အပ္ဍဲဂိတုဂျူလာင် သတ္တဟလက္ကရဴအိုတ်ဂှ် ဗြဲဂူဇၞော်တုဲ တ္ၚဲကလေင်ကာတ်ဗက်ဟွံဂတာပ် ဒးဘဲခမိတ်ကိတ်ကီု၊ ဥတုရာသဳ ဂံက်မွဲလစုတ်၊ ဂမ္တဴမွဲလစုတ်ဒှ်တိုန်ကီုတုဲ ကောန်ၚာ်ကဵု မၞိဟ်ဇၞော် နွံ ဒေသပယျဵုဍုင်ကျာ်ပိဂမၠိုင် က္တဵုဒှ်ယဲခ္ဍက်၊ ယဲချာံ၊ ယဲမနက်၊ ယဲဇွဟ်၊ ယဲကအ်ဂိဂၠိုင်ရောင် ဂွံတီကေတ်ရ။
ကောန်ၚာ် အာယုက် (၁၀) သၞာံပါ်သၟဝ်ကဵု မၞိဟ်ဇၞော် အာယုက် (၆၀) လ္ပာ်လ္တူ ဒှ်ဂၠိုင်တုဲ အကြာရုင်ဂဥုဲမၞုံလ္တူဍုင်ကျာ်ပိကီု၊ ရုင်ဂဥုဲမၞုံအကြာကွာန်ကီု သီုဆေင်ဖျာသွံရာန်ဂဥုဲတအ်ဂှ် ဒးအာရာန်ဒၟံင်ဂဥုဲ၊ အာထ္ၜးဒၟံင်ရုင်ဂဥုဲအိုတ်ရောင် ညးဒေသလ္တူဍုင်ကျာ်ပိမွဲတၠ ဂးရ။
“ဇၟာပ်သၞာံရ စိုပ်အခိင်ဥတုရာသဳကသိုန်ဗြဲဂူတှ်ေ ကောန်ၚာ်ကဵု မၞိဟ်ဇၞော်တံ ဒးဆဵုဂဗ ယဲခ္ဍက်၊ ယဲချာံ၊ ယဲမနက်၊ ယဲဇွဟ်၊ ယဲကအ်ဂိဂှ် နဒဒှ်အခိင်ဍေံရ၊ ဆဂး လ္တူဍုင်ကျာ်ပိဏံဂှ် စနူပၞာန်သီအဝဵုတုဲ ဂကောံရပ်လွဟ်ပၠန်ဂတးပံင်ကောံဂမၠိုင် လုပ်ဗတိုက်ကေတ်ဍုင်ကျာ်ပိတုဲ အုပ်ဓုပ်ဂှ်ရ ဌာနပရေင်ထတ်ယုက်အလဵုအသဳတံ ဇၟာပ်ပ်သၞာံ ကဵုဒၟံင်ပညာကဵု ညးဍုင်ကွာန် စှ်ေမွဲသ္ၚိ၊ တိုန်မွဲသ္ၚိဂှ် နူကဵုသၞာံ (၂၀၂၂) တုဲကၠုင်ဂှ်ရ ကၠေံဗ္ဒန်အာဒၟံင် ဒဵုကဵုအခိင်လၟုဟ်ရောင်” သာ်ဝွံ ညးဟီုရ။
တုဲပၠန် ညးမၞုံလ္တူဍုင်ကျာ်ပိလ္ၚဵုတအ်ဂှ် ဟိုတ်နူတၞးလိက်သက်သဳ မဆက်စပ်ကုဍုင်သေံ လုပ်သၞောဝ်နွံတုဲ အာဒုင်လွဳမံင်ယဲ လ္ပာ်ရုင်ဂဥုဲဝင်က၊ ရုင်ဂဥုဲဂဥုဲ ပုဂ္ဂလိက မၞုံဍုင်သေံလေဝ်နွံရ။
ပ္ဍဲအခိင်အခါဗီုရဴသာ်ဏအ်ဂှ် နူစအဝဲကောန်င္ရာ် စဵုကဵုမၞိဟ်အာယုက်ဇမၞော်တအ် ဒးစွံသတိကဵု ပရေင်ထတ်ယုက်တုဲ ဗွဲမဗဗွဲကဵုဥတုရာသဳ ညံင်ဂွံမံင်လေပ်၊ ညံင်ယဲဟွံဂွံလုပ် ပ္ဍဲခန္ဓဇကုမာန်ဂှ် အလဵုဇကုဇကု ဒးစဵုဒၞာမင်မွဲကၠာအိုတ်ရောင် အ္စာဂဥုဲဒေါံဇူ နူဗော်ဍုင်မန်တၟိမွဲတၠ ဟီုရ။
“ယဲချာံ၊ ယဲခ္ဍက်၊ ယဲမနက်၊ ယဲဇွဟ်ဂှ် ဍေံဒှ်အန္တရာဲလမျီုနွံကီုလေဝ် ဆဂး ဒှ်တှ်ေ ညံင်ဂွံဂၠာဲအ္စာဂဥုဲပြဟ်ဟ်ဂှ် ဒှ်တင်အဓိကမွဲရောင်” သာ်ဝွံ ညးဆက်ဟီုလဝ်ရ။
တုဲပၠန် ပွဳပွူဒေသပယျဵုကျာ်ပိဂှ် မွဲအခိင်တေံ ဂြိုပ်ဇၞော်တုဲ ခမိတ်ဂၠိုင်၊ စၟစၟန်ဂကူတၞဟ်ဟ်ဂၠိုင်ဂှ်ရ ဒဵုကဵုအခိင်လၟုဟ် ယဲဇွဟ်၊ ယဲမနက်၊ ယဲတၞဟ်ဟ်ဂမၠိုင် က္တဵုဒှ်ကၠုင်ဒၟံင်ရောင် ညးဆက်ဟီုရ။
ဒှ်သာ်ဂှ်ရ ညးမွဲကဵုမွဲ ညံင်ဟွံဂွံဒးဒုင်ကၠောံထၞာန်ယဲ ဗွဲမလောဲသွာမာန်ဂှ် ပ္ဍဲကာလတ္ရဲဏအ် ကာလအာကၠုင်မ္ဂး ညံင်ဂွံကၟာတ်လဝ် ယာတ်ကၟာတ်ပါင်ကီု၊ ပ္ဍဲပွဳပွူသ္ရိဇကု ဒၞါဲဇကုနွံတန်တဴမံင်ဂှ် ညံင်ဂွံသ္အးဇ္ၚးပသောင်ထောံ ခၟိက်အုဲအုဲအေင်င်တအ်ကီု စတမ်တအ်ဂှ် ဒှ်အဓိက သွက်ဂွံစဵုဒၞါဇကုဇကုကဵု ညးဂမၠိုင်ခိုဟ်မွဲရောင် ကဵုလဝ်ကသပ်အိုတ်ရ။