ပ္ဍဲခရိုၚ်နန်ထၜုရဳ ကၟိန်ဍုၚ်သေံဂှ်ဝွံ ကွးဘာမွဲတၠ ဟိုတ်နူဖံက်သၞောဝ်ပန်ပှော်ကဵုလွဟ် ပ္ဍဲကဵုဘာတန်ဗ္တောန်ဂှ်တုဲ မၞိဟ်ချိုတ် (၆) တၠ ကဵု မၞိဟ်ဒးဝပ်မကမ် ဟွံအောန်နူ ၂၀ တၠရောၚ် ဂွံတီကေတ်ရ။
တ္ၚဲဏအ် ဂိတုအဝ်ဂေတ် စၟတ်တ္ၚဲ (၇) ၜိုတ်အခိၚ်နူဂယး ၇ နာဍဳဂှ်ဝွံ ကွးဘာမၞိဟ်တြုံမွဲတၠ ဟိုတ်နူဖံက်သၞောဝ် ပန်ပှော်ကဵုလွဟ် ပ္ဍဲဘာတန်ဗ္တောန် နန်ထၜုရဳတုဲ အ္စာၝောံချိုတ်ၜါတၠ၊ ကောန်ကွးဘာချိုတ် (၄) တၠကဵု ဟွံအောန်နူ ၂၀ တၠ ဒးလဝ်ဘဲဝပ်နွံရ။
အခိၚ်ပန်ပှော်လွဟ်ဂှ်မ္ဂး ကွးဘာတအ်ကီု မၞိဟ်နွံကြပ်ဗ္ဒါဲတအ်ကီုဂှ် ဖေက်လကိုတ်တိုန်တုဲ မွဲအသိၚ်ဂှ် ဗၠာဲသၟိၚ်သေံတအ် လုပ်ကၠုၚ်စိုပ်စၟဳစၟတ် ဒဒှ်ရ ဂွံတီကေတ်ညးတၠဒုဟ်ရပ်လွဟ် ကွးဘာမွဲတၠဂှ်ရ။
ဆ္ဂး ကွးဘာညးလုတ်လောန်ဒုဟ်ရပ်လွဟ်ဏအ်ဝွံ ဂကောံရီုဗၚ်မၞိဟ်ကေုာံ ဗၠာဲသၟိၚ်သေံတအ် လုပ်ဂၠာဲဂှ် ဂွံဆဵုကေတ် ညးတေံဂစိုတ်ထောံ ဇကုဇကု ပ္ဍဲကဵုဘာတန်ဗ္တောန်ဂှ်တုဲ လွဟ်ကီု မကမ်ကီု ဗၠာဲသၟိၚ်သေံတအ် သီဂွံလဝ်တုဲ ဆက်ဂၠိုက်ဂၠာဲမံၚ်ဖိုဟ်ရ။
ပြဟ်ဟ်ဏအ်ဝွံ အ္စာၝောံဒးချိုတ်ၜါတၠ ကဵု ကောန်ကွးဘာ လၟိဟ် ၂၀ တၠပြၚ် ဒးလဝ်ဘဲဝပ်တအ်ဂှ် ပလံၚ်ဏာရုၚ်ဂဥုဲလွဳလွတ်မံၚ်တုဲ အ္စာၝောံၜါတၠ ကဵု ကောန်ကွးဘာ (၄) တၠ သီုကဵုကွးဘာလုတ်လောန်ဒုဟ် ချိုတ်မွဲတၠတအ်ဂှ် ပလံၚ်ဏာလဝ်ရုၚ်ပါ်ကရေက် ဆက်စၟဳစၟတ်မံၚ်ဖိုဟ်ရ။
ကိစ္စဏအ်ဝွံ မုဟိုတ်သာ်လဵု ဖံက်သၞောဝ်ရပ်လွဟ်တုဲ ပန်ပှော်ဂှ်လေဝ် ဗၠာဲသၟိၚ်သေံတအ် ဂၠိုက်ဂၠာဲစၟဳစၟတ်မံၚ် ပရူဒဒှ်ဍာံဖိုဟ်ရောၚ်ဂှ် ဂွံတီကေတ်ရ။