ဌာနက္ဍိုက်ပ်ဂၠံင် နူကဵုဌာနဝန်ဇၞော်ပရေင်သိုင်ခၞံ တၠအဝဵုပၞာန်တအ် ပစူလဝ်ဂတဵုမုက် (ဝဳနာင်) သွက်ဂွံသၠဲပတိတ်ဂၠံင်ဇၞော် (၂၃၀) ပေ ဂှ် ညးဍုင်ကွာန်တအ် ဒှ်မံင်ဂဝိင်ရောင် တၠဆေင်ဖျာသွံဂၠိက်ယာတ် လတူဍုင်ဇြပ်ဗုမွဲတၠ ဟီုရ။
ဂိတုတုဲကၠုင်ဏံ နူကဵုဌာနက္ဍိုက်ပ်ဂၠံင်တအ် ကလေင်ပစူလဝ် (ဝဳနာင်) ပ္ဍဲကဵုမွဲဒမြိပ်ဂၠံင်ဇၞော် သွက်ဂွံသၠဲပတိတ်ဂၠံင် (၂၃၀) ပေ ဂှ် ဍုင်၊ ကွာန် နွံပ္ဍဲမုက်ဂၠံင်ဇၞော်တအ်ဂမၠိုင် သ္ၚိသ္ကဲဂၠံင်ၜါလ္ပာ်ဂှ် ဒးအာဖအိုတ်တုဲ ကိုန်စဳဇန်ဏံ ဗီုလဵုဖန်ဇန်ပြုပြေင်အာရောဂှ် ညးဍုင်ကွာန်တအ် မင်ကျေဝ်ဗဵုဒၟံင်သီုဂဝိင်အိုတ်ရ။
“ဂၠံင်ဇၞော်အာယှဏံ ဍေံရန်လဝ် (၂၃၀) ပေ ဂှ် နူလက်ထက်အလဵုအသဳတုဲတုဲကၠုင်တေံရ၊ လက်ထက်အေန်အေဝ်လ်ဒဳ ဒးဒုင်သီတုဲတုဲ ဍေံဒိုအ်အာမွဲအံင်၊ လၟုဟ် ဍေံကလေင်ပစူပတိုန်ပၠန်၊ အဓိပ္ပါဲဍေံတှ်ေ ဂၠံင်ဖအိုတ်သီုၜါလ္ပာ်ဂှ် (၂၃၀) ပေ၊ မွဲစြေက် (မွဲလ္ပာ်) တှ်ေ (၁၁၅) ပေ၊ ဂၠံင်ဇၞော်နွံမံင်လၟုဟ်ဟ်ဂှ် (၁၀၀) ပေ၊ မွဲစြေက် (မွဲလ္ပာ်) တှ်ေ (၅၀) ပေ၊ ယဝ်ဍေံကၠောန် ဗီုကာတ်လဝ်ဝဳနာင်လၟုဟ်ဂှ်တှ်ေ မွဲမွဲလ္ပာ်တှ်ေ ထပ်သၠဲလုပ်အာ (၆၅) ပေပၠန်တှ်ေ သ္ၚိနွံမုက်ဂၠံင်တအ်စဂှ် ဒးအာဖအိုတ်ရ” သာ်ဝွံ တၠဆေင်ဖျာဂၠိက်ယာတ်ဂှ် ဟီုရ။
ပ္ဍဲကဵုဂတဵုမုက် (ဝဳနာင်) ပစူလဝ်ဂှ် ယၟုဂၠံင် – ကျာ်ဇၞော် (ဘုရားကြီး)၊ ဍုင်မတ်မလီု၊ ထဝါဲ၊ ဗိက်၊ (ဘုတ်ပြင်း)၊ ကအ်သံင် အဆံင်ဂၠံင်ဂှ် ဂၠံင်ဇၞော်ဆက်စၠောံဍုင်သအာင်၊ သၠဲဂၠံင်ဂှ် (၂၃၀) ပေ ချူလဝ်ရ။
ဂတဵုမုက် (ဝဳနာင်) ဂၠံင်ဇၞော်ဆက်စၠောံဍုင်သအာင်ဝွံ ဗွဲကြဴနူကဵု တၠအဝဵုပၞာန်တအ် ပြံင်သၠာဲၜးကယျိုင် ဗီုပြင်အလဵုအသဳအရာပ်တုဲဂှ် စဓမံက်ပစူကၠုင်တုဲ ကိုန်စဳဇန်ပရေင်ကမၠောန်ဂှ် ဆက်စပ်ဒၟံင်ကဵု ကိုန်စဳဇန်ပရေင်ပိုန်ဒြပ် သၞေဟ်က္ၜင် ဒယျိုဟ်ထဝါဲနွံရောင် ညးဆက်စပ်ကဵု ညးစၞးကၠတ်ထဝ်မန်မွဲတၠ ဟီုရ။
“ဂၠံင်ဇၞော်ဏံဂှ် ဍေံဆက်စပ်မံင်ကဵု ကိုန်စဳဇန်ပရေင်ပိုန်ဒြပ်ဍုင်သအာင် ထဝါဲတေံ တိုက်ရိုက်ဏောင်၊ ဍေံစဓမံက်ရုပ်ရဴကမၠောန်အတေံတှ်ေ ဂၠံင်ဇၞော်အာယှဏံလေဝ် ဍေံဒးကၠောန်တွဵုရ၊ အဵုပ္ဍဲကဵုဍေံကၠောန် ပရေင်ဖောအ်ဗြေဝ်ဏံဂှ်တှ်ေ ဍေံဒးသၠဲဂၠံင်ဇၞော်ဏံဏောင်၊ နူကဵု (၁၀၀) ပေ ဂှ် ဒှ်အာ (၂၃၀) ပေ၊ မွဲမွဲလ္ပာ်တှ်ေ ဒှ်အာ (၁၁၅) ပေဏောင်၊ ယဝ်ဍေံတိတ်ဒးအာပ္ဍဲဍုင် ပ္ဍဲကွာန်ဏောင်တှ်ေ သၠဲမုက်ဂၠံင်ဂှ် သ္ၚိစဂှ် ကၠအ်စဂှ် ဒးချိုတ်ပၠိုတ်ရ၊ ဆဂး မိင်မံင်ဂှ်တှ်ေ ဍုင်ဂှ် ဍေံဂွံတတ်ဂှ် ဖန်ဝါတ်မံင်၊ ဍေံဖန်ဂၠံင်ကရတ် (ဖြတ်လမ်း) မိင်မံင်ဗီုဂှ်၊ အဵု ကွာန်ရ ဍေံဂွံတတ်ပါဲကွာန်ဂှ် ဍေံဝါတ်မံင်ညိ၊ ယဝ်ဍေံတတ်တှ်ေ ကဵုၚုဟ်လေဲဟာ / ဟွံကဵုၚုဟ်လေဲဟာဂှ် ဟီုဟွံဒးပုဟ်” သာ်ဝွံ ညးဟီုရ။
ဗွဲကြဴနူကဵု ဌာနက္ဍိုက်ပ်ဂၠံင်တအ် ပစူလဝ် (ဝဳနာင်) သွက်ဂွံသၠဲဂၠံင် (၂၃၀) ပေ တုဲဂှ် ညးဍုင်ကွာန်နွံမုက်ဂၠံင်ဇၞော်တအ် ဗွဲမဂၠိုင် ယဝ်ရဓမံက်ရုပ်ရဴ ကၠောန်ဂၠံင်ဆက်စၠောံ ဍုင်သအာင် (ဂၠံင်အာယှ) ဏံမ္ဂး ဍုင် / ကွာန်တတ်အာမွဲဒမြိပ်တအ်ဂှ် ကဵုၚုဟ်လေဲဟာ၊ ဟွံကဵုၚုဟ်လေဲဟာဂှ်လေဝ် ဒှ်မံင်ဂဝိင်အိုတ်ရ။