အပ္ဍဲကွာန် (ကျောက်ဆင်) ၊ ပွိုင်ဍုင်လံင်လုင်၊ ခရိုင်ထဝဲါ၊ ရးတၞင်သဳဂှ် နူဒပ်ကမ္မယှေန်ပၞာန် ပန်ဏာလွဟ်ဇၞော်ဂှ် ဒတုံခတိုဟ်အာဂှ်ရ ကောန်ကဵုအပါ ညး (၂) တၠ ချိုတ်အာတုဲ ညးဗြဴအာယုက်ဇၞော်မွဲတၠ ဒးအာဘဲဝပ်နွံရဂှ် ဂွံတီကေတ် နူညးဒေသဗလးတိတံ ဟီုဂးလဝ်ရ။
ဂိတုအဝ်ဂေတ် (၁၈) ၊ နူတနေံဏံ အခိင်နူဂယး ၜိုတ် (၁၁) နာဍဳဂှ် ဟွံဒှ်ပေဲါဗ္တိုက်မွဲသာ် နူ (ခလရ ၁၀၄) ဖျေံသဇိုင်ဍုင်လံင်လုင် ပန်ဏာလွဟ်ဇၞော်ဆဆဵု (၂) မရ။
ယင်လွဟ်ဇၞော်ဂှ်ဝွံ ဒတုံခတိုဟ်အာ ကြပ်သ္ၚိဒၟံင် အပ္ဍဲကွာန် (ကျောက်ဆင်) ဂှ်ရ ဥူတာန်အံင် ကေုာံ ကောန်ညး ကိုဝ်ပျေအ်အံင် မၞုံဒၟံင်အပ္ဍဲအကြာသ္ၚိဂှ် ဒးအာဘဲဝပ် ဗွဲမသ္ကာတ်မြဟ်တုဲ ဒးချိုတ်အာ ပ္ဍဲကဵုဒၞာဲဂှ်ရောင် ညးဗြဴဒေသလံင်လုင်မွဲတၠဂှ် ဟီုရ။
“ပန်ဏာဂှ် (၂) မ။ လွဟ်ဇၞော်ဂှ် ဒတုံစှ်ေအာ လက္ကရဴသ္ၚိ။ ညးတံ ကၠောန်မံင်ကမၠောန်ကြပ်ဂှ်ရ။ ချိုတ်အာ သီုၜါတၠရ။ ဒတုံစှ်ေ အကြာသ္ၚိဟွံတုပ်ပုဟ်။ ကောန်ကဵုအပါ ဒးအာဂှ် ဒတုံစှ်ေအကြာသ္ၚိပိမတှ်ေ သ္ၚိလေဝ် လီုလာ်အာရ” သာ်ဝွံ ညးဒေသဂှ် ဟီုရ။
ကောန်ကဵုအပါ ညးၜါတၠ ဒးဝပ်သ္ကာတ်မြဟ်ချိုတ်အာဂှ်ဝွံ ဂိတုအဝ်ဂေတ် (၁၉) ၊ တ္ၚဲဏံ အခိင်တ္ၚဲစေင်ဂှ် စံင်ဏာဇွဂြဇုတ် ပ္ဍဲသုသာန်ကွာန် (ကျောက်ဆင်) ဂှ်ရောင် ဂးရ။
ပ္ဍဲကဵုဒတုံခတိုဟ်စှ်ေအလန်ပထမဂှ် ညးဗြဴမွဲတၠ ဒးအာဘဲဝပ်ပ္ဍဲကတောဝ်တုဲ သ္ၚိဒၟံင်လေဝ် လီုလာ်အာကီုရ။
ပေဲါဗ္တိုက်ဟွံကတဵုဒှ်မွဲသာ် ဟိုတ်နူပန်ဏာလွဟ်ဇၞော်ဂှ်ရ ညးဒေသ ကွာန် (ကျောက်ဆင်) ကီု သီုညးမၞုံကြပ်ပွဳဗွိုင်တံ ဒးဒှ်ဓဝိင်ကဵု အကာဲအရာဂီုကၠီုနွံရောင် ညးဗြဴဂှ် ဆက်ဟီုလဝ်ရ။
“ထေင်ကေတ် ညိင်ဝပ်ညိညတုဲ ပန်ဏာလွဲါဂှ်တှ်ေ မုဂှ်လေဝ် ဟွံတီကေတ်ပုဟ်။ ကၠာတေံလေဝ် ပန်မံင်ရ၊ ပေဲါဗ္တိုက်လေဝ် ဟွံဒှ်ပုဟ်၊ ကွာန်လ္ပာ်ဏံ ဟွံဒးပုဟ်။ ထ္ပက်ကရောင်ပၞာန်ဟေင်နွံရ၊ အခိင်ဍေံတံ မိက်ဂွံထ္ပက်ဂှ် ထ္ပက်မံင်ရ။ လၟုဟ်ဏံ ဂွိင်ဖေက်ထပ်ပန်ပၠန်ရ၊ ကွာန်ကြပ်ကြပ်တံဂှ်လေဝ် ဒှ်မံင်ဓဝိင်” သာ်ဝွံ ညးဟီုရ။
အပ္ဍဲပွိုင်ဍုင်လံင်လုင်ဝွံ စနူကၞောတ်ဂိတုမေတုဲ အကြာဒပ်ပၞာန်ကဵု ဂကောံဒပ်ပၠန်ဂတးတံ အကာဲအရာပၞာန်ကြံင်မ္ၚိုဟ်မံင်နွံတုဲ နူဒပ်ပၞာန်တံ ထ္ပက်ကရောင်ပၞာန် ကေုာံ ပန်ပှော်ကဵုလွဟ်ဇၞော် လ္ပာ်ကွာန်ဂမၠိုင်တေံ အဆက်ဆက်နွံရ။