ပ္ဍဲသ္ကုတ်ဂၠံင်ဍာ်ဗု-ကလိင်အံင်၊ မၞုံအပ္ဍဲပွိုင်ဍုင်ဍာ်ဗု၊ ရးဒေသဇၞော်တၞင်သဳဂှ် ကရောင်ပၞာန်ကမ္မယှေန်ပၞာန် ဇြဟတ်ၜိုတ် (၂၀၀) တံ လုပ်စိုပ်ဖျေံလဝ်ဒပ်ရောင် ဂကောံဒပ်ပၠန်ဂတးအပ္ဍဲဒေသတံ ဟီုရ။
စပ္တံနူဂိတုဂျုလာင်အိုတ်ဂှ်တုဲ ကောန်သ္ဂံင်နူဒပ်ဍာ်မောရဝတဳကီု သီုတမ်ဒပ်ဖျေံသဇိုင် ပွိုင်ဍုင်တယျက်ချံင်၊ တမ်ဒပ်ဖျေံသဇိုင်ဍုင်ဗိက်၊ တမ်ဒပ်တိုက်ဖျေံသဇိုင်ပွိုင်ဍုင်ဍာ်ဗုကီု သီုဖအိုတ် ဇြဟတ်ၜိုတ် (၂၀၀) ပြင်တံ ထ္ပက်ကရောင်ပၞာန်လုပ်စိုပ်ကၠုင်ရ။
ဟိုတ်ဂှ်ရ စဵုကဵုတ္ၚဲဏံ ဖျေံလဝ်ဒပ် ပ္ဍဲဒၞာဲပွဳဗွိုင်ကြပ်ကွာန်ဍာ်ဂမ္တဴ၊ ရတ်တၟး၊ “ကျောက်ကဒင်” ဂှ် ဖိုဟ်ရောင် ညးတာလျိုင်နူဗျူဟာ (၃၃) ၊ ဌာနပၞာန်ရးတၟေင် PDF သဝ်ဒါကိုဝ် ဟီုကဵုဌာန်ပရိုင်ဗၠးၜးမန် IMNA ရ။
“စနူဂိတုအိုတ်တုဲ ထ္ပက်ကၠုင်ကရောင်ပၞာန် ဗွဲမဂၠိုင်ရ။ ဆဂး လၟုဟ် က္လေင်ဆုတ်အာညိညရ။ သီုဖအိုတ်ဂှ် က္လေင်ဆုတ်အာ ဟွံသေင်ပုဟ်။ ဒၞာဲဗွဲမဂၠိုင်ဂှ် ဖျေံစွံလဝ်ကင်နွံရ။ ဇြဟတ်ဂှ်တှ်ေ ၜိုတ် (၂၀၀) နွံဏောင်” သာ်ဝွံ သဝ်ဒါကိုဝ် ဟီုရ။
ယင်ကရောင်ပၞာန်ဂမၠိုင်ဂှ်ဝွံ ဖျေံစွံလဝ်ကင်တုဲ ဂဇံမံင်ဒပ် ပ္ဍဲပွဳဗွိုင်ကြပ်ကွာန်ဂှ်ရ ညးဒှ်ဂဝိင် ဂွိင်ဖေက်ဒှ်ပေဲါဗ္တိုက်တံ ပဲါဒဴဒၟံင်ဗွဲယာယဳနွံရ။
ဟိုတ်နူလုပ်စိုပ်ဖျေံလဝ်ဒပ် ပ္ဍဲကဵုကြပ်ကွာန် ညးဍုင်ကွာန်မံင်တန်တဴဂှ်ရ လ္ပာ်ဂကောံဒပ်ပၠန်ဂတးတံ သွက်ဂွံဓမံက်ရုပ်ရဴပေဲါဗ္တိုက်ဂှ် ဒှ်ခက်ခုဲတုဲ နကဵုညးဍုင်ကွာန်/ညးဒေသတံ အာကၠုင်စွံသတိညိဂှ် ညးတာလျိုင် နူဒပ်ဗၠးၜးညးဍုင်ကွာန်ထဝဲါမွဲတၠ ဟီုရ။
“ပြဟ်ပြဟ်ဏံ ပရေင်စုက်လုက်ဇၞော်ဇၞော်ဂှ် ဟွံဒှ်ဏီပုဟ်။ လ္ပာ်ဍေံတံဂှ် ထ္ပက်မံင်နကဵုဇြဟတ်ဗွဲမဂၠိုင်ရ။ ကြပ်ကွာန်ဟီုတှ်ေ မၞိဟ်လ္ပာ်ဏံလေဝ် ဂွံဆေင်မုက်ဂှ် ခက်ခုဲမံင်ညိညရ။ အဓိကဂှ်တှ်ေ ညးဍုင်ကွာန်တံ၊ ကွာန်တံ နွံမံင်ကြပ်ကြပ်ဏောင်တှ်ေ” သာ်ဝွံ ဟီုရ။
သ္ကုတ်ဂၠံင်ဍာ်ဗု-ကလိင်အံင်ဂှ်ဝွံ ဒှ်ဂၠံင်ဍာန်ကိစ္စဇၞော် မဆက်စၠောံလဝ် ပွိုင်ဍုင်ဍာ်ဗုကဵု ပွိုင်ဍုင်တယျက်ချံင်တုဲ နကဵုပရေင်ပၞာန်လေဝ် ဒှ်ဒေသ ဒပ်ၜါလ္ပာ်တံ ချဳဓရာင်မံင်နွံရ။
ကောန်သ္ဂံင်နူဂကောံကမ္မယှေန်ပၞာန် မထ္ပက်ဒၟံင်ကရောင်ပၞာန် အပ္ဍဲပွိုင်ဍုင်ဍာ်ဗုဂှ် ဂြိပ်တိတ်မံင်မွဲနှေံမွဲနှေံနွံတုဲ ကောန်သ္ဂံင်ဂြိပ်ဗၠးတိတ်အာဂမၠိုင်တံဂှ်လေဝ် ဗက်ဂၠိုက်ဂၠာဲဒၟံင် ပ္ဍဲကဵုကွာန်မၞုံကြပ်ပွဳဗွိုင်ဂှ်နွံရောင် ဂွံတီကေတ် နူညးဒေသတံရ။