောင် ဂွံတီကေတ် နူညးရေင်တၠုင် ကိစ္စကေင်ကာလိက်အုပ်တံရ။
စနူဂိတုအဝ်ဂေတ် စၟတ်တ္ၚဲ (၁၈) ၊ နူတနေံဏံတုဲ ညးကၠုင်စိုပ်ဂတမုက်ရုင်ကလုတ် သွက်ဂွံလှာဲလိက်အုပ်တၟိ၊ သွက်ဂွံဆက်အာယုက်တံဂှ် သကဵုပ္တိုန်လိက်ပ္တိုန်စရင်တုဲ ကလိဂွံအခေါင်ဟေင် ဆက်ရေင်တၠုင်ကဵုရောင် ညးတာလျိုင်ရုင်ကလုတ်တံ ဟီုရ။
ကလိဂွံအခေါင် နူလ္ပာ်နေပျဳဒဝ်ဟေင် ကၠောန်သ္ပရေင်တၠုင်ကဵု ပရေင်ပြံင်လှာဲ ကိစ္စလိက်အုပ်ပါတ်သပတ် PV ဂှ်ရ မူဝါဒသ္ဒးဒစးဒုင်ပ္တိုန်စရင်တၟိ မံက်တိတ်ကၠုင်မာန်ရောင် ညးရေင်တၠုင်စၟတ်တဲကၠောံဍုင် ကၟိန်ဍုင်ဗၟာ ပ္ဍဲဍုင်ၜင်ကံက်မွဲတၠ ဟီုရ။
“မုဟိုတ်ဂွံဒှ်ကၠုင်ဗီုဏံရောဟီုတှေ် ဟွံတီချိုတ်ပၠိုတ်ဏီပုဟ်။ ဆဂး မင်ရံင်မံင် အကာဲအရာရ။ ဒှ်ကၠုင်ဗီုဏံကွေံတှေ် သွက်ညးမံင်တန်တဴဒၟံင်လ္ပာ်ဏံဂှ် ဒှ်ကၠုင်ခက်ခုဲမာန်ရ” သာ်ဝွံ ညးရေင်တၠုင်ကေင်ကာပါတ်သပတ်မွဲတၠ ဟီုရ။
အတိုင်လၟေင်ကမၠောန်ပြံင်လှာဲလဝ် လၟုဟ်ဏံမ္ဂး ညးရပ်လဝ် လိက်အုပ်စၟတ်တဲကၠောံဍုင် PV တံဝွံ မိက်ဂွံပြံင်လှာဲ ကိစ္စလိက်အုပ်မွဲမွဲသာ်မ္ဂး နအလဵုဇကုဗပေင်ဝှမ်တုဲ ဒးကလိဂွံအခေါင် နူနေပျဳဒဝ်ရ။
ကလိဂွံလိက်က္လေင်ပရိုင် နူနေပျဳဒဝ်ကဵုအခေါင်ဂှ်ဟေင် ဆက်ကၠောန်သ္ပရေင်တၠုင်ကဵု ပရေင်ဆက်အာယုက်လိက်အုပ်စၟတ်တဲကၠောံဍုင် ကေုာံ လှာဲလိက်အုပ်တၟိရောင် နူရုင်ကလုတ် ကဵုသမ္တီဟီုဂးလဝ်ရ။
သွက်ညးရပ်လဝ်ပါတ်သပတ် PV တံဝွံ ကာလရေင်တၠုင်ကိစ္စရုင်ကလုတ်ဂှ်မ္ဂး အခိင်လအ်ဂၠိုင်မာန်တုဲ ဒးဆဵုဂဗခက်ခုဲမာန်ရဂှ်လေဝ် ညးရေင်တၠုင်ကေင်ကာ ပါတ်သပတ်တံ ဟီုရ။
ၜိုန်ဂှ်ကီုလေဝ် သွက်ညးရပ်လဝ်ပါတ်သပတ် ဂကူ PJ တံဝွံ အတိုင်ဂကူ PJ ၊ ညးရပ်လဝ်ပါတ်သပတ်ဂကူ PE တံဝွံ အတိုင်ဂကူ PE ဂှ် အခေါင်လှာဲလိက်အုပ်တၟိ နွံမံင်ဖိုဟ်ရ။
ဆေင်စပ်ကဵုနဲကဲကမၠောန် ပရေင်လှာဲလိက်အုပ်တၟိပါတ်သပတ် PV လၟုဟ်ဏံတုဲ နူရုင်ကလုတ်ကၟိန်ဍုင်ဗၟာ ပ္ဍဲဍုင်ၜင်ကံက် လလောင်ပ္တိတ်လဝ်ဗဗွဲဓဝ် ဟွံမွဲဏီဂှ်ရ ညးရပ်လဝ် PV တံ ဆက်မင်ရံင်ဒၟံင်ဖိုဟ်ရ။
တုဲပၠန် လ္တူပြံင်လှာဲဏာလၟေင်ကမၠောန် ဟွံဒစးဒုင်ကဵုသမ္တီဏံတုဲ ကောန်ဍုင်ဗၟာ မစိုပ်ကၟိန်ဍုင်သေံတံ ဟီုဂးပါ်ပဲါဒၟံင်နွံရ။